ပီအက်စ်ဂျီ နည်းပြ လူးဝစ်အင်းနရစ်က ချဲလ်ဆီးအသင်းနဲ့ ရင်ဆိုင်ရမယ့် ချန်ပီယံလိဂ် ၁၆ သင်းအဆင့် ပွဲစဉ်မတိုင်ခင်မှာ သူတို့အသင်းအနေနဲ့ ပြီးခဲ့တဲ့ရာသီက ချန်ပီယံလိဂ်ဖလား ဆွတ်ခူးနိုင်ခဲ့တဲ့ ခြေစွမ်းမျိုးကို ပြန်လည်ရရှိဖို့ "ဘယ်လိုသံသယမှ မရှိဘူး" လို့ အင်္ဂါနေ့မှာ ပြောကြားလိုက်ပါတယ်။

"ကျွန်တော်တို့မှာ ဘယ်လိုသံသယမှ မရှိပါဘူး။ အခုဆိုရင် ရာသီရဲ့ အကောင်းဆုံးအပိုင်းကို ရောက်ရှိလာပြီဖြစ်လို့ ပိုမိုမြင့်မားလာမယ့် စိန်ခေါ်မှုတွေကို ကိုင်တွယ်ဖြေရှင်းနိုင်ဖို့ လိုအပ်ပါတယ်" လို့ လွန်ခဲ့တဲ့ တစ်နှစ်က ပြသခဲ့တဲ့ ခြေစွမ်းမျိုးကို ပြန်လည်ပြသနိုင်မလားဆိုတဲ့ မေးခွန်းအပေါ် စပိန်လူမျိုးနည်းပြက ပီအက်စ်ဂျီ လေ့ကျင့်ရေးကွင်းမှာ သတင်းထောက်တွေကို ဖြေကြားခဲ့တာပါ။

ပီအက်စ်ဂျီအသင်းဟာ လာမယ့်ဗုဒ္ဓဟူးနေ့မှာ ချဲလ်ဆီးအသင်းကို Parc des Princes ကွင်းမှာ ပထမအကျော့ပွဲစဉ်အဖြစ် လက်ခံကစားရမှာဖြစ်ပြီး ဒါဟာ ပြီးခဲ့တဲ့ ဇူလိုင်လက ကမ္ဘာ့ကလပ်ဖလား ဗိုလ်လုပွဲမှာ အင်္ဂလန်ကလပ် ချဲလ်ဆီးကို ၃-၀ နဲ့ ရှုံးနိမ့်ခဲ့ပြီးနောက်ပိုင်း ပထမဆုံးအကြိမ် ပြန်လည်ဆုံတွေ့တာလည်း ဖြစ်ပါတယ်။

အဲဒီရှုံးနိမ့်မှုဟာ ကာတာလုပ်ငန်းစု ကျောထောက်နောက်ခံပြုထားတဲ့ ပီအက်စ်ဂျီအသင်းအတွက် သမိုင်းတစ်လျှောက် ပထမဆုံးအကြိမ် ချန်ပီယံလိဂ်ဖလား ဆွတ်ခူးနိုင်ခဲ့တဲ့ မှတ်တမ်းကောင်းမှာ တစ်ခုတည်းသော အနာအဆာ ဖြစ်ခဲ့ပါတယ်။

ဒါပေမဲ့ အဲဒီလို ရှည်လျားလှတဲ့ ရာသီကို ဖြတ်သန်းခဲ့ရတဲ့ ဒဏ်တွေကြောင့် ၂၀၂၅-၂၆ ရာသီမှာတော့ ကစားသမား အတော်များများဟာ ခြေစွမ်းပိုင်းနဲ့ ကြံ့ခိုင်မှုပိုင်းမှာ ရုန်းကန်နေကြရတာကို တွေ့ရပါတယ်။

ပီအက်စ်ဂျီဟာ ပြီးခဲ့တဲ့အပတ်က မိုနာကိုအသင်းကို အိမ်ကွင်းမှာ ၃-၁ နဲ့ ရှုံးနိမ့်ခဲ့လို့ ပြင်သစ် လီဂူး-ဝမ်း ဇယားထိပ်မှာ လန်းစ်အသင်းနဲ့ တစ်မှတ်အကွာပဲ ရှိပါတော့တယ်။

သူတို့ဟာ ချန်ပီယံလိဂ် အုပ်စုအဆင့် နောက်ဆုံး ၅ ပွဲမှာ ၁ ပွဲသာ အနိုင်ရခဲ့လို့ အဆင့် ၁၁ နဲ့သာ အဆုံးသတ်ခဲ့ရပြီး ပလေးအော့ဖ် အဆင့်မှာတော့ မိုနာကိုအသင်းကို ကပ်ပြီး ကျော်ဖြတ်လာခဲ့ရတာပါ။

ဒါပေမဲ့ ပြီးခဲ့တဲ့ရာသီက ဗိုလ်လုပွဲတက်လှမ်းနိုင်ဖို့ လမ်းခရီးမှာ ပရီးမီးယားလိဂ်အသင်း ၃ သင်းကို ဖယ်ရှားခဲ့တဲ့ အင်းနရစ်ကတော့ ချဲလ်ဆီးနဲ့ တွေ့ဆုံမှုက သူ့အသင်းရဲ့ အကောင်းဆုံးခြေစွမ်းကို ပြန်လည်ဖော်ထုတ်ပေးနိုင်လိမ့်မယ်လို့ မျှော်လင့်နေပါတယ်။

"အင်္ဂလန်အသင်းတွေ အားလုံးက ထူးခြားပြီး ထိပ်တန်းအဆင့်တွေပါပဲ၊ ချဲလ်ဆီးနဲ့ကလည်း ပြီးခဲ့တဲ့ နွေရာသီမှာ ကစားခဲ့ဖူးလို့ ကောင်းကောင်း သိထားပါတယ်။ သူတို့ နည်းပြပြောင်းလဲသွားသလို ကစားသမားတချို့လည်း ပြောင်းသွားပေမဲ့ ဒီလိုပွဲမျိုးတွေက ဘယ်လောက်ခက်ခဲတယ်ဆိုတာ ကျွန်တော်တို့ သိပါတယ်၊ အဆင်သင့်ဖြစ်အောင် ကြိုးစားသွားမှာပါ" လို့ သူက ဆိုပါတယ်။

စထရာဘော့အသင်းမှာ ၁၈ လကြာရှိစဉ်က "ဆွဲဆောင်မှုရှိပြီး တိုက်စစ်ဖွင့်ကစားတတ်တဲ့" ပုံစံကြောင့် ချဲလ်ဆီးနည်းပြ လီယမ် ရိုဆင်းနီးယားကို ချီးကျူးခဲ့တဲ့ ဘာစီလိုနာနည်းပြဟောင်း အင်းနရစ်က ချန်ပီယံလိဂ်ဖလားကို ကာကွယ်ဖို့ ကြိုးစားရတာဟာ ပထမဆုံးအကြိမ် ဆွတ်ခူးဖို့ ကြိုးစားရတာလောက် စိတ်ဖိစီးမှု မရှိဘူးလို့လည်း ပြောကြားခဲ့ပါတယ်။

"ပထမဆုံးအကြိမ်က ပိုခက်ခဲခဲ့တယ်လို့ ကျွန်တော် ထင်ပါတယ်၊ ဒါပေမဲ့ ဒုတိယအကြိမ်ကလည်း မလွယ်ကူပါဘူး။ ကျွန်တော်တို့ ဒုတိယအကြိမ် ထပ်နိုင်နိုင်တယ်ဆိုတာ အားလုံးသိကြပြီး အဲဒီအတိုင်းဖြစ်အောင် ကြိုးစားသွားမှာပါ" လို့ ပြောကြားခဲ့ပါတယ်။