ဗုဒ္ဓဟူးနေ့၊ စပို့တင်းလစ္စဘွန်းနဲ့ အိမ်ကွင်းပွဲစဉ်မှာ ဂိုးမရှိသရေကျခဲ့ပြီးနောက် ဝေဖန်သူတွေကို ပါးစပ်ပိတ်အောင် မလုပ်နိုင်ခဲ့ပေမဲ့ ချန်ပီယံလိဂ်ဆီမီးဖိုင်နယ်ထပ်မံတက်လှမ်းနိုင်မှုကို အာဆင်နယ်အတွက် "အံ့ဩစရာကောင်းတဲ့ အောင်မြင်မှု" တစ်ခုဖြစ်တယ်လို့ ဒီကလန်ရိုက်စ်က ပြောကြားလိုက်ပါတယ်။

ပြီးခဲ့တဲ့သီတင်းပတ်၊ ကိုင်ဟားဗက်ဇ်ရဲ့ပေါ်တူဂီမြေနောက်ကျဂိုးကြောင့် ဂန်းနားတို့က စပို့တင်းလစ္စဘွန်းကို နှစ်ကျော့ပေါင်းရလဒ် ၁-၀ ဂိုးဖြင့် အနိုင်ယူကာ နောက်တစ်ဆင့်ဆီ တက်လှမ်းနိုင်ခဲ့ပါတယ်။
ချန်ပီယံလိဂ်ဖလားကို တစ်ကြိမ်တစ်ခါမှ မရဖူးသေးတဲ့ အာဆင်နယ်က ပြီးခဲ့တဲ့ရာသီ၊ ဆီမီးဖိုင်နယ်မှာပဲ ချန်ပီယံဖြစ်သွားတဲ့ ပီအက်စ်ဂျီကို ရှုံးနိမ့်ပြီး ပြိုင်ပွဲမှ ထွက်ခဲ့ရပါတယ်။

အခုဆိုရင် သူတို့က ဆီမီးဖိုင်နယ်မှာ အက်သလက်တီကိုမက်ဒရစ်နဲ့ ရင်ဆိုင်ရဖို့ရှိနေပြီး ဒီအဆင့်ကိုကျော်ဖြတ်နိုင်ရင် မေလ၊ ဘူဒါပတ်စ်မှာ ကျင်းပမယ့် ဗိုလ်လုပွဲမှာ ပီအက်စ်ဂျီ သို့မဟုတ် ဘိုင်ယန်မြူးနစ်နဲ့ ယှဉ်ပြိုင်ကစားရပါလိမ့်မယ်။

"ဆီမီးဖိုင်နယ်ကို နှစ်နှစ်ဆက်တိုက်တက်နိုင်တယ်ဆိုတာ ဒီအသင်းအတွက် အံ့ဩစရာကောင်းတဲ့ အောင်မြင်မှုတစ်ခုပါပဲ" လို့ ရိုက်စ်က TNT Sports ကို ပြောပါတယ်။ "အခုဆိုရင် ကျွန်တော်တို့ဟာ ပြီးခဲ့တဲ့နှစ်ထက် ပိုပြီး ရှေ့ရောက်ချင်နေပါပြီ၊ ဗိုလ်လုပွဲအထိ တက်လှမ်းချင်တာပါ" လို့လည်း ဆိုပါတယ်။

ဒါပေမဲ့ အမ်းမရိတ်ကွင်းမှာကစားခဲ့တဲ့ စိတ်လှုပ်ရှားစရာသိပ်မရှိတဲ့ သရေပွဲစဉ်က တနင်္ဂနွေနေ့မှာ မန်စီးတီးနဲ့ကစားရမယ့် ပရီးမီးယားလိဂ်အဆုံးအဖြတ်ပွဲစဉ်အတွက် အာတီတာရဲ့ကစားသမားတွေကို အားတက်စရာ သိပ်မဖြစ်စေခဲ့ပါဘူး။

အာဆင်နယ်က ပြိုင်ပွဲစုံနောက်ဆုံးငါးပွဲအနက် တစ်ပွဲသာ အနိုင်ရရှိပြီး လိဂ်ဖလားဗိုလ်လုပွဲမှာ မန်စီးတီးကို ရှုံးနိမ့်ခဲ့သလို အက်ဖ်အေဖလားမှာလည်း ဒုတိယတန်းကလပ်အသင်း ဆောက်သမ်တန်ကို ရှုံးနိမ့်ကာ ပြိုင်ပွဲမှ ထွက်ခဲ့ရပါတယ်။

"အမြဲတမ်း အကောင်းမြင်စိတ်နဲ့ပဲ သွားရပါမယ်" လို့ ရိုက်စ်က ဆက်ပြောပါတယ်။ "ဘယ်သူတွေ ဘာပြောပြော ဂရုမစိုက်ပါဘူး။ အရေးကြီးတာက ကျွန်တော်တို့အသင်းသားတွေ ဘာတွေးလဲ၊ နည်းပြက ဘာတွေးလဲ ဆိုတာပါပဲ။ အခု ကျွန်တော်တို့ နောက်ထပ်ဆီမီးဖိုင်နယ်တစ်ခုကို ရောက်နေပြီဖြစ်လို့ တကယ်ကို ဝမ်းသာပါတယ်" လို့ ပြောပါတယ်။

မန်စီးတီးက အာဆင်နယ်ရဲ့နောက်ခြောက်မှတ်အကွာမှာ ရှိနေပေမဲ့ လက်ကျန်ပွဲတစ်ပွဲကစားဖို့ ကျန်သေးသလို အခုသီတင်းပတ်ကုန်ပိုင်းမှာလည်း ဂန်းနားတွေကို အိမ်ကွင်းအီတီဟတ်မှာ ဧည့်ခံကစားရပါမယ်။

"ဒီနှစ်မှာ ကျွန်တော်တို့ရဲ့စံချိန်တွေက ပြိုင်ပွဲစုံ တကယ်ကို ကောင်းမွန်ခဲ့ပါတယ်" လို့ ရိုက်စ်က ဆိုပါတယ်။

"ဘယ်လောက်အထိ လိုချင်သလဲ? ကျွန်တော်ရော အသင်းဖော်တွေအားလုံးရော အဆင်သင့်ဖြစ်နေမယ်ဆိုတာ သေချာပါတယ်။ ကဲ... စလိုက်ကြရအောင်!"လို့ သူက ဆက်ပြောပါတယ်။