နာပိုလီတိုက်စစ်မှူး ဆီမြွန်နီကို တိုရီနိုအသင်း အပြီးသတ်ခေါ်ယူ
ဂျီယိုဗာနီ ဆီမြွန်နီဟာ တိုရီနိုအသင်းရဲ့ ကစားသမားတစ်ဦး တရားဝင် ဖြစ်လာခဲ့ပြီ ဖြစ်ပါတယ်။ မနေ့ညက ဖီအိုရင်တီးနားနဲ့ ကစားခဲ့တဲ့ပွဲစဉ်ရဲ့ ဒုတိယပိုင်းမှာ သူဝင်ရောက်ကစားခဲ့တာကြောင့် နာပိုလီအသင်းဆီကနေ သူ့ကို အပြီးသတ်ဝယ်ယူရမယ့် စာချုပ်ပါအချက်ကို စတင်အသက်ဝင်စေခဲ့တာပါ။
အငှားစာချုပ်ပါ သတ်မှတ်ချက်အရ ဆောင်းရာသီအပြောင်းအရွှေ့ကာလ ပြီးဆုံးသွားတဲ့နောက် ဖေဖော်ဝါရီလအတွင်း ပထမဆုံးအကြိမ် ကွင်းထဲဝင်ကစားတာနဲ့ တစ်ပြိုင်နက် အလိုအလျောက် အပြီးသတ်ဝယ်ယူရမယ်လို့ ပါရှိတာကြောင့် အခုလို ဖြစ်လာခဲ့တာ ဖြစ်ပါတယ်။ အီတလီသတင်းဌာနတွေရဲ့ ဖော်ပြချက်အရ တိုရီနိုအသင်းဟာ နာပိုလီကို ပြောင်းရွှေ့ကြေး ယူရို ၆ သန်းအပြင် အပိုဆုကြေးတွေပါ ပေးချေရမှာ ဖြစ်ပါတယ်။ "El Cholito" လို့ အမည်ပြောင်ရထားတဲ့ ဆီမြွန်နီဟာ တိုရီနိုအသင်းနဲ့ ၂၀၂၈ ခုနှစ် ဇွန်လ ၃၀ ရက်နေ့အထိ စာချုပ်ချုပ်ဆိုမှာဖြစ်ပြီး နောက်ထပ်တစ်ရာသီ သက်တမ်းတိုးခွင့်လည်း ပါဝင်မှာ ဖြစ်ပါတယ်။
ဒီတိုက်စစ်မှူးဟာ ဇန်နဝါရီ ၁၃ ရက်နေ့က ကစားခဲ့တဲ့ ကိုပါအီတာလီယာပွဲစဉ်မှာ ရရှိခဲ့တဲ့ ဘယ်ဘက်ခြေထောက် ပွန်းပဲ့ဒဏ်ရာကြောင့် သုံးပတ်ကြာ အနားယူခဲ့ရပြီးနောက် အခုမှ ပြန်လည်ကစားနိုင်ခဲ့တာလည်း ဖြစ်ပါတယ်။
