တာဗာရက်စ်တစ်ယောက် ဘာစီလိုနာကို ပြောင်းရွှေ့သွားတာက နောဝစ်ချ်အတွက် ဂုဏ်ယူစရာဖြစ်တယ်လို့ ဆိုလာတဲ့ ဘန်နက်ပါ
နောဝစ်ချ်စီးတီးအသင်းရဲ့ အားကစားဒါရိုက်တာ ဘန်နက်ပါက လူငယ်ကစားသမား အာဂျေးတာဗာရက်စ်ကို ဘာစီလိုနာအသင်းဆီ ရောင်းချလိုက်ရတဲ့ အခြေအနေနဲ့ ပတ်သက်ပြီး ရှင်းပြခဲ့ပါတယ်။
ဒီဆယ်ကျော်သက် တောင်ပံကစားသမားလေးရဲ့ အပြောင်းအရွှေ့ကိုတော့ တနင်္လာနေ့မှာ အတည်ပြုခဲ့တာ ဖြစ်ပါတယ်။
တာဗာရက်စ်ဟာ ပြီးခဲ့တဲ့ နွေရာသီက ဒတ်ချ်ကလပ် ဗိုလန်ဒမ်နဲ့ ကစားခဲ့တဲ့ အသင်းကြီးရဲ့ ရာသီကြိုခြေစမ်းပွဲမှာ အသက် ၁၅ နှစ်သားအရွယ်နဲ့ လူစားဝင်ကစားသမားအဖြစ် ပါဝင်ခဲ့ဖူးပေမဲ့ အသင်းကြီးအတွက် တရားဝင်ပွဲစဉ် တစ်ပွဲမှတော့ ပါဝင်ကစားရခြင်း မရှိသေးပါဘူး။
"အာဂျေးလို ထူးချွန်တဲ့ အကယ်ဒမီထွက် ကစားသမားတစ်ယောက်ကို လက်လွှတ်လိုက်ရတဲ့အတွက် ကျွန်တော်တို့ တကယ်ကို စိတ်မကောင်းဖြစ်ရပါတယ်။ ဒါပေမဲ့ ကျွန်တော်တို့ရဲ့ အဓိက ခံစားချက်ကတော့ အတိုင်းအထက်အလွန် ဂုဏ်ယူမိတာပါပဲ" လို့ နက်ပါက ဆိုပါတယ်။
"အာဂျေးရဲ့ တိုးတက်လာမှုဟာ ကျွန်တော်တို့ရဲ့ အကယ်ဒမီနဲ့ ပတ်သက်နေသူအားလုံးရဲ့ ပြောင်မြောက်တဲ့ ကြိုးပမ်းအားထုတ်မှုတွေကို သက်သေပြလိုက်တာပဲ ဖြစ်ပါတယ်။ သူတို့ဟာ အာဂျေးရဲ့ ခရီးလမ်းမှာ ကူညီပေးခဲ့ကြသလို အခုလို အံ့အားသင့်စရာ အောင်မြင်မှုမျိုးရအောင်လည်း ဝိုင်းဝန်းပံ့ပိုးပေးခဲ့ကြတာပါ။ ကမ္ဘာ့ဘောလုံးလောကမှာ အထင်ကရ အဖြစ်ဆုံး ကလပ်အသင်းနဲ့ အကယ်ဒမီတစ်ခုဆီကို သူ ခြေလှမ်းလှမ်းနိုင်ခဲ့တာကို မြင်တွေ့ရတဲ့အတွက် ကျွန်တော်တို့ထက် ပိုပြီး ဂုဏ်ယူမယ့်သူ ရှိမှာ မဟုတ်ပါဘူး" လို့လည်း ၎င်းက ပြောကြားခဲ့ပါတယ်။
ဒါ့အပြင် နက်ပါက "နိုင်ငံတကာအဆင့်မှာလည်း သူဟာ အင်္ဂလန် ယူ-၁၅၊ ယူ-၁၆ နဲ့ ယူ-၁၇ အသင်းတွေမှာ ကိုယ်စားပြု ကစားပေးခဲ့ပါတယ်။ ရှေ့လာမယ့်နှစ်တွေမှာလည်း ကလပ်အသင်းအတွက်ရော နိုင်ငံအသင်းအတွက်ပါ ပိုမိုကောင်းမွန်တဲ့ တိုးတက်မှုတွေ ဆက်ပြီး ရလာဦးမယ်ဆိုတာ ကျွန်တော်တို့ လုံးဝ ယုံကြည်ပါတယ်" လို့ ထပ်လောင်း ပြောကြားခဲ့ပါတယ်။
