ဖိအားတွေအောက် ကျရောက်နေချိန် ဖီဖာအရေးပေါ်အစည်းအဝေးတစ်ခု ခေါ်ယူလိုက်တဲ့ အင်ဖန်တီနို
ဂျီယန်နီအင်ဖန်တီနိုက ဖီဖာ(FIFA)ရဲ့ အဆင့်မြင့်ခေါင်းဆောင်ပိုင်းတွေကို ဒီနေ့(သြဂုတ် ၅ ရက်)၊ မော်ရိုကိုနိုင်ငံမှာ တွေ့ဆုံဖို့ ဆင့်ခေါ်လိုက်ပါတယ်။
The Athletic ရဲ့ဖော်ပြချက်အရ အင်ဖန်တီနိုက လတ်တလောထွက်ပေါ်နေတဲ့ ဝေဖန်မှုတွေကြောင့် ဖီဖာရဲ့ထိပ်ပိုင်းခေါင်းဆောင်တွေနဲ့ မော်ရိုကိုမှာ အရေးပေါ်အစည်းအဝေး ပြုလုပ်ဖို့ ဆုံးဖြတ်ခဲ့တယ်လို့ သိရပါတယ်။
အကျပ်ရိုက်နေတဲ့ ဖီဖာဥက္ကဋ္ဌက ဒေါ်နယ်ထရမ့်နဲ့ ဆက်နွှယ်နေတဲ့ အမေရိကန်ပုဂ္ဂလိက ရင်းနှီးမြှုပ်နှံမှုလုပ်ငန်းတွေဆီ ကမ္ဘာ့ဖလားပြိုင်ပွဲရဲ့ အစုရှယ်ယာ ၂၁ ရာခိုင်နှုန်း ရောင်းချသွားမယ့် စီမံကိန်း ပျက်ပြားသွားပြီးနောက် ရာထူးမှနုတ်ထွက်ပေးဖို့ အပြင်းအထန်ဖိအားပေးခံနေရပါတယ်။
တစ်ကမ္ဘာလုံးရဲ့ကန့်ကွက်သံတွေ ဆူညံခဲ့ပြီးနောက် အင်ဖန်တီနိုက သူ့ရဲ့အဆိုပြုချက်ကို ဖျက်သိမ်းခဲ့ပါတယ်။ ကန့်ကွက်မှုတွေအနက် ဥရောပဘောလုံးအဖွဲ့ချုပ် (UEFA) က နောင်မှာ ဖီဖာကြီးမှူးကျင်းပမယ့် ပြိုင်ပွဲအားလုံးကို သပိတ်မှောက်မယ်လို့ ပြင်းပြင်းထန်ထန် ကြေညာခဲ့ပါတယ်။
ဒါတင်မကသေးဘဲ ဂျော်ဒန်ဘောလုံးအဖွဲ့ချုပ်ဥက္ကဋ္ဌ၊ မင်းသားအလီဘင်အယ်လ်ဟူစိန်ကလည်း အင်ဖန်တီနိုကို ခြိမ်းခြောက်ငွေညှစ်မှု (blackmail) တွေ လုပ်ဆောင်နေသူလို့ စွပ်စွဲထားပါသေးတယ်။
အခုတော့ ဖီဖာအတွင်းရေးမှူးချုပ်မားတီးယပ်စ်ဂရပ်စထရွမ်းကလည်း ဖီဖာအရာရှိချုပ်ကယ်ဗင်လာမိုးနဲ့အတူ ပူးပေါင်းပြီး အင်ဖန်တီနိုရဲ့စီမံကိန်းကို ကန့်ကွက်တယ်လို့ ကြေညာခဲ့ပါတယ်။
ဒီလိုအပြင်းအထန်ဝေဖန်မှုတွေနဲ့ အဖွဲ့အစည်းအတွင်း ကန့်ကွက်သံတွေပါ ဆူညံလာလို့ အင်ဖန်တီနိုကိုယ်တိုင် အရေးပေါ်အစည်းအဝေးခေါ်ယူကျင်းပရခြင်း ဖြစ်ပါတယ်။
