စကော့တလန်ရဲ့ကမ္ဘာ့ဖလားပြိုင်ပွဲဝင်လူစာရင်းမှာ ပါဝင်ခွင့်ရဖို့ မျှော်လင့်နေတဲ့ အဲဗာတန်နောက်ခံလူပတ်တာဆန်
အဲဗာတန်နောက်ခံလူနာသန်ပတ်တာဆန်က အခုနိုင်ငံတကာသီတင်းပတ်၊ စကော့တလန်လက်ရွေးစင်အသင်းမှာ ပြန်လည်ရွေးချယ်ခံရလို့ ဝမ်းမြောက်ဝမ်းသာဖြစ်နေပါတယ်။
အခုဘောလုံးရာသီ၊ အဲဗာတန်အတွက် ခုနစ်ပွဲပဲ ကစားထားရသေးသလို ဇန်နဝါရီလကုန်ပိုင်းကတည်းက တစ်ပွဲမှ မကစားထားရတဲ့ ပတ်တာဆန်က တော့ စကော့တလန်ရဲ့ ကမ္ဘာ့ဖလားပြိုင်ပွဲဝင်လူစာရင်းမှာ ပါဝင်နိုင်ဖို့ အစွမ်းကုန်ကြိုးစားနေပါတယ်။
"ဟုတ်ပါတယ်၊ ရာနှုန်းပြည့်သေချာပါတယ်။ ကျွန်တော့်အတွက် အဓိကအချက်က ကမ္ဘာ့ဖလားမှာ ပါဝင်ခွင့်ရဖို့ပါပဲ။ အဲဒီကိုရောက်ဖို့ဆိုရင် ဘာပဲလုပ်ရလုပ်ရ ကျွန်တော် အကုန်လုပ်သွားပါမယ်" လို့ သူက ဆိုပါတယ်။
"အခုလို အသင်းနဲ့အတူ လာရောက်ပူးပေါင်းရတာ တကယ်ကို ကောင်းပါတယ်။ ဒီမှာ ကစားခွင့်ရသလောက် အကောင်းဆုံးကစားပြီး ခြေစွမ်းပြနိုင်ဖို့ ကြိုးစားသွားပါမယ်"
"လူတိုင်းကတော့ တတ်နိုင်သလောက် ပွဲတွေ အများကြီးကစားချင်ကြတာပေါ့၊ ဒါပေမဲ့ ဒါက ကျွန်တော့်အပေါ်မှာပဲ မူတည်နေတာမျိုး မဟုတ်ပါဘူး။ ကျွန်တော်ကတော့ ကွင်းထဲမှာ လုပ်နိုင်တာမှန်သမျှ အကုန်လုပ်သွားပါမယ်။ အခုလို အသင်းနဲ့ပြန်လည်ပူးပေါင်းခွင့်ရတာကိုပဲ ဝမ်းသာနေမိပြီး ရှေ့မှာကစားရမယ့် ပွဲစဉ်တွေကိုလည်း မျှော်လင့်နေပါတယ်"
"ကျွန်တော် တကယ်ကို နေလို့ကောင်းပါတယ်။ အဲဗာတန်အတွက် ပွဲအနည်းငယ်ပြန်ကစားထားပြီးပြီဆိုတော့ ကြံ့ခိုင်မှုအပြည့်ရှိတယ်လို့ ခံစားရပါတယ်။ လက်ရှိမှာ ကျွန်တော့်ရဲ့ခန္ဓာကိုယ်ကြံ့ခိုင်မှုအပေါ် သံသယဖြစ်စရာ မရှိတော့လို့ အခုအခြေအနေကို ကျေနပ်မိပါတယ်" လို့ ပတ်တာဆန်က ပြောကြားခဲ့ပါတယ်။
