ခရစ္စတယ်ပဲလေ့စ်နဲ့ ယှဉ်ပြိုင်ရမယ့်ပွဲစဉ်မတိုင်ခင် မန်စီးတီးနည်းပြ ပက်ဂွါဒီယိုလာက မီဒီယာတွေနဲ့ တွေ့ဆုံစကားပြောကြားခဲ့ပါတယ်။

ပြီးခဲ့တဲ့ စနေနေ့က ဘရန့်ဖို့ဒ်ကို အိမ်ကွင်းမှာ ၃-၀ နဲ့ အနိုင်ရရှိခဲ့တဲ့ မန်စီးတီးဟာ အခုအခါမှာတော့ ခရစ္စတယ်ပဲလေ့စ်ကို အီတီဟတ်ကွင်းမှာ ဧည့်ခံကစားသွားရမှာဖြစ်ပါတယ်။ လက်ရှိမှာတော့ ဇယားထိပ်က အာဆင်နယ်အသင်းက မန်စီးတီးထက် ၅ မှတ် ဖြတ်ထားဆဲ ဖြစ်ပါတယ်။

ဗုဒ္ဓဟူးနေ့မှာ ကစားမယ့် ပဲလေ့စ်နဲ့ပွဲမှာသာ အနိုင်ရခဲ့ရင် အမှတ်ကွာဟမှုကို ၂ မှတ်အထိ လျှော့ချနိုင်မှာဖြစ်ပြီး ဂန်းနားတို့ကို အမီလိုက်နိုင်ဖို့ဆိုရင် ဂွါဒီယိုလာရဲ့အသင်းအနေနဲ့ ရာသီပိတ်ပွဲစဉ်တွေမှာ အမှားအယွင်းမရှိဘဲ အကောင်းဆုံးပုံစံကို ဆက်ထိန်းထားနိုင်ဖို့ ရည်မှန်းထားပါတယ်။

အသင်းရဲ့ အဓိကကွင်းလယ်လူ ရိုဒရီဟာ လေ့ကျင့်ခန်း ပြန်ဆင်းနေပြီဖြစ်လို့ ပွဲထွက်ကစားနိုင်ခြင်း ရှိ၊ မရှိကိုတော့ စောင့်ကြည့်သွားမယ်လို့ စီးတီးနည်းပြက ပြောပါတယ်။ ဒါ့အပြင် ပြီးခဲ့တဲ့ရာသီက ပဲလေ့စ်အသင်းဆီကနေ ခေါ်ယူခဲ့တဲ့ မာ့ခ်ဂူဟီနဲ့ ပတ်သက်ပြီးလည်း ဂွါဒီယိုလာက အခုလို ချီးကျူးခဲ့ပါတယ်။

"သူဟာ တကယ့်ကို အံ့ဩစရာကောင်းတဲ့ ခေါ်ယူမှုတစ်ခုပါ။ ပွဲတိုင်းရဲ့ အသေးစိတ်အချက်အလက်တွေကအစ၊ ပရော်ဖက်ရှင်နယ်တစ်ဦး ဖြစ်လာဖို့အတွက် သူ့ရဲ့ ပုဂ္ဂိုလ်ရေးဘဝအဆုံး အရာရာကို အာရုံစိုက်ပါတယ်။ ဒီကလပ်အတွက် သူဟာ မယုံနိုင်လောက်အောင် ကောင်းမွန်တဲ့ ခေါ်ယူမှုဖြစ်ပြီး ကျွန်တော်တို့ တကယ်ကို ကျေနပ်မိပါတယ်။ ကျွန်တော်တို့ မျှော်လင့်ထားတဲ့အတိုင်း သူ ပြုမူနေထိုင်ပါတယ်။ ဒါဟာ ကလပ်အသင်းကြီးတွေမှာရှိတဲ့ ကစားသမားကြီးတွေရဲ့ သဘာဝပဲလို့ ကျွန်တော် ခဏခဏ ပြောခဲ့ဖူးပါတယ်" လို့ ဆိုပါတယ်။

ဒါ့အပြင် အာဆင်နယ်ရဲ့ ရလဒ်တွေက သူ့ကစားသမားတွေအပေါ် ဘယ်လိုသက်ရောက်မှုရှိသလဲဆိုတာနဲ့ ဒီလနှောင်းပိုင်းမှာ ကွန်ဖရင့်လိဂ် ဗိုလ်လုပွဲ ကစားရတော့မယ့် ပဲလေ့စ်အသင်းရဲ့ အခြေအနေတွေအပေါ် မေးမြန်းရာမှာတော့ ဂွါဒီယိုလာက လက်ရှိပွဲစဉ်ကိုပဲ အာရုံစိုက်ထားတယ်လို့ ဖြေကြားခဲ့ပါတယ်။

"ကျွန်တော့်ရဲ့ အာရုံက ခရစ္စတယ်ပဲလေ့စ်နဲ့ပွဲပေါ်မှာပဲ ရှိပါတယ်။ နည်းပြတစ်ယောက်အနေနဲ့ ကိုယ်ထိန်းချုပ်လို့ရတဲ့ အရာတွေပေါ်မှာ ဘယ်လိုပိုကောင်းအောင် လုပ်မလဲ၊ ဒီရာသီမှာ ဘာတွေ လိုအပ်ချက်ရှိခဲ့သလဲ ဆိုတာတွေကို အမြဲသင်ယူနေပါတယ်။ ကျွန်တော်တို့ ချန်ပီယံဆုအတွက် ဆက်လက် တိုက်ပွဲဝင်နေဆဲပါပဲ"။

"ပဲလေ့စ်အသင်းက အရမ်းကို ပရော်ဖက်ရှင်နယ်ဆန်ပါတယ်။ ကျွန်တော်တို့နဲ့ပွဲမှာ သူတို့ အစွမ်းကုန် ကစားလာပါလိမ့်မယ်။ မနေ့က လိဒ်နဲ့ စပါးပွဲမှာ မြင်ခဲ့ရသလိုပါပဲ၊ လိဒ်အသင်းဟာ တန်းဆင်းဇုန်ထဲမှာ မဟုတ်တော့ပေမဲ့ သူတို့ ဘယ်လောက်အထိ အားသွန်ခွန်စိုက် ကစားသွားတယ်ဆိုတာ ကြည့်ပါ။ အရင်တုန်းကလည်း အက်စတွန်ဗီလာနဲ့ ဒီကွင်းမှာ ကစားခဲ့တုန်းက သူတို့မှာ ဘာရည်မှန်းချက်မှ မရှိတော့ပေမဲ့ တကယ်ကို ကစားရခက်ခဲ့ပါတယ်။ ပဲလေ့စ်အသင်းအနေနဲ့ ၃ ရက်အတွင်းမှာ ဗိုလ်လုပွဲ ကစားရဖို့ ရှိနေပေမဲ့လည်း ကျွန်တော်တို့နဲ့ပွဲမှာ သူတို့ အကောင်းဆုံး ကြိုးစားလာမယ်ဆိုတာ ကျွန်တော် သေချာပေါက် သိပါတယ်" လို့ ပြောကြားခဲ့ပါတယ်။