ဘရန့်ဖို့ဒ်အသင်းဟာ လီဂူးဝမ်းကလပ် လန်းအသင်းက အဆင့်မြင့်ခြေစွမ်းရှိတဲ့ ကွင်းလယ်လူ မာမာဒူဆန်ဂါရေးကို ခေါ်ယူဖို့ သဘောတူညီမှု ရရှိသွားပြီလို့ သတင်းတွေအရ သိရပါတယ်။ အသက် ၂၄ နှစ်အရွယ် ဒီကစားသမားဟာ ပြီးခဲ့တဲ့ ၂၀၂၅-၂၆ ရာသီမှာ ချန်ပီယံဆုကို အံ့အားသင့်ဖွယ် စိန်ခေါ်နိုင်ခဲ့တဲ့ လန်းအသင်းအတွက် လီဂူးဝမ်းပွဲစဉ် ၂၉ ပွဲအထိ ကစားပေးခဲ့ပြီး တစ်နှစ်တာအကောင်းဆုံးအသင်းမှာ ပါဝင်ခွင့်ရခဲ့တဲ့အထိ ခြေစွမ်းပြနိုင်ခဲ့သူပါ။ Sky Sports ရဲ့ ဖော်ပြချက်အရ ဘရန့်ဖို့ဒ်ဟာ အဲဒီအဆင့်မြင့်ကွင်းလယ်လူကို ခေါ်ယူဖို့အတွက် လန်းအသင်းနဲ့ ပေါင် ၄၁ သန်းတန်ကြေးရှိတဲ့ သဘောတူညီမှုတစ်ခုကို ရရှိခဲ့တာ ဖြစ်ပါတယ်။ ခရစ္စတယ်ပဲလေ့စ်အသင်းမှာ ပီယာရီဆေ့ချ်နဲ့ ပြန်လည်လက်တွဲမယ်လို့ သတင်းတွေထွက်ခဲ့တဲ့ ဆန်ဂါရေးဟာ အခုအခါမှာတော့ ဆေးစစ်မှုခံယူဖို့အတွက် ယူကေကို လာရောက်ဖို့ ပြင်ဆင်နေပြီ ဖြစ်ပါတယ်။ ဒီပြောင်းရွှေ့ကြေးဟာ ဘရန့်ဖို့ဒ်လို ကလပ်အသင်းမျိုးအတွက် အလွန်များပြားတဲ့ ပမာဏဖြစ်ပေမဲ့ အသင်းရဲ့ အမြင့်ဆုံးစံချိန်တော့ မဟုတ်သေးပါဘူး။ ပြီးခဲ့တဲ့ နွေရာသီမှာ ဘုန်းမောက်အသင်းကနေ ဒန်ဂိုဝါတာရာကို ခေါ်ယူခဲ့စဉ်က ပေးချေခဲ့ရတဲ့ ပေါင် ၄၂ သန်းထက် အနည်းငယ်ပဲ လျော့နည်းတဲ့အတွက် အသင်းရဲ့ ဒုတိယအမြင့်ဆုံး ပြောင်းရွှေ့ကြေး ဖြစ်လာမှာပါ။