ဘာစီလိုနာအသင်းဥက္ကဋ္ဌ ဂျုန်းလာပေါ်တာက ဇာဗီကို ရာထူးကနေ ထုတ်ပယ်ခဲ့တာဟာ စိတ်လိုက်မာန်ပါ ချက်ချင်းဆုံးဖြတ်ခဲ့တာမျိုး မဟုတ်ဘူးလို့ အခိုင်အမာ ပြောကြားလိုက်ပါတယ်။ လွန်ခဲ့တဲ့ နှစ်ရာသီတုန်းက ဇာဗီရဲ့ နုတ်ထွက်စာကို လာပေါ်တာက ငြင်းပယ်ခဲ့ဖူးပေမဲ့ အဲဒီနောက် သီတင်းပတ် အနည်းငယ်အကြာမှာပဲ ဇာဗီကို နည်းပြရာထူးကနေ ထုတ်ပယ်ခဲ့တာ ဖြစ်ပါတယ်။ဒီနေ့မနက်ပိုင်းမှာ Catalunya Radio နဲ့ ပြုလုပ်ခဲ့တဲ့ အင်တာဗျူးမှာ လာပေါ်တာက အခုလို ပြန်ပြောင်းပြောပြခဲ့ပါတယ်။ "မဟုတ်ပါဘူး၊ ဒါဟာ စိတ်လှုပ်ရှားမှုကြောင့် လုပ်ခဲ့တာ မဟုတ်ပါဘူး။ ကျွန်တော်က သူ့ကို အတွေ့အကြုံတွေ ပိုလိုသေးတယ်၊ ကျွန်တော် မသေချာဘူးလို့ ပြောခဲ့ဖူးပါတယ်။ အဲဒီတုန်းက သူက ကာတာမှာ အတွေ့အကြုံတွေ အများကြီး ရခဲ့ပြီလို့ ကျွန်တော့်ကို ပြန်ပြောခဲ့ပါတယ်။"

"နောက်ဆုံးမှာတော့ ကျွန်တော် သူ့ကို ယုံကြည်ခဲ့ပေမဲ့ အခြေအနေတွေက ဖြစ်သင့်သလို ဖြစ်မလာခဲ့ပါဘူး။ 'ဆူရှီ ဖြစ်ရပ်' ဆိုတာကတော့ ရယ်စရာ ဇာတ်လမ်းလေးတစ်ခုပါပဲ။ ဒါပေမဲ့ သူ့ရဲ့ စကားတွေက ပြောင်းလဲသွားပါတယ်။ အသင်းအပေါ် ယုံကြည်မှု ရှိရဲ့လားလို့ ကျွန်တော် မေးတဲ့အခါ သူက ၁၀၀ ရာခိုင်နှုန်း ယုံကြည်တယ်လို့ ဖြေခဲ့ပါတယ်။ ဒါက ကျွန်တော့်အတွက် အံ့သြစရာ ဖြစ်ခဲ့ရပါတယ်၊ ဘာလို့လဲဆိုတော့ သူ တစ်ရာသီလုံး ကျွန်တော့်ကို ပြောလာခဲ့တာတွေနဲ့ အခုပြောတာက ကွဲလွဲနေလို့ပါ။"

"အဲဒီနောက် နှစ်ပတ်အကြာမှာတော့ နောက်ထပ် နှစ်နှစ်လောက်အထိ အသင်းက ပြိုင်ဆိုင်နိုင်စွမ်း ရှိမှာမဟုတ်ဘူးလို့ သူက ပြောလာပါတယ်။ ဒါ့အပြင် (အားကစားဒါရိုက်တာ) ဒီကိုကလည်း ဇာဗီဟာ ကစားသမား ၁၀ ယောက်လောက်ကို အသစ်လဲလှယ်ချင်နေတယ်လို့ ကျွန်တော့်ကို လာပြောခဲ့ပါတယ်" လို့ လာပေါ်တာက ဖွင့်ဟခဲ့ပါတယ်။