၂၀၂၆ ကမ္ဘာ့ဖလားပြိုင်ပွဲရဲ့ အုပ်စုအဆင့်ပွဲစဉ်တွေက စနေနေ့မှာ စိတ်လှုပ်ရှားစရာတွေနဲ့အတူ ပြီးဆုံးသွားခဲ့ပြီး နောက်တစ်ဆင့်တက်ရောက်နိုင်တဲ့ အသင်း ၃၂ သင်း ထွက်ပေါ်လာပြီ ဖြစ်ပါတယ်။ လက်ရှိချန်ပီယံ အာဂျင်တီးနားအသင်းက အုပ်စုတွင်း ၃ ပွဲစလုံး အနိုင်ရပြီး ခြေစွမ်းပြနေသလို၊ လီယွန်နယ်မက်ဆီကလည်း တစ်ပွဲပျမ်းမျှ ၂ ဂိုးနှုန်းနဲ့ သွင်းယူနေပါတယ်။ ၂၀၁၈ ချန်ပီယံ ပြင်သစ်နဲ့ အိမ်ရှင် မက္ကဆီကိုတို့ဟာလည်း အုပ်စုပွဲစဉ်အားလုံးအနိုင်ရထားတဲ့ အသင်းတွေဖြစ်ပါတယ်။

၂၀၁၄ ချန်ပီယံ ဂျာမနီအသင်းကတော့ အုပ်စုအဖွင့်ပွဲမှာ ကူရာကာအိုကို ၇-၁ နဲ့ ဂိုးပြတ်နိုင်ခဲ့ပေမဲ့ နောက်ဆုံးပွဲမှာ အီကွေဒေါကို ရှုံးနိမ့်ခဲ့ပါတယ်။ 

ဘရာဇီး၊ ပေါ်တူဂီ၊ အင်္ဂလန်နဲ့ ဥရောပချန်ပီယံ စပိန်တို့ကလည်း အုပ်စုအဆင့် ရလဒ်တွေအပေါ်မှာ ကျေနပ်မှုမရှိကြပါဘူး။ ဒါ့အပြင် အာဂျင်တီးနားနဲ့ ပေါ်တူဂီတို့က ရှုံးထွက်ဇယားရဲ့ တစ်ဖက်စီမှာရှိနေတာကြောင့် ဗိုလ်လုပွဲရောက်မှသာ ထိပ်တိုက်တွေ့နိုင်တော့မှာ ဖြစ်ပါတယ်။

ဒါဆိုရင် ဘယ်အသင်းက ဗိုလ်လုပွဲတက်ဖို့ အလွယ်ကူဆုံး လမ်းကြောင်း ရှိနေသလဲ။ အဖြေကတော့ ရှင်းပါတယ်။ မက်ဆီ ဦးဆောင်တဲ့ အာဂျင်တီးနား အသင်းပါပဲ။

၂၀၂၆ ကမ္ဘာ့ဖလားဗိုလ်လုပွဲသို့ အာဂျင်တီးနားရဲ့ လမ်းကြောင်း

အာဂျင်တီးနားက ၃၂ သင်းအဆင့်မှာ ကိတ်ဗာဒီနဲ့ ရင်ဆိုင်ရမှာဖြစ်ပါတယ်။ ကိပ်ဗာဒီက ဒီပြိုင်ပွဲမှာ အံ့အားသင့်စရာတွေ လုပ်ပြထားပေမဲ့ အင်အားကြီး အာဂျင်တီးနားကို ကျော်ဖြတ်ဖို့ကတော့ တကယ်ခက်ခဲတဲ့ စိန်ခေါ်မှုဖြစ်ပါတယ်။ 

တကယ်လို့ ကိတ်ဗာဒီကို နိုင်ခဲ့ရင်တော့ အီဂျစ်နဲ့ ဩစတြေးလျပွဲစဉ်ကနိုင်တဲ့အသင်းနဲ့ ကစားရမှာဖြစ်ပြီး အဲဒီနှစ်သင်းစလုံးကလည်း ခြေစွမ်းအရအားရစရာသိပ်မရှိပါဘူး။

ကွာတားဖိုင်နယ်မှာတော့ ဆွစ်ဇာလန်၊ ကိုလံဘီယာ၊ ဂါနာ ဒါမှမဟုတ် အယ်လ်ဂျီးရီးယားတို့ထဲက တစ်သင်းနဲ့တွေ့နိုင်ပြီး အာဂျင်တီးနားအနေနဲ့ အဲဒီအသင်းတွေကို အေးအေးဆေးဆေးကျော်ဖြတ်နိုင်ဖို့ အခွင့်အရေး များပါတယ်။ 

ဆီမီးဖိုင်နယ်မှာတော့ ဘရာဇီးလ်၊ နော်ဝေ၊ အိုင်ဗရီကို့စ် ဒါမှမဟုတ် အင်္ဂလန်တို့နဲ့ တွေ့နိုင်ပါတယ်။ ခြုံကြည့်ရရင်တော့ ဆီမီးဖိုင်နယ်မတိုင်ခင်အထိ အာဂျင်တီးနားအတွက် ခက်ခဲတဲ့စမ်းသပ်မှုမျိုး မရှိနိုင်ပါဘူး။

ဥရောပအင်အားကြီးအသင်းများ တစ်ဖက်ခြမ်းမှာ စုပြုံနေခြင်း

အာဂျင်တီးနားရဲ့လမ်းကြောင်းက ရှင်းနေပေမဲ့ ဇယားရဲ့ တခြားတစ်ဖက်မှာတော့ ပြင်သစ်၊ ပေါ်တူဂီ၊ ဂျာမနီ၊ နယ်သာလန်၊ စပိန်နဲ့ ဘယ်လ်ဂျီယံတို့လို အသင်းကြီးတွေ စုပြုံနေပါတယ်။

ဥပမာအားဖြင့် ဂျာမနီနဲ့ ပြင်သစ်တို့ဟာ ၁၆ သင်းအဆင့်မှာတင် ထိပ်တိုက်တွေ့နိုင်တာကြောင့် အသင်းကြီးတစ်သင်း စောစောစီးစီးထွက်သွားရတော့မှာဖြစ်ပါတယ်။ 

ပေါ်တူဂီနဲ့ စပိန်တို့လည်း ၁၆ သင်းအဆင့်မှာ ရင်ဆိုင်ရဖို့ ရှိနေပါတယ်။ ဒီဥရောပအင်အားကြီး အသင်းတွေအတွက် ဗိုလ်လုပွဲအိမ်မက်က ၁၆ သင်းအဆင့်ကတည်းက ဗိုလ်လုပွဲလို အကြိတ်အနယ်ပွဲတွေကို ကျော်ဖြတ်နိုင်မှသာစတင်နိုင်မှာဖြစ်ပါတယ်။ 

အာဂျင်တီးနားရှိတဲ့ ဘက်အခြမ်းမှာ အသင်းကြီးတွေ ထွက်သွားဖို့ အလားအလာ နည်းပေမဲ့ ဥရောပအသင်းတွေရှိတဲ့ ဘက်မှာတော့ ပြင်းထန်တဲ့ တိုက်ပွဲတွေ စောစောစီးစီး စတင်တော့မှာ ဖြစ်ပါတယ်။