ပီအက်စ်ဂျီကစားသမားတွေသာ လွှမ်းမိုးထားတဲ့ ချန်ပီယံလိဂ်တစ်နှစ်တာအကောင်းဆုံးအသင်း၊ ချန်ပီယံလိဂ်တစ်နှစ်တာအကောင်းဆုံးကစားသမားဆုကို ခဗာရက်စ်ခီလီယာရရှိ
ပြင်သစ်ဘီလူးကြီးပီအက်စ်ဂျီအတွက် ချန်ပီယံလိဂ်ဖလားနှစ်ကြိမ်ဆက်တိုက်ရရှိအောင် ကူညီပေးနိုင်ခဲ့တဲ့ ဂျော်ဂျီယာတောင်ပံကစားသမားခဗာရက်စ်ခီလီယာကို ဥရောပဘောလုံးအဖွဲ့ချုပ်(ယူအီးအက်ဖ်အေ)က ချန်ပီယံလိဂ်တစ်နှစ်တာအကောင်းဆုံးကစားသမားအဖြစ် ရွေးချယ်လိုက်ပါတယ်။
စနေနေ့၊ ဗိုလ်လုပွဲမှာ ပီအက်စ်ဂျီက ပြိုင်ဘက်အာဆင်နယ်ကို တစ်ဖက်တစ်ဂိုးစီသရေရလဒ်နဲ့အတူ ပင်နယ်တီအဆုံးအဖြတ်မှာအနိုင်ယူပြီး ဥရောပချန်ပီယံဆုကို ကာကွယ်နိုင်ခဲ့ပါတယ်။
ခဗာရက်စ်ခီလီယာက အခုရာသီချန်ပီယံလိဂ်ပြိုင်ပွဲမှာ ၁၀ ဂိုးသွင်း၊ ဂိုးဖန်တီးမှု ၆ ကြိမ် ပြုလုပ်နိုင်ခဲ့ပြီး စနေနေ့ဗိုလ်လုပွဲရဲ့ဒုတိယပိုင်းပွဲချိန်အတွင်း ပီအက်စ်ဂျီအတွက် အဖိုးတန်ချေပဂိုးရရှိစေမယ့် အရေးကြီးပင်နယ်တီကိုလည်း ရယူပေးခဲ့ပါတယ်။
အသက် ၂၅ နှစ်အရွယ်ကစားသမားက အသင်းဖော်တွေဖြစ်တဲ့ ဒမ်ဘီလီ၊ မာကွင်ဟို့စ်၊ နူနိုမန်ဒက်စ်နဲ့ ဗိုလ်လုပွဲရဲ့အကောင်းဆုံးကစားသမားဆုရ ဗီတင်ဟာတို့နဲ့အတူ ချန်ပီယံလိဂ်တစ်နှစ်တာအကောင်းဆုံးအသင်းလူစာရင်းမှာလည်း ပါဝင်လာခဲ့ပါတယ်။
ဒါ့အပြင် အကောင်းဆုံးအသင်းလူစာရင်းမှာ အာဆင်နယ်ကစားသမားတွေဖြစ်တဲ့ ဒေးဗစ်ရာယာ၊ မာဂယ်လ်ဟေးစ်နဲ့ ဒီကလန်ရိုက်စ်တို့ သုံးဦးလည်း ပါဝင်ခဲ့ပါတယ်။
ရီးရဲလ်မက်ဒရစ်လူငယ်ကြယ်ပွင့်အာဒါဂူလာက တစ်နှစ်တာအထူးချွန်ဆုံးလူငယ်ကစားသမား (Revelation of the Season) ဆု ရရှိခဲ့ပြီး သူ့ရဲ့အသင်းဖော် ဗယ်လ်ဗာဒီကတော့ မန်စီးတီးကို အနိုင်ယူခဲ့တဲ့ ၁၆ သင်းရှုံးထွက်အဆင့်ပွဲစဉ်အတွင်း သွင်းယူခဲ့တဲ့ဂိုးနဲ့အတူ တစ်နှစ်တာအကောင်းဆုံးသွင်းဂိုးဆု ဆွတ်ခူးနိုင်ခဲ့ပါတယ်။
၂၀၂၅/၂၀၂၆ ချန်ပီယံလိဂ်တစ်နှစ်တာအကောင်းဆုံးအသင်းလူစာရင်း
ဂိုးသမား - ဒေးဗစ်ရာယာ (အာဆင်နယ်)
နောက်ခံလူများ - မားကို့စ်လော်ရန်တေး (အက်သလက်တီကိုမက်ဒရစ်)၊ မာကွင်ဟို့စ် (ပီအက်စ်ဂျီ)၊ မာဂယ်လ်ဟေးစ် (အာဆင်နယ်)၊ နူနိုမန်ဒက်စ် (ပီအက်စ်ဂျီ)
ကွင်းလယ်လူများ - အိုလီစီ (ဘိုင်ယန်မြူးနစ်)၊ ဒီကလန်ရိုက်စ် (အာဆင်နယ်)၊ ဗီတင်ဟာ (ပီအက်စ်ဂျီ)၊ ခဗာရက်စ်ခီလီယာ (ပီအက်စ်ဂျီ)
ရှေ့တန်းလူများ - ဒမ်ဘီလီ (ပီအက်စ်ဂျီ)၊ ဟယ်ရီကိန်း (ဘိုင်ယန်မြူးနစ်)
