ယူနိုက်တက်အတွက် ကတ်စ်မဲရိုး နောက်ဆုံးပွဲ ကစားပေးခဲ့ပြီးပြီဖြစ်ကြောင်း ကာရစ် အတည်ပြု
မန်ချက်စတာယူနိုက်တက်နည်းပြ မိုက်ကယ်ကာရစ်က ကတ်စ်မဲရိုးဟာ အသင်းအတွက် နောက်ဆုံးပွဲစဉ်ကို ကစားပေးခဲ့ပြီးပြီဖြစ်ကြောင်း အတည်ပြု ပြောကြားလိုက်ပါတယ်။
အသက် ၃၄ နှစ်အရွယ် ကတ်စ်မဲရိုးဟာ အသင်းကို ရောက်ရှိလာခဲ့တဲ့ ၄ နှစ်အကြာ၊ အခုရာသီကုန်မှာ စာချုပ်သက်တမ်းကုန်ဆုံးချိန်မှာ အိုးထရက်ဖို့ဒ်ကနေ ထွက်ခွာတော့မှာဖြစ်ကြောင်း ကြေညာထားသူပါ။
ဒီဘရာဇီးလ်ကွင်းလယ်လူဟာ အခုရာသီမှာ ၃၅ ပွဲကစားပြီး ၉ ဂိုးသွင်း၊ ဂိုးဖန်တီးမှု ၂ ကြိမ် ပြုလုပ်ထားနိုင်ခဲ့တာကြောင့် ဒါဟာ သူ ယူနိုက်တက်မှာ ကစားခဲ့သမျှ ကာလပတ်လုံး ဂိုးအများဆုံးသွင်းယူနိုင်ခဲ့တဲ့ ရာသီလည်း ဖြစ်ပါတယ်။
ရာသီပိတ်ပွဲစဉ်ဖြစ်တဲ့ ဘရိုက်တန်နဲ့ပွဲ မတိုင်ခင်မှာ ကာရစ်က ကတ်စ်မဲရိုး ပါဝင်ကစားတော့မှာ မဟုတ်ဘူးလို့ အတည်ပြုခဲ့တာပါ။
"ကတ်စ်မဲရိုး အတွက်ကတော့ ပြီးခဲ့တဲ့အပတ်ကပွဲဟာ သူ့ရဲ့နောက်ဆုံးပွဲဖြစ်မယ်လို့ ကျွန်တော် ဆုံးဖြတ်ခဲ့ပါတယ်။ အားလုံးက ကျွန်တော်တို့ မျှော်လင့်ထားသလိုပါပဲ၊ သူဟာ တကယ်ကို အံ့ဩစရာကောင်းတဲ့ ကစားသမားတစ်ယောက်ပါ။ သူနဲ့ပတ်သက်ပြီး ကျွန်တော် အများကြီး ပြောပြီးပါပြီ၊ အခုအချိန်ဟာ သူ အသင်းကနေ ထွက်ခွာဖို့ အချိန်ကောင်းလို့ ဆုံးဖြတ်ခဲ့ကြတာပါ" လို့ ကာရစ်က ဆိုပါတယ်။
ဒါ့အပြင် "ဒီအသင်းရဲ့ ရည်ရွယ်ချက်က လူငယ်ကစားသမားတွေကို မြေတောင်မြှောက်ပေးဖို့ဖြစ်ပြီး၊ အခုလို ပွဲစဉ်တွေမှာ အတွေ့အကြုံနဲ့ လူငယ်စွမ်းအားကို ဟန်ချက်ညီညီ ပေါင်းစပ်ဖို့ပါပဲ။ ပွဲအခြေအနေပေါ် မူတည်ပြီး အကောင်းဆုံး အသုံးချသွားမှာပါ။ ကျွန်တော်တို့ဆီမှာ နောက်တစ်ဆင့်ကို တက်လှမ်းနိုင်မယ့် တကယ်တော်တဲ့ လူငယ်ကစားသမားတွေ ရှိနေပါတယ်" လို့လည်း သူက ဆက်ပြောပါတယ်။
ကွင်းလယ်လူ ကတ်စ်မဲရိုးဟာ ပြီးခဲ့တဲ့ တနင်္ဂနွေနေ့က နော့တမ်ဖောရက်စ်ကို ၃-၂ နဲ့ အနိုင်ရခဲ့တဲ့ အိမ်ကွင်းနောက်ဆုံးပွဲစဉ်အပြီးမှာ ပရိသတ်တွေကို နှုတ်ဆက်ခွင့် ရရှိခဲ့ပါတယ်။
လက်ရှိမှာတော့ ကတ်စ်မဲရိုးဟာ အင်တာမိုင်ယာမီအသင်းမှာ လီယွန်နယ်မက်ဆီနဲ့ သွားရောက်ပူးပေါင်းတော့မယ်လို့လည်း သတင်းတွေ ကျယ်ကျယ်ပြန့်ပြန့် ထွက်ပေါ်နေပါတယ်။
