တနင်္ဂနွေနေ့ညက ယှဉ်ပြိုင်ခဲ့တဲ့ ပရီးမီးယားလိဂ်ပွဲစဉ်မှာ မန်ချက်စတာယူနိုက်တက်ကို ၁-၁ နဲ့သရေကျပြီးနောက် ဖူလ်ဟမ်တိုက်စစ်ကြယ်ပွင့် အဲလက်ဇ်အီဝိုဘီက ယူနိုက်တက်ရဲ့အားနည်းချက်တွေကို ဘယ်လိုအသုံးချခဲ့သလဲဆိုတာ ဖွင့်ဟပြောကြားလာခဲ့ပါတယ်။ 
အဆိုပါပွဲစဉ်မှာ ယူနိုက်တက်ဟာ နောက်ခံလူ လန်နီယိုရိုရဲ့ခေါင်းတိုက်ချက်မှတစ်ဆင့် ရရှိလာခဲ့တဲ့ ဖူလ်ဟမ်တိုက်စစ်မှူး ရိုဒရီဂိုမူနစ်ဇ်ရဲ့ OG နဲ့ဦးဆောင်နိုင်ခဲ့ပေမယ့် လူစားဝင်ကစားသမား စမစ်သ်ရိုးရဲ့ ချေပဂိုးကြောင့် သရေရလဒ်နဲ့သာကျေနပ်ခဲ့ပြီး ယခုနှစ် ၂၀၂၅-၂၆ ရာသီအတွင်း ပထမဆုံးနိုင်ပွဲရရှိမယ့် အခွင့်အရေးနဲ့လွဲချော်ခဲ့ပါတယ်။ 
ဒါ့အပြင် ယူနိုက်တက်ဟာ ပထမပိုင်းမှာ ပင်နယ်တီပြစ်ဒဏ်ဘောရရှိခဲ့သေးပေမယ့် အသင်းခေါင်းဆောင် ဘရူနိုဖာနန်ဒက်စ်က ဂိုးဝင်အောင်ကန်သွင်းနိုင်ခဲ့ခြင်းမရှိဘဲ လွဲချော်ခဲ့တာကြောင့် နစ်နာခဲ့ရပါသေးတယ်။ ယခုအခါမှာ အီဝိုဘီက ဖူလ်ဟမ်ဟာ ယူနိုက်တက်ရဲ့ကွင်းလယ်ကစားသမားတွေဖြစ်တဲ့ ဖာနန်ဒက်စ်နဲ့ ကတ်စ်မဲရိုးတို့ကို ပစ်မှတ်ထားချဉ်းကပ်ခဲ့ပြီး ကွင်းလယ်ပိုင်း အသားစီးရယူနိုင်ဖို့ ကြိုးစားနိုင်ခဲ့တယ်လို့ ဆိုပါတယ်။
ပွဲအပြီးမှာ အီဝိုဘီက "ကျွန်တော်တို့မှာ ပြန်လာနိုင်ရမယ်ဆိုတဲ့ စိတ်ဓာတ်မျိုးရှိပါတယ်။ ပြီးတော့ လူစားဝင်ကစားသမားတွေက အသင်းကို ပိုကောင်းစေမယ်ဆိုတာ သိခဲ့ပါတယ်။ ဒါကြောင့် ယူနိုက်တက်လိုအသင်းကောင်းတစ်သင်းကို မရှုံးဘဲ သရေရအောင်ယူနိုင်မယ်လို့ ယုံကြည်ခဲ့ပါတယ်။ ဒီပွဲမှာ ယူနိုက်တက်ရဲ့နောက်တန်းကစားသမားတွေက ရှေ့ထိတက်ပြီး ဖိအားပေးဖို့ ကြိုးစားနေကြလို့ ကွင်းလယ်လူနှစ်ယောက်ကို ကျွန်တော်တို့ကျော်ဖြတ်နိုင်ရင် ဂိုးပြန်သွင်းနိုင်မယ်ဆိုတာကြိုသိခဲ့ပါတယ်။ ဒါကြောင့် ကွင်းလယ်ကိုအဓိကပစ်မှတ်ထားပြီး တိုက်စစ်ဆင်ခဲ့တာပါ" လို့ပြောကြားခဲ့ပါတယ်။
လာမယ့်ကြာသပတေးနေ့မှာတော့ ယူနိုက်တက်ဟာ ကာရာဘောင်ဖလား ဒုတိယအဆင့်ပွဲစဉ်အဖြစ် အင်္ဂလန်လိဂ်တူးကလပ် ဂရင်စ်ဘီနဲ့ ယှဉ်ပြိုင်သွားရမှာဖြစ်ပြီး ၂၀၂၅-၂၆ ဘောလုံးရာသီအတွင်း ပထဆုံးနိုင်ပွဲကို စတင်ရယူနိုင်ဖို့ မျှော်လင့်နေမှာဖြစ်ပါတယ်။ အဆိုပါပွဲစဉ်အပြီးမှာတော့ ရူဘင်အာမိုရင်ရဲ့အသင်းဟာ ပရီးမီးယားလိဂ်ပွဲစဉ်အဖြစ် ဘန်လေကို အိမ်ကွင်းအိုးလ်ထရက်ဖို့ဒ်မှာ ဧည်ခံကစားသွားရပါမယ်။