အမ်ဘာပေနဲ့ ထိပ်တိုက်မတွေ့ရလို့ စိတ်အေးမိကြောင်းဖွင့်ဟလာတဲ့ မန်စီးတီးဂိုးသမား ဒွန်နာရမ်မာ
ချန်ပီယံလိဂ်ပွဲစဉ်မှာ ရီးရဲလ်မက်ဒရစ်နဲ့ ယှဉ်ပြိုင်ရဖို့ ရှိနေတဲ့ မန်စီးတီးအသင်းရဲ့ ဂိုးသမား ဂျန်လူဝီဂျီ ဒွန်နာရမ်မာကတော့ ကြယ်ပွင့်တိုက်စစ်မှူး ခီလီယန်အမ်ဘာပေဟာ ဒဏ်ရာကြောင့် ဆက်လက်အနားယူနေရတာမို့ အခုလို ရင်ဆိုင်စရာမလိုတော့တဲ့အပေါ် စိတ်သက်သာရာရမိတယ်လို့ ဝန်ခံပြောကြားလိုက်ပါတယ်။
အီတလီဂိုးသမား ဒွန်နာရမ်မာက ပီအက်စ်ဂျီအသင်းက သူ့ရဲ့အသင်းဖော်ဟောင်းဟာ ကမ္ဘာ့ဘောလုံးလောကမှာ အန္တရာယ်အရှိဆုံး တိုက်စစ်မှူးတွေထဲက တစ်ယောက်ဖြစ်ပြီး ထူးချွန်တဲ့ အရည်အသွေးတွေရှိကြောင်း အသိအမှတ်ပြု ပြောဆိုခဲ့ပါတယ်။ ၁၆ သင်းအဆင့် ရှုံးထွက်ပွဲစဉ်မတိုင်ခင်မှာ ပြောကြားခဲ့တာဖြစ်ပြီး ပြင်သစ်တိုက်စစ်မှူး မပါဝင်နိုင်တာဟာ မန်စီးတီးအသင်းအတွက် နည်းဗျူဟာပိုင်းအရ သိသိသာသာ အားသာချက်ဖြစ်စေတယ်လို့လည်း သူက ဆိုပါတယ်။
"ကျွန်တော် သူနဲ့အတူ ကစားခွင့်ရခဲ့တာ ကံကောင်းတယ်လို့ ပြောရမှာပါ။ သူဟာ ကမ္ဘာ့အကောင်းဆုံး ကစားသမားတွေထဲက တစ်ယောက်ဖြစ်သလို တကယ့်ကို ပါရမီရှင်တစ်ယောက်လည်း ဖြစ်ပါတယ်" လို့ ဒွန်နာရမ်မာက ပြောပါတယ်။
ဆက်လက်ပြီး "ဂိုးသမားတစ်ယောက်အနေနဲ့ ဒီလိုကစားသမားမျိုးကို မရင်ဆိုင်ရတာဟာ အားသာချက်တစ်ခုပါပဲ။ ကျွန်တော့်အတွက် အလုပ်ပိုသက်သာသွားတယ်လို့တောင် ပြောလို့ရပေမဲ့ သူ့နေရာမှာ အစားထိုးကစားမယ့်သူတွေကလည်း ချန်ပီယံအဆင့်အတန်းရှိတဲ့ သူတွေပါပဲ။ ဒါကြောင့် ကျွန်တော်တို့တွေအနေနဲ့ အရင်အတိုင်းပဲ အထူးဂရုစိုက်သွားရမှာပါ။ ခီလီယန်နဲ့ ကျွန်တော်က ခင်မင်တဲ့သူငယ်ချင်းတွေဖြစ်တာကြောင့် သူနဲ့ထိုက်တန်တဲ့အတိုင်း ဒုတိယအကျော့ပွဲစဉ်မှာတော့ သူ ပြန်ပါဝင်နိုင်လိမ့်မယ်လို့ မျှော်လင့်ပါတယ်" လို့ ဆိုခဲ့ပါတယ်။
