အာဆင်နယ်ကြယ်ပွင့် ဘူကာယိုဆာကာဟာ သူ့ရဲ့ကြံ့ခိုင်မှုအပေါ် စိုးရိမ်ပူပန်မှုတွေ ရှိနေတာကြောင့် ကိုစတာရီကာနဲ့ ကစားမယ့် ခြေစမ်းပွဲကို လွဲချော်တော့မှာပါ။ အင်္ဂလန်အသင်းရဲ့ နောက်ဆုံးကမ္ဘာ့ဖလားအကြိုခြေစမ်းပွဲဖြစ်တဲ့ ကိုစတာရီကာနဲ့ ပွဲစဉ်မတိုင်ခင်မှာ ဆာကာရဲ့ ကစားချိန်ကို ဆက်လက်ထိန်းညှိပေးနေတယ်လို့ အင်္ဂလန်နည်းပြ သောမတ်စ်တူချယ်က ဒီအပတ်သတင်းစာရှင်းလင်းပွဲမှာ ထုတ်ဖော်ပြောကြားခဲ့ပါတယ်။

“ပြီးခဲ့တဲ့ မတ်လတုန်းက လက်ရွေးစင်အသင်းစခန်းမှာ ရခဲ့တဲ့ဒဏ်ရာကို ကလပ်အသင်းပွဲစဉ်တွေအထိ သယ်ဆောင်သွားခဲ့တဲ့ ဘူကာယိုကို ကျွန်တော်တို့ သေချာဂရုစိုက်ရပါမယ်။ သူက အသင်းအတွက် အဆင်သင့်ဖြစ်အောင် ကြိုးစားခဲ့သလို တကယ်ကိုလည်း ထူးထူးခြားခြား ကစားပြနိုင်ခဲ့သူပါ။ အခုလည်း ပွဲစဉ်တွေကြားမှာ သူ့ရဲ့ကစားချိန်ကို ထိန်းညှိပေးနေသလို ကြံ့ခိုင်မှုပြန်ကောင်းလာအောင်လည်း လုပ်ဆောင်ပေးနေပါတယ်။ အဲဒီလုပ်ငန်းစဉ်တွေက အခုချိန်အထိ ဆက်ရှိနေတုန်းပါပဲ” လို့ အင်္ဂလန်နည်းပြချုပ်က အင်္ဂါနေ့ညနေမှာ ပြုလုပ်ခဲ့တဲ့ ပွဲကြိုသတင်းစာရှင်းလင်းပွဲမှာ ပြောကြားခဲ့တာပါ။

အာဆင်နယ်တောင်ပံကစားသမားဟာ ဖနောင့်ကြော (Achilles) ဒဏ်ရာပြဿနာနဲ့ လပေါင်းများစွာ ရုန်းကန်နေရတာဖြစ်ပြီး ကမ္ဘာ့ဖလားအဖွင့်ပွဲကစားဖို့ တစ်ပတ်ပဲလိုတော့ပေမဲ့ အင်္ဂလန်အသင်းအတွက် မိနစ် ၉၀ အပြည့် ကစားနိုင်လောက်တဲ့ ကြံ့ခိုင်မှုမျိုး မရှိသေးဘူးလို့ ယူဆရပါတယ်။ အသက် ၂၄ နှစ်အရွယ် တိုက်စစ်ကစားသမားဟာ မတ်လတုန်းက ဒဏ်ရာရခဲ့တာဖြစ်ပေမဲ့ အာဆင်နယ်အသင်းကို ပရီးမီးယားလိဂ်ချန်ပီယံဆုနဲ့ ချန်ပီယံလိဂ်ဗိုလ်လုပွဲရောက်အောင် ကူညီပေးဖို့အတွက် အတင်းတွန်းအားပေး ကစားခဲ့တာကြောင့် ဒဏ်ရာပိုဆိုးသွားခဲ့တာလည်း ဖြစ်နိုင်ပါတယ်။

ဆာကာကတော့ ကိုစတာရီကာနဲ့ပွဲကို လွဲချော်မှာဖြစ်ပေမဲ့ အသင်းဖော်တွေဖြစ်တဲ့ အီဇီ၊ ဒက်ကလန်ရိုက်စ်နဲ့ နိုနီမာဒူယက်ကေတို့ကတော့ ၁၀၀ ရာခိုင်နှုန်း ကြံ့ခိုင်မှုပြည့်ဝနေပြီး အသင်းမှာ နေရာရဖို့ အပြိုင်အဆိုင် ကြိုးစားဖို့ အဆင်သင့်ဖြစ်နေပြီလို့ တူချယ်က ပြောပြခဲ့တာကြောင့် ဒါဟာ အင်္ဂလန်အတွက် သတင်းကောင်းတစ်ခုပဲ ဖြစ်ပါတယ်။