ဇာဗီ ဟာနန်ဒက်ဇ်ဟာ ပြီးခဲ့တဲ့ ရာသီကုန်မှာ ဘာစီလိုနာကနေ ထုတ်ပယ်ခံရပြီးကတည်းက အသင်းလက်မဲ့ဖြစ်နေတာပါ။ သူဟာ ဒီနွေရာသီမှာ နည်းပြလောကထဲ ပြန်ဝင်ဖို့ ပြင်ဆင်နေပေမယ့် လက်ရှိအချိန်မှာတော့ သူ့ရဲ့ ဥရောပရှိ ဒုတိယမြောက် ကလပ်က ဘယ်အသင်းဖြစ်လာမလဲဆိုတာ မသေချာသေးပါဘူး။

ဒီရာသီကို ဘာစီလိုနာနဲ့ စပိန်ဘောလုံး ဂန္ထဝင်တစ်ဦးအတွက် အနားယူတဲ့နှစ်လို့ သတ်မှတ်ထားချိန်မှာ ဇာဗီဟာ အမျိုးမျိုးသော ကလပ်တွေနဲ့ ပုံမှန် ချိတ်ဆက်ခံနေရပါတယ်။ သူက မီဒီယာတွေနဲ့ စကားပြောတာကိုလည်း ရှောင်ခဲ့ပေမယ့် ဒီအပတ်မှာ France Football နဲ့ အင်တာဗျူး ပြုလုပ်ခဲ့ပါတယ်။ သူက နွေရာသီကစလို့ နည်းပြလောကကို ပြန်ဝင်ဖို့ မည်သည့် သဘောတူချက်မှ မရှိသေးကြောင်း အတည်ပြုခဲ့ပြီး ဖြစ်နိုင်ခြေ အားလုံးကို လမ်းဖွင့်ထားတယ်လို့ ဆိုပါတယ်။ အဲဒီထဲမှာ ဘာစီလိုနာ မဟုတ်ရင်တောင်မှ လာလီဂါမှာ ထပ်မံနည်းပြဖို့လည်း ပါဝင်နေပါတယ်။

"ကျွန်တော် ဘာမှ စီစဉ်မထားသေးဘူး လမ်းဖွင့်ထားပါတယ်။ ဘာကြောင့် လာလီဂါမှာ တခြားအသင်းကို နည်းပြမလုပ်ရမှာလဲ။ ကျွန်တော် စိတ်လှုပ်ရှားစရာ စီမံကိန်းတစ်ခုကို ရှာနေတယ် ဆုဖလားတွေ ရဖို့ ရည်မှန်းချက်လည်း ရှိပါတယ်။ ဒါက အဓိက ရည်ရွယ်ချက်ပါ။ မတူကွဲပြားတဲ့ ကမ်းလှမ်းမှုတွေကို ကျွန်တော် နားထောင်ပါမယ်" လို့ ဇာဗီက ပြောပါတယ်။

အင်တာဗျူးအတွင်း ဇာဗီက သူ့ရဲ့ အနားယူချိန်မှာ ဘောလုံးပွဲစဉ်တွေ အများကြီး ကြည့်ခဲ့တယ်လို့ ပြောကြားခဲ့ပြီး အဲ့ဒီထဲမှာ လီဂူးဝမ်း အသင်းတွေလည်း ပါဝင်နေပါတယ်။ သူက ပြင်သစ်ဘောလုံးလောကအကြောင်းကို ဆွေးနွေးခဲ့ပြီး အဲဒီမှာ ပီအက်စ်ဂျီ ရင်ဆိုင်ရတာရဲ့ အခက်အခဲမှု ဦးတည်ပြောကြားခဲ့ပါတယ်။ "ဒီရာသီမှာ ကျွန်တော် အဓိက ကြည့်ခဲ့တာက ချန်ပီယံလိဂ်မှာ ယှဉ်ပြိုင်နေတဲ့ ပြင်သစ်ကလပ်တွေနဲ့ မာဆေးလ်ပါ။ ပီအက်စ်ဂျီနဲ့ ယှဉ်ပြိုင်ရတာ ခက်ခဲပါတယ်။ သူတို့မှာ အံ့သြဖွယ် စီမံကိန်းနဲ့ ထူးချွန်တဲ့ အသင်းတစ်သင်း ရှိပါတယ်။ လူးဝစ် အင်းနရစ်က low block ကို ခုခံကစားဖို့ ဘယ်လို အဖြေရှာဖွေမှုတွေ လုပ်သလဲဆိုတာနဲ့ ဒေသတွင်း လိဂ်မှာ အလွန်သာလွန်တဲ့ ဘောလုံးပိုင်ဆိုင်မှုနဲ့အတူ ဒါကို ကြည့်ရတာ စိတ်ဝင်စားစရာပါ" လို့ ဇာဗီက ပြောပါတယ်။

ဇာဗီရဲ့ ဘောလုံးလောကထဲက နောက်အလုပ်က ဘယ်မှာဖြစ်မလဲဆိုတာ ကြည့်ရတာ အလွန်စိတ်ဝင်စားစရာ ဖြစ်ပါလိမ့်မယ်။ သူက ဘာစီလိုနာရဲ့ နည်းပြချုပ်အဖြစ် တာဝန်ထမ်းဆောင်စဉ်မှာ အများစုက သဘောကျစရာ ဖြစ်ခဲ့ပေမယ့် ထုတ်ပယ်ခံရတဲ့အချိန်မှာ ဆက်လက် ရှေ့ဆက်ဖို့ အချိန်တန်ပြီဆိုတာ သိသာခဲ့ပါတယ်။