မာရက်စကာနဲ့ ကွန်ပနီတို့ မန်စီးတီးနဲ့ သတင်းထွက်ပေါ်လာချိန်မှာပဲ အသင်းကနေထွက်ခွာဖို့နီးစပ်လာတဲ့ ဂွါဒီယိုလာ
ပက်ဂွါဒီယိုလာဟာ ဒီရာသီကုန်မှာ မန်ချက်စတာစီးတီးအသင်းကနေ ထွက်ခွာဖို့ ပြင်ဆင်နေပြီလို့ သတင်းတွေထွက်ပေါ်နေပြီး ဒါဟာ အီတီဟတ်ကွင်းရဲ့ ထူးခြားပြောင်မြောက်တဲ့ ခေတ်တစ်ခေတ်ကို အဆုံးသတ်လိုက်တာလည်း ဖြစ်ပါတယ်။
Mail သတင်းဌာနရဲ့ ဖော်ပြချက်အရ စပိန်လူမျိုးနည်းပြဟာ တနင်္ဂနွေနေ့မှာ ကစားမယ့် အက်စတွန်ဗီလာနဲ့ ပွဲစဉ်အပြီးမှာ ရာထူးကနေ နုတ်ထွက်သွားဖို့ ရှိနေပါတယ်။ အခုဆိုရင် မန်စီးတီးအသင်းဟာ တရားဝင် အသိပေးချက် မထုတ်ပြန်ခင်မှာပဲ အသင်းရဲ့ စပွန်ဆာတွေကို ကြိုတင်အကြောင်းကြားထားပြီးဖြစ်တယ်လို့ သိရပါတယ်။
၂၀၁၆ ခုနှစ်မှာ ဘိုင်ယန်မြူးနစ်ကနေ ရောက်ရှိလာခဲ့တဲ့ ဂွါဒီယိုလာဟာ မန်စီးတီးအသင်းကို အကြီးအကျယ် ပြောင်းလဲပစ်နိုင်ခဲ့ပြီး ပရီမီယံလိဂ်ဖလား ၆ ကြိမ်အပြင် အခြားသော ပြည်တွင်းဆုဖလား အမြောက်အမြားကို ရရှိအောင် စွမ်းဆောင်ပေးခဲ့သူ ဖြစ်ပါတယ်။
အကယ်၍ ရာသီပိတ်နောက်ဆုံးပွဲစဉ်မှာ အာဆင်နယ်အသင်းသာ ခြေချော်ခဲ့မယ်ဆိုရင် သူဟာ ၇ ကြိမ်မြောက် လိဂ်ချန်ပီယံဆုကို ထပ်မံရယူနိုင်ဦးမှာ ဖြစ်ပါတယ်။ ဒါ့အပြင် မန်စီးတီးအသင်းဟာ နည်းပြရဲ့ အောင်မြင်မှုတွေကို ဂုဏ်ပြုဖို့အတွက် တနင်္လာနေ့မှာ အမိုးဖွင့်ဘတ်စ်ကားနဲ့ အောင်ပွဲခံလှည့်လည်ဖို့ စီစဉ်နေတယ်လို့လည်း သတင်းတွေမှာ ဖော်ပြထားပါတယ်။
ဂွါဒီယိုလာရဲ့ နေရာမှာ အစားထိုးဖို့အတွက် လက်ထောက်နည်းပြဟောင်း အန်ဇိုမာရက်စကာနဲ့ ဘိုင်ယန်မြူးနစ်နည်းပြ ဗင်းဆင့်ကွန်ပနီတို့ နှစ်ဦးစလုံးဟာ ဆက်ခံသူတွေဖြစ်လာနိုင်ကြောင်း သတင်းတွေ ထွက်ပေါ်နေပါတယ်။
