ရီကာဒိုကာလာဖီအိုရီက အီတလီအသင်းကို ကမ္ဘာ့ဖလားခြေစစ်ပွဲအောင်မြင်အောင် ပို့ဆောင်ပေးနိုင်ဖို့အတွက် နည်းပြ ဂန်နာရိုဂတ်တူဆိုကို ထောက်ခံအားပေးနေပါတယ်။ ဒီလပိုင်းတွေအတွင်းမှာ ကာလာဖီအိုရီက မိခင်ထက်တောင် နည်းပြဖြစ်သူနဲ့ စကားပိုပြောဖြစ်တယ်လို့ နောက်ပြောင်ပြီး ပြောခဲ့ပါတယ်။

အီတလီဟာ ကမ္ဘာ့ဖလားခြေစစ်ပွဲ အုပ်စုအဆင့်မှာ နော်ဝေအသင်းရဲ့နောက် ဒုတိယနေရာနဲ့သာ ကျေနပ်ခဲ့ရပါတယ်။ နော်ဝေကတော့ ပွဲစဉ် ၈ ပွဲစလုံးကို အနိုင်ရရှိပြီး ခြေစစ်ပွဲအောင်ခဲ့တာ ဖြစ်ပါတယ်။ ဒါကြောင့် အီတလီက ကမ္ဘာ့ဖလားပြိုင်ပွဲကို သုံးကြိမ်ဆက်လွဲချော်ရမယ့်အန္တရာယ်ကြီးနဲ့ ရင်ဆိုင်နေရပါတယ်။

၂၀၁၄ ခုနှစ်နောက်ပိုင်း ကမ္ဘာ့ဖလားနဲ့ ဝေးကွာနေခဲ့တဲ့ အီတလီအသင်းက ယနေ့ည မြောက်အိုင်ယာလန်နဲ့ ရင်ဆိုင်ရမှာဖြစ်ပြီး အဲဒီပွဲမှာ အနိုင်ရတဲ့အသင်းက ဝေးလ် ဒါမှမဟုတ် ဘော့စနီးယားနဲ့ ကမ္ဘာ့ဖလားဝင်ခွင့်အတွက် အဆုံးအဖြတ်ပွဲစဉ်ထပ်မံယှဉ်ပြိုင်ရမှာဖြစ်ပါတယ်။

ကာလာဖီယိုရီဟာ တနင်္ဂနွေနေ့က မန်စီးတီးကို ၂-၀ နဲ့ ရှုံးနိမ့်ခဲ့တဲ့ လိဂ်ဖလားဗိုလ်လုပွဲမှာ ဒဏ်ရာကြောင့် ရုန်းကန်ခဲ့ရပေမဲ့ ယနေ့ည ပလေးအော့ဖ်ဆီမီးဖိုင်နယ်ပွဲစဉ်မှာ ပါဝင်နိုင်ဖို့ မျှော်လင့်ရပါတယ်။ 

ကာလာဖီအိုရီက "ကျွန်တော် အဆင်ပြေပါတယ်။ ဒီနေ့ကွင်းထဲမှာ ဘာဖြစ်မလဲဆိုတာ ကြည့်ရမှာပေါ့။ ဒါပေမဲ့ ကျွန်တော် အဆင်ပြေပါတယ်။ ဒီလို အကဲဆတ်တဲ့ အခိုက်အတန့်မျိုးမှာ အရေးကြီးတာက ပစ္စုပ္ပန်မှာ နေထိုင်ဖို့၊ တစ်မိနစ်ချင်းစီကို ပျော်ရွှင်ဖို့နဲ့ တစ်ပွဲချင်းစီကိုပဲ အာရုံစိုက်ဖို့ပါပဲ။

ပွင့်ပွင့်လင်းလင်းပြောရရင် ကျွန်တော်တို့ ကိုယ့်ဘာသာပဲ အာရုံစိုက်ဖို့ ပိုသဘောကျပါတယ်။ ပြိုင်ဘက်အကြောင်း စဉ်းစားရမယ့်အချိန် မဟုတ်ပါဘူး။ ဒါဟာ ကျွန်တော်တို့အပေါ်မှာပဲ မူတည်ပါတယ်။

ဒီပွဲကို ပုံမှန်ပွဲစဉ်တစ်ခုလိုပဲ ပြင်ဆင်ရပါမယ်။ ဘယ်လောက်အရေးကြီးလဲဆိုတာ ကျွန်တော်တို့သိပေမဲ့ ဝန်ပိနေတယ်လို့ မခံစားရသင့်ပါဘူး"လို့ ပြောခဲ့ပါတယ်။

ကာလာဖီယိုရီက နည်းပြဂတ်တူဆိုအပြင် အီတလီနည်းစနစ်ဒါရိုက်တာ ဘိုနူချီနဲ့ အကြီးအကဲ ဘူဖွန်တို့ဟာ ကစားသမားတွေဆီ လာရောက်လည်ပတ်ခဲ့ကြတယ်လို့ ပြောပါတယ်။

ဆက်လက်ပြီး ကာလာဖီအိုရီက"နည်းပြရဲ့ သဘောထားကို ကျွန်တော် အရမ်းကျေးဇူးတင်ပါတယ်။ ကျွန်တော် အမေနဲ့ပြောတာထက်တောင် သူ့နဲ့ စကားပိုပြောဖြစ်ပါတယ်။

ကျွန်တော်က ရှက်တတ်ပေမဲ့ သူက ကျွန်တော့်နားမှာနေတာ ကောင်းပါတယ်။ ဘာလို့လဲဆိုတော့ ကျွန်တော် [ဒဏ်ရာကြောင့်] ဘေးရောက်နေတဲ့အချိန် ရှိခဲ့လို့ပါ။ ကျွန်တော်တို့ အတူတူအချိန်ကုန်ဆုံးခဲ့ပြီး အဲဒါက ကောင်းပါတယ်။

ကျွန်တော်တို့အားလုံး တူညီတဲ့အရာကိုပဲ လိုချင်ကြတာပါ။ ဘာလို့ ကိုယ့်ကိုယ်ကိုယ် ဘဝကို ခက်ခဲအောင် လုပ်နေမှာလဲ? အပြုသဘောဆောင်ပြီး စဉ်းစားချင်ပါတယ်။ နောက်ဆုံးမှာ အပြုသဘောဆောင်တဲ့ စိတ်ထားရှိရင် လိုချင်တာကို ရရှိမှာပါ။

ဖိအားဆိုတာ ရှိစမြဲပါ၊ ရှောင်လို့မရပါဘူး။ ဒီပွဲက ဘယ်လောက်အရေးကြီးလဲဆိုတာ ကျွန်တော်တို့သိပါတယ်။ ကျွန်တော်တို့ အဲဒါအကြောင်း မစဉ်းစားမိအောင် ကြိုးစားနေပါတယ်။ ပွဲက နောက်နှစ်ရက်ပဲ လိုတော့တာပါ။

ဒီပွဲကို ကစားရမှာ ပျော်ပါတယ်။ ဒါက ကျွန်တော်ပေးချင်တဲ့ သတင်းစကားပါ။ အကောင်းဘက်ကကြည့်ရင် ဒါက ဆိုးဝါးသွားနိုင်ပါတယ်၊ ဒါပေမဲ့ ကျွန်တော်တို့ အကောင်းဘက်ကပဲ စဉ်းစားချင်ပါတယ်။ ဘာလို့လဲဆိုတော့ ဒီသီတင်းပတ်က ပျော်ရွှင်မှုတွေယူဆောင်လာပြီး အမေရိကမှာကျင်းပမယ့် ကမ္ဘာ့ဖလားဆီ ပို့ဆောင်ပေးနိုင်လို့ပါပဲ။ ကျွန်တော် အဲဒါတစ်ခုကိုပဲ တွေးနေပါတယ်" လို့ ပြောကြားခဲ့ပါတယ်။