
ရာသီကုန်မှာ အက်သလက်တီကိုမှထွက်ခွာဖို့ ဆုံးဖြတ်ထားတဲ့ ဂရစ်ဇ်မန်း
အက်သလက်တီကိုတိုက်စစ်ကစားသမား အန်တိုနီဂရစ်ဇ်မန်းဟာ အသင်းနဲ့စာချုပ်သက်တမ်းတိုးဖို့ ဆန္ဒမရှိဘဲ ရာသီကုန်မှာ မက်ဒရစ်မြို့မှထွက်ခွာဖို့ ဆုံးဖြတ်ထားတယ်လို့ စပိန်သတင်းတွေက ဖော်ပြလာခဲ့ပါတယ်။
စပိန်ဂျာနယ်လစ်ရူဘင်အူလီယာရဲ့ အဆိုအရ ပြင်သစ်လက်ရွေးစင်ကစားသမားဟာ အက်သလက်တီကိုနဲ့ စာချုပ်သက်တမ်းတစ်နှစ်ကျန်ရှိနေသေးပေမယ့် တကယ်လို အသင်းဘက်ကသာ ရာသီကုန်မှာ လမ်းခွဲဖို့ဆုံးဖြတ်ခဲ့ရင် သူ့အနေနဲ့လည်း ငြင်းပယ်သွားမှာမဟုတ်ဘူးလို့ဆိုပါတယ်။
ကစားသမားအနေနဲ့ အသင်းအတွက် ဝန်ထုပ်ဝန်ပိုးမဖြစ်စေဘဲ အသင်းသစ်သို့ပြောင်းရွှေ့ကာ အသင်းရဲ့ ဘဏ္ဍာရေးကျပ်တည်းမှုကို အကူအညီပေးဖို့ ဆန္ဒရှိနေတာဖြစ်တယ်လို့ သိရပါတယ်။ လက်ရှိအချိန်မှာတော့ ဂရစ်ဇ်မန်းဟာ အက်သလက်တီကိုရဲ့ အကြီးတန်းအရာရှိတွေနဲ့ တွေ့ဆုံလိုနေပြီး အနာဂတ်အတွက် ဆွေးနွေးမှုတွေပြုလုပ်သွားလိုနေတာဖြစ်ပါတယ်။
အက်သလက်တီကိုဘက်ကလည်း ပြင်သစ်သားအနေနဲ့ အသင်းအတွက် ထိထိရောက်ရောက်အကျိုးမပြုနိုင်ဘူးဆိုရင်တော့ လက်လွှတ်ဖို့ဆန္ဒရှိနေပြီး လစာငွေပေးချေမှုကို ချွေတာလိုနေတာဖြစ်ပါတယ်။ လက်ရှိအချိန်မှာ အသင်းရဲ့တိုက်စစ်ကို ဂျူလီယန်အယ်လ်ဗာရက်ဇ်နဲ့ အလက်ဇန်းဒါး ဆာလို့သ်တို့ ထိထိရောက်ရောက်ကူညီထားနိုင်တာဖြစ်လို့ နောက်ရာသီမှာလည်း အက်သလက်တီကိုအနေနဲ့ အဆိုပါကစားသမား ၂ ဦးကို ဆက်လက်အားကိုးဖို့ ပြင်ဆင်ထားတာဖြစ်ပါတယ်။
တစ်ချိန်တည်းမှာပဲ ဂရစ်ဇ်မန်းအနေနဲ့ အက်သလက်တီကိုအတွက် အရန်ကစားသမားအဖြစ် နောက်တစ်ရာသီဆက်လက်ကစားပေးလိုမလားဆိုတာတော့ ရှင်းရှင်းလင်းလင်းမသိရှိရသေးပါဘူး။ ပြီးခဲ့တဲ့နွေရာသီက အက်သလက်တီကိုဟာ သူ့ရဲ့နောက်ဆုံးဥရောပကလပ်ဖြစ်နိုင်ကြောင်းကို ဂရစ်ဇ်မန်းက “ကျွန်တော့်ကို ကမ်းလှမ်းမှုတွေပြုလုပ်ခဲ့တဲ့ အသင်းတွေရှိပါတယ်။ ဒါပေမယ့် ကျွန်တော်ကတော့ အက်သလက်တီကိုမှာပဲ ဆက်နေချင်ပါတယ်။ ဒီကလပ်က ကျွန်တော့်ရဲ့နောက်ဆုံးဥရောပကလပ်ဖြစ်လာဖို့ မျှော်လင့်ပါတယ်” လို့ပြောကြားခဲ့ပါတယ်။
အဆိုပါပြောကြားချက်ကြောင့် မေဂျာလိဂ်ကလပ်တွေအနေနဲ့ ဂရစ်ဇ်မန်းကိုခေါ်ယူဖို့ ပစ်မှတ်ထားလာကြပြီး ကစားသမားရဲ့ စာချုပ်ဖျက်သိမ်းကြေးကလည်း ယူရို ၁၅ သန်းဝန်းကျင်သာရှိတာကြောင့် ကမ်းလှမ်းမှုတွေ ပြုလုပ်ထားနိုင်ချေရှိပါတယ်။
လက်ရှိအချိန်မှာတော့ ဂရစ်ဇ်မန်းဟာ အက်သလက်တီကိုအတွက် ခြေစွမ်းကောင်းတွေပြသထားနိုင်ပြီး ၄၂ ပွဲကစားထားရာမှာ ၁၆ ဂိုးသွင်း၊ ၇ ဂိုးဖန်တီးပေးထားနိုင်တာဖြစ်ပါတယ်။ လာမယ့်စနေနေ့မှာတော့ အက်သလက်တီကိုဟာ အက်စ်ပန်ညိုနဲ့ယှဉ်ပြိုင်သွားရမှာဖြစ်ပြီး ဂရစ်ဇ်မန်းအနေနဲ့ ဒီယေဂိုဆီမြွန်နီရဲ့အသင်းအတွက် ပွဲထွက်ပါဝင်ကစားသွားဖွယ်ရှိပါတယ်။