ယာဉ်တိုက်မှုကြောင့် ခွဲစိတ်ကုသမှုခံယူခဲ့ရပြီးနောက် အနည်းဆုံး ၁ နှစ်ခန့်အနားယူသွားရမယ့် အန်တိုနီယို
ဝက်စ်ဟမ်းတိုက်စစ်မှူး အန်တိုနီယိုဟာ ယာဉ်တိုက်မှုကြောင့် ခြေထောက်ကျိုးသွားခဲ့ပြီးနောက် တနင်္ဂနွေနေ့မှာ ခွဲစိတ်ကုသမှုခံယူခဲ့ရလို့ ဘောလုံးကစားခြင်းမှ အနည်းဆုံး ၁ နှစ်ခန့်အနားယူသွားရမယ်လို့သိရပါတယ်။
ကစားသမားဟာ စနေနေ့မှာ ယာဉ်မတော်တဆဖြစ်ခဲ့ပြီး ဒဏ်ရာပြင်းထန်ခဲ့တာကြောင့် တနင်္ဂနွေနေ့မှာပဲ ခွဲစိတ်မှုပြုလုပ်ဖို့လိုအပ်ခဲ့ကြောင်း ဝက်စ်ဟမ်းအသင်းက တရားဝင်ထုတ်ပြန်ခဲ့ပါတယ်။ ဂျမေကာလက်ရွေးစင်ဟာ ခြေထောက်အောက်ပိုင်း ထိခိုက်မှုပြင်းထန်ခဲ့တယ်လို့ သိရပေမယ့် တိကျတဲ့ဆေးမှတ်တမ်းကိုတော့ ဝက်စ်ဟမ်းဘက်က ထုတ်ပြန်ထားခြင်းမရှိသေးပါဘူး။
သတင်းတွေအရ အသက်-၃၄ နှစ်အရွယ်ကစားသမားဟာ အနည်းဆုံး ၁ နှစ်ခန့်အနားယူသွားရမှာဖြစ်လို့ လက်ရှိ ၂၀၂၄-၂၅ ရာသီလက်ကျန်ပွဲစဉ်တွေအားလုံးကို လွဲချော်သွားမယ့်အပြင် ပြန်လည်ထူထောင်ရေးလုပ်ငန်းတွေလုပ်ဖို့အတွက်လည်း ၁ နှစ်ခန့်ထပ်မံအချိန်ယူသွားရဦးမယ်လို့သိရပါတယ်။ အချို့ကလည်း အန်တိုနီယိုအနေနဲ့ အချိန်အတော်ကြာ အနားယူသွားရမှာဖြစ်တာကြောင့် စိတ်ဓာတ်ပိုင်းကျဆင်းပြီး ကစားသမားဘဝကနေ အပြီးအပိုင် အနားယူသွားနိုင်ချေရှိတယ်လို့လည်း ယူဆနေကြပါတယ်။
အန်တိုနီယိုဟာ ဒီရာသီမှာဝက်စ်ဟမ်းရဲ့ အဓိက ကစားသမားအဖြစ် ရပ်တည်ထားပြီး ပွဲစဉ်တိုင်းမှာ ပါဝင်ကစားခွင့်ရထားတာလည်းဖြစ်ပါတယ်။ လက်ရှိအချိန်မှာတော့ ကစားသမားဟာ ဆေးရုံမှာရောက်ရှိနေပြီး တတ်နိုင်သလောက် ပြန်လည်ထူထောင်ရေးလုပ်ငန်းတွေပြုလုပ်ဖို့ မျှော်လင့်နေမှာဖြစ်ပါတယ်။
တနင်္လာနေ့မှာတော့ ဝက်စ်ဟမ်းဟာ ပရီးမီးယားလိဂ်ပွစဉ်အဖြစ် ဝုဗ်ကို အိမ်ကွင်းမှာ ဧည့်ခံကစားသွားရမှာဖြစ်ပြီး ပွဲမစမီမှာ အန်တိုနီယိုရဲ့ ဒဏ်ရာကို အမြန်ဆုံးပြန်လည်သက်သာလာစေဖို့ ဆုတောင်းပွဲအခမ်းအနား ကျင်းပသွားဖွယ်ရှိပါတယ်။
