အာဆင်နယ်ကြယ်ပွင့်ဆာကာက အခုသီတင်းပတ်အတွင်း ခရိုအေးရှားနဲ့ကစားရမယ့် ကမ္ဘာ့ဖလားအုပ်စုအဖွင့်ပွဲစဉ်မှာ အင်္ဂလန်အသင်းအတွက် ပွဲထွက်ပါဝင်ဖို့ အဆင်သင့်ဖြစ်နေနိုင်ပါတယ်။

အင်္ဂလန်အသင်းက လက်ရှိကစားသမားအများစုကို နာကျင်စေခဲ့တဲ့ ၂၀၁၈ ကမ္ဘာ့ဖလားရှုံးထွက်အဆင့်အရေးနိမ့်မှုအတွက် ပြန်လည်တုံ့ပြန်နိုင်ဖို့ အခုညပိုင်း၊ ဒဲလက်စ်မြို့ရှိ AT&T အားကစားကွင်းမှာ အုပ်စု (L)ရဲ့အဖွင့်ပွဲစဉ်အဖြစ် ခရိုအေးရှားအသင်းနဲ့ ရင်ဆိုင်ကစားရပါမယ်။

အင်္ဂလန်အသင်းက ဒဏ်ရာရရှိသွားတဲ့ လီဗရာမန်တိုရဲ့နေရာမှာ အစားထိုးဖို့ ချဲလ်ဆီးနောက်ခံလူချာလိုဘာကို လူစာရင်းထဲမှာ ထပ်မံဖြည့်တင်းလိုက်တယ်လို့လည်း အတည်ပြုခဲ့ပြီး ပွဲဦးထွက်မတိုင်ခင် ဒဏ်ရာပြဿနာစိုးရိမ်မှုတွေ ထွက်ပေါ်လာခဲ့ပါတယ်။

ဆာကာကိုယ်တိုင်လည်း အခုဘောလုံးရာသီတလျှောက်လုံး ဒုက္ခပေးခဲ့တဲ့ ဖနောင့်ဒဏ်ရာကြောင့် ခရိုအေးရှားနဲ့ပွဲစဉ်မတိုင်ခင် စိုးရိမ်စရာ ဖြစ်လာခဲ့ပါတယ်။

ဒါပေမဲ့ ဆာကာကတော့ နည်းပြသောမတ်စ်တူချယ်ရဲ့ခရိုအေးရှားနဲ့ပွဲစဉ်အတွက် လူစာရင်းမှာ ပါဝင်ဖို့ အဆင်သင့်ဖြစ်နေပြီလို့ ဖွင့်ဟခဲ့ပါတယ်။

"နည်းပြရဲ့ဆုံးဖြတ်ချက်အပေါ် ဆန့်ကျင်တဲ့စကားမျိုး ကျွန်တော် မပြောချင်ပါဘူး။ ဒါပေမဲ့ အာတီတာ၊ အာဆင်နယ်ဆေးအဖွဲ့နဲ့ အင်္ဂလန်ဆေးအဖွဲ့တို့က ပြီးခဲ့တဲ့မတ်လကတည်းက ကျွန်တော့်ကို အကောင်းဆုံးကိုင်တွယ်ကုသပေးခဲ့ပြီး ကျွန်တော် ကွင်းတွင်းပြန်ဝင်နိုင်အောင်၊ အသင်းအတွက် တတ်နိုင်သမျှ လုပ်ဆောင်ပေးနိုင်အောင် ကူညီပေးခဲ့ကြတယ်လို့ ပြောချင်ပါတယ်။ ပြီးခဲ့တဲ့ လအနည်းငယ်ထက် အခုအချိန်မှာ ကျွန်တော် ပိုပြီးနေကောင်းလာပြီလို့ ခံစားရပါတယ်။ ပွဲကစားဖို့ အဆင်သင့်ပါပဲ။"

"ကစားသမားတစ်ဦးအတွက် ကိုယ်အဆင်သင့်မဖြစ်သေးချိန်မှာ ပွဲကစားဖို့ဆိုတာ အကြီးမားဆုံးစွန့်စားမှုတစ်ခု ဖြစ်ပါတယ်။ ကိုယ်မကစားဘဲ နေမလား သို့မဟုတ် လူတွေက ကိုယ်နဲ့ပတ်သက်လို့ ပုံမှန်အတိုင်း ဆုံးဖြတ်သုံးသပ်ကြမယ်ဆိုတာ သိလျက်နဲ့ ကွင်းတွင်း ဝင်ကစားမလားဆိုတာ ရွေးချယ်စရာ ရှိပါတယ်။"

"နောက်ဆုံးမှာတော့ လူတွေက ခင်ဗျား ဘယ်လိုခံစားနေရလဲဆိုတာကို ဂရုမစိုက်ကြပါဘူး။ သူတို့က ခင်ဗျားရဲ့စွမ်းဆောင်ရည်ကောင်းတွေကိုပဲ မျှော်လင့်ကြပါတယ်။ ဒါကြောင့် ကျွန်တော် ဒီစွန့်စားမှုကို ဝမ်းမြောက်ဝမ်းသာ လက်ခံခဲ့ပါတယ်။ ဒါ အလုပ်ဖြစ်ခဲ့တယ်လို့ ပြောနိုင်သလို ဒီအတိုင်းပဲ ဆက်လက် လုပ်ဆောင်သွားပါမယ်။ ပြီးတော့မတ်လထက်စာရင် အခုအချိန်မှာ ပိုပြီးနေကောင်းလာလို့ ပွဲကစားဖို့ အဆင်သင့်ပါပဲ" လို့ ဆာကာက ဆိုပါတယ်။

အင်္ဂလန်အသင်းအတွက် ဆာကာ ပွဲထွက်ကစားနိုင်ဖွယ်ရှိပေမဲ့ လာမယ့်၂၄ နာရီအတွင်း အခြေအနေတွေ ပြောင်းလဲသွားမယ်ဆိုရင် သူ့ရဲ့နေရာမှာ ဂန်းနားအသင်းဖော်မာဒူကီ အစားထိုးဝင်ရောက်လာနိုင်ပါတယ်။