မန်ချက်စတာယူနိုက်တက်အသင်းဟာ သူတို့ရဲ့ နွေရာသီ ကစားသမားသစ်အဖြစ် အန်ဒရီ ဆန်းတို့စ်ကို ခေါ်ယူလိုက်ပြီဖြစ်ကြောင်း တရားဝင် ထုတ်ပြန်ကြေညာလိုက်ပါတယ်။

အသက် ၂၂ နှစ်အရွယ်ရှိပြီဖြစ်တဲ့ ဒီကစားသမားဟာ ယူနိုက်တက်နဲ့ ၂၀၃၁ ခုနှစ်အထိ ရှိမယ့် ရေရှည်စာချုပ်တစ်ရပ်ကို လက်မှတ်ရေးထိုးခဲ့တာပါ။ သတင်းတွေအရ ယူနိုက်တက်ဟာ ဆန်းတို့စ်အတွက် ပြောင်းရွှေ့ကြေး ပေါင်သန်း ၅၀ ပေးချေခဲ့ရပြီး၊ လွယ်လွယ်ကူကူ ရရှိနိုင်မယ့် add-ons ကြေး ပေါင် ၂ သန်းအပြင် ချဲလ်ဆီးအသင်းအတွက် ပြန်လည်ရောင်းချရငွေရဲ့ ၁၀ ရာခိုင်နှုန်း ခံစားခွင့်လည်း စာချုပ်ထဲမှာ ပါဝင်ပါတယ်။

အခုလို ပြောင်းရွှေ့လာခဲ့တာနဲ့ ပတ်သက်ပြီး ဆန်းတို့စ်က အမြဲတမ်းနည်းပြအဖြစ် ခန့်အပ်ခံထားရတဲ့ မိုက်ကယ် ကားရစ်ရဲ့ လက်အောက်မှာ ပြီးခဲ့တဲ့ရာသီက အဆင့် ၄ ရရှိခဲ့တဲ့ ယူနိုက်တက်အသင်းဆီ ပြောင်းရွှေ့ခွင့်ရခဲ့လို့ အတိုင်းမသိ ဝမ်းသာပီတိဖြစ်ရကြောင်း အခုလို ပြောကြားခဲ့ပါတယ်။

"မန်ချက်စတာယူနိုက်တက်နဲ့ ပတ်သက်သမျှ အရာအားလုံးက ထူးခြားပါတယ်။ ကျွန်တော့်ရဲ့ အကြီးမားဆုံး စံပြပုဂ္ဂိုလ်တချို့ ကစားခဲ့တဲ့ ကလပ်အသင်းကို အခုလို ပူးပေါင်းခွင့်ရတာဟာ တကယ့်ကို အံ့ဩစရာကောင်းတဲ့ ခံစားချက်ပါပဲ။

ကွင်းလယ်လူတစ်ယောက်အနေနဲ့ မိုက်ကယ် ကားရစ်ဆီကနေ သင်ယူခွင့်ရမှာ ဖြစ်လို့ တကယ့်ကို စိတ်လှုပ်ရှားမိပါတယ်။ သူဟာ ကျွန်တော့်ရဲ့ ကစားသမားဘဝကို နောက်တစ်ဆင့် တက်လှမ်းနိုင်ဖို့နဲ့ အိပ်မက်တွေဆီ အရောက်လှမ်းနိုင်ဖို့ ကူညီပေးမယ့် အကောင်းဆုံး နည်းပြတစ်ယောက်ပါ။

ကလပ်အသင်းရဲ့ ရည်မှန်းချက်ကြီးမားပုံနဲ့ ဒီမှာ ဖန်တီးထားတဲ့ ကောင်းမွန်တဲ့ ပတ်ဝန်းကျင်အကြောင်းကို လူတိုင်းက ကျွန်တော့်ကို ပြောပြထားကြပါတယ်။ လက်ရှိအသင်းရဲ့ အင်အားက ဘယ်လောက်တောင့်တင်းလဲဆိုတာ ကျွန်တော်သိပြီး၊ ဆုဖလားကြီးတွေအတွက် အတူတူ လက်တွဲတိုက်ပွဲဝင်သွားဖို့ မစောင့်နိုင်တော့ပါဘူး။"

ဆန်းတို့စ်ဟာ ချဲလ်ဆီးအသင်းအတွက် ပြိုင်ပွဲစုံ ၄၇ ပွဲ ကစားပေးခဲ့ပြီး ၃ ဂိုး သွင်းယူကာ ဂိုးဖန်တီးမှု ၅ ကြိမ် ပြုလုပ်ပေးထားနိုင်ခဲ့သူပါ။ သူဟာ ၂၀၂၂ ဇူလိုင်လအတွင်း တော့ဒ် ဘိုလီ ဦးဆောင်တဲ့ စီမံကိန်းအောက်မှာ ပထမဆုံးအကြိမ် ခေါ်ယူခံခဲ့ရတဲ့ ကစားသမားဖြစ်ပေမဲ့ လန်ဒန်အနောက်ခြမ်းမှာတော့ ခြေစွမ်းပြသနိုင်ဖို့ ရုန်းကန်ခဲ့ရပါတယ်။

ဒီလူငယ်ကစားသမားဟာ အခုနှစ်နွေရာသီ ကမ္ဘာ့ဖလားပြိုင်ပွဲအတွက် ဘရာဇီးလ်အသင်း လူစာရင်းမှာ ရွေးချယ်ခြင်းမခံခဲ့ရဘဲ၊ လာမယ့် သီတင်းပတ်တွေအတွင်းမှာ ကားရစ်ရဲ့ ယူနိုက်တက် ရာသီကြို လေ့ကျင့်ရေးအသင်းနဲ့ ပူးပေါင်းသွားမယ်လို့ သိရပါတယ်။