နော့တင်ဟမ်ဖောရက်စ် နည်းပြ ဗစ်တာပယ်ရီယာဟာ ဘရိုင်ယန် အမ်ဘီယူမိုရဲ့ လက်ထိဘောဖြစ်ရပ်အပြီးမှာ သူ့ရဲ့ "သံသယဖြစ်စရာတွေ" ကို တင်ပြဖို့အတွက် ဒိုင်လူကြီးအဖွဲ့ (PGMOL) နဲ့ တွေ့ဆုံဖို့ တောင်းဆိုလိုက်ပါတယ်။

ပယ်ရီယာရဲ့အသင်းဟာ ပြီးခဲ့တဲ့ တနင်္ဂနွေနေ့ (မေလ ၁၇ ရက်) က အိုးထရက်ဖို့ဒ်မှာ မန်ယူအသင်းကို ၃-၂ ဂိုးနဲ့ ရှုံးနိမ့်ခဲ့ပေမဲ့ တကယ်တမ်းမှာတော့ ပွဲရလဒ်က ဒီထက်ပိုပြီး ပြောင်းလဲသွားနိုင်စရာ ရှိခဲ့ပါတယ်။

အိမ်ရှင်အသင်းအတွက် ၂-၁ ဖြစ်စေမယ့် မားသီးယပ်စ် ကွန်ညာရဲ့ ဂိုးမရခင်မှာ ဘောလုံးက အမ်ဘီယူမိုရဲ့ လက်မောင်းကို ထိခဲ့ပုံပေါ်နေလို့ ဖြစ်ပါတယ်။

VAR ဒိုင်လူကြီး ပီတာဘန့်စ်က အဆိုပါတိုက်စစ်မှူးရဲ့ လက်ထိဘော ဖြစ်နိုင်ခြေကို အချိန်အတော်ကြာ ပြန်လည်စစ်ဆေးခဲ့ပေမဲ့ ကွင်းလယ်ဒိုင် မိုက်ကယ် ဆော့လ်စဘူရီကတော့ အဲဒီဂိုးကို ဂိုးအဖြစ်ပဲ နောက်ဆုံးမှာ အတည်ပြုပေးခဲ့ပါတယ်။

ပွဲအပြီး သတင်းထောက်တွေနဲ့ တွေ့ဆုံချိန်မှာ ပယ်ရီယာက အဆိုပါဆုံးဖြတ်ချက်အပေါ် အတော်လေး စိတ်ပျက်နေပြီး ဒိုင်လူကြီးတွေကို စီမံခန့်ခွဲတဲ့အဖွဲ့ဖြစ်တဲ့ PGMOL နဲ့ တွေ့ဆုံခွင့်ပေးဖို့ တောင်းဆိုခဲ့တာပါ။

"ရူးသွပ်ဖို့ကောင်းတဲ့ ပွဲတစ်ပွဲပါပဲ၊ ပရိသတ်တွေအတွက်တော့ ကြည့်ကောင်းတဲ့ပွဲ ဖြစ်နိုင်ပေမဲ့ နည်းပြတစ်ယောက်အတွက်ကတော့ အထူးသဖြင့် ဒုတိယပိုင်းမှာ ကစားကွက်တွေ အရမ်းပွင့်နေခဲ့ပါတယ်" လို့ သူက ပြောပါတယ်။

"အဆုံးသတ်မှာတော့ ကျွန်တော် လက်ခံရမယ့် ဆုံးဖြတ်ချက်တစ်ခုကြောင့် ပွဲရလဒ် အပြောင်းအလဲဖြစ်သွားတာ တကယ်ကို နှမြောဖို့ကောင်းပါတယ်။ ဒါပေမဲ့ ဒါဟာ ကျွန်တော့်ရဲ့ အမြင်မဟုတ်ပါဘူး၊ ကျွန်တော့်အတွက်ကတော့ ဒါဟာ လက်ထိဘော ဖြစ်နေတာ အရမ်းကို ရှင်းနေတာပါ၊ ဒါကိုမှ သူက ဂိုးကို မပယ်ဖျက်ဖို့ ဆုံးဖြတ်ခဲ့တာပါ" လို့ ဆိုပါတယ်။

ပရီမီယာလိဂ်ဒိုင်လူကြီးတွေရဲ့ ဆုံးဖြတ်ချက်တွေဟာ တစ်သမတ်တည်းမရှိဘဲ ကွဲလွဲနေတာတွေကို အဆင့်မြင့်အရာရှိတွေနဲ့ ညှိနှိုင်းဖြေရှင်းဖို့ လိုအပ်တယ်လို့ ပယ်ရီယာက ယုံကြည်နေပါတယ်။

"လက်ရှိ ပရီမီယာလိဂ်ရဲ့ ဆုံးဖြတ်ချက်တွေအပေါ် ကျွန်တော်တို့မှာ ဒီလိုမျိုး သံသယတွေ ရှိနေပါတယ်။ အားလုံးနဲ့ တွေ့ဆုံဆွေးနွေးပြီး စည်းမျဉ်းတွေနဲ့ ဆုံးဖြတ်ချက်တွေကို နားလည်အောင် ကြိုးစားဖို့က အရေးကြီးတယ်လို့ ထင်ပါတယ်၊ နည်းပြအားလုံးမှာလည်း အချို့သော ဆုံးဖြတ်ချက်တွေအပေါ် သံသယတွေ ရှိနေကြလိမ့်မယ်လို့ ကျွန်တော် ထင်ပါတယ်" လို့ ပယ်ရီယာက ထပ်လောင်းပြောကြားခဲ့ပါတယ်။