ဒီနေ့မနက်ပိုင်း၊ ရိန်းဂျားစ်နဲ့ တစ်ဖက်တစ်ဂိုးစီသရေကျခဲ့တဲ့ ယူရိုပါလိဂ်ပွဲစဉ်အတွင်း ပထမပိုင်းပွဲချိန်အပြီးမှာပင် လူစားလဲလှယ်ခဲ့ရတဲ့ တိုက်စစ်မှူးတီမိုဝါနာရဲ့စွမ်းဆောင်ရည်ပိုင်းကို တော့တင်ဟမ်နည်းပြပိုစတီကိုဂလူက ဝေဖန်ပြစ်တင်ခဲ့ပါတယ်။ သတင်းထောက်တွေနဲ့တွေ့ဆုံချိန် ပိုစတီကိုဂလူက “ရှိသင့်ရှိထိုက်တဲ့အဆင့်အတန်းမျိုးနဲ့ အနီးစပ်ဆုံးအထိတောင် သူ မစွမ်းဆောင်နိုင်ခဲ့ပါဘူး။ တီမိုဝါနာရဲ့ပထမပိုင်းစွမ်းဆောင်ရည်မျိုးကို ကျွန်တော် ဘယ်လိုမှ လက်သင့်ခံပေးလို့ မရပါဘူး။

သူက ဂျာမနီလက်ရွေးစင်ကစားသမားတစ်ဦးဖြစ်တယ်ဆိုတာနဲ့ တစ်ဦးချင်းဆီမှ အကောင်းဆုံးစွမ်းဆောင်ရည်တွေ လိုအပ်နေပုံကို ကျွန်တော် တီမိုဝါနာဆီ ပြောပြခဲ့ပါတယ်။ ဒါက လက်သင့်ခံနိုင်စရာစံနမူနာပြပုံစံမျိုး မဟုတ်ပါဘူး”လို့ ပြောပါတယ်။ ဒါကြောင့်ပဲ တီမိုဝါနာရဲ့နေရာမှာ ကူလူဆက်ဗ်စကီးကို ပိုစတီကိုဂလူက လူစားလဲလှယ်ခဲ့ပါတယ်။ အဆုံးမှာ ကူလူဆက်ဗ်စကီးက တော့တင်ဟမ်အတွက် သွင်းဂိုးတစ်ဂိုးရယူပြီး Ibrox ကွင်းကြီးအတွင်း ပွဲချိန်အများစုမှာ ပိုမိုကောင်းမွန်တဲ့ကစားပုံမျိုး ပြသနေတဲ့ ရိန်းဂျားစ်အတွက် အီဂါမာနေးရဲ့ဦးဆောင်ဂိုးကို ပြန်လည်ချေပနိုင်ခဲ့ပါတယ်။

အခုသီတင်းပတ်အစောပိုင်းမှာ ချဲလ်ဆီးကို ရှုံးနိမ့်ပြီးနောက် သုံးပွဲဆက်အရှုံးနဲ့ ရှောင်လွှဲနိုင်ခဲ့ပေမယ့် သြစတြေးလျသားနည်းပြကတော့ သူ့အသင်းရဲ့စွမ်းဆောင်ရည်ပိုင်းနဲ့ပတ်သက်လို့ မပျော်ရွှင်နိုင်ခဲ့ပါဘူး။ ပိုစတီကိုဂလူက “စီနီယာကစားသမားတွေဆီမှ အခုထက်ပိုပြီး မျှော်လင့်မိခဲ့ပေမယ့် ကျွန်တော်တို့အသင်းရဲ့ အကောင်းဆုံးအဆင့်အတန်းနဲ့ အနီးစပ်ဆုံးဖြစ်အောင်တောင် မစွမ်းဆောင်နိုင်ခဲ့ပါဘူး။ မျှမျှတတပြောရမယ်ဆိုရင် လက်ရှိအခိုက်အတန့်မှာ ကျွန်တော်တို့အသင်းကိုယ်တိုင်လည်း ပွဲကျပ်ကာလတစ်ခု ဖြတ်သန်းနေရပါတယ်။ ဒါပေမယ့် ဆက်စပ်စဉ်းစားကြည့်မယ်ဆိုရင် ဥရောပအဆင့်မှာ ကျွန်တော်တို့ ရောက်ရှိနေတဲ့နေရာနဲ့ ကျွန်တော်တို့အသင်းလူစာရင်းပိုင်းကို ဒဏ်ရာပြဿနာတွေက အတော်လေးဒုက္ခပေးနေပြီး အားအင်တွေကုန်ခန်းသွားစေပါတယ်။ ဒါက အရေးကြီးတဲ့အချက်တစ်ခုပါ”လို့ ဆက်ပြောပါတယ်။

လတ်တလောမှာ တော့တင်ဟမ်က ယူရိုပါလိဂ်အုပ်စုအဆင့် အမှတ်ပေးဇယားရဲ့ အဆင့်ကိုးနေရာမှာ ရပ်တည်နေပြီး ရှုံးထွက်အဆင့်တိုက်ရိုက်တက်ရောက်နိုင်ဖို့ ထိပ်ဆုံးအသင်းရှစ်ခုစာရင်းမှာ ပါဝင်နိုင်ရန် မျှော်မှန်းနေပါလိမ့်မယ်။ ရိန်းဂျားစ်ရဲ့မဟာပြိုင်ဘက်ကြီးဆဲလ်တစ်ကို နှစ်နှစ်ကြာ တာဝန်ယူပေးခဲ့ဖူးပြီး မစိမ်းလှတဲ့ ပတ်ဝန်းကျင်တစ်ခုဆီ ပြန်လည်ရောက်ရှိလာတဲ့ ပိုစတီကိုဂလူက သူ့ရဲ့လူစားလဲလှယ်မှုတွေနဲ့ ခက်ခဲကြမ်းတမ်းတဲ့အခြေအနေတစ်ခုအောက်မှာ အသင်းရဲ့တုံ့ပြန်သွားပုံတွေကို ချီးကျူးပြောဆိုခဲ့ပါတယ်။

သူက “ Ibrox ကွင်းကြီးရဲ့ဥရောပအဆင့်ညချမ်းတွေမှာ ရိန်းဂျားစ်ကို ရင်ဆိုင်ဖို့ဆိုတာ ခက်ခဲပါတယ်။ ပြိုင်ပွဲရဲ့ သဘောသဘာဝနဲ့ ကွင်းကြီးရဲ့အငွေ့အသက်တွေအောက် ဒီနေရာမှာ နိုင်ပွဲတစ်ခုရယူဖို့ဆိုတာ အသင်းတော်တော်များများအတွက် မဖြစ်နိုင်ပါဘူး။ ဒါကြောင့် ခက်ခဲကြမ်းတမ်းတဲ့ပွဲစဉ်တစ်ခု ဖြစ်လာလိမ့်မယ်လို့ မျှော်လင့်ထားရပါမယ်။

ပထမပိုင်းပွဲချိန်အပြီး သူတို့တွေ ဦးဆောင်ဂိုးသွင်းယူလိုက်ချိန်မှာပဲ ခွန်အားတွေ သိသိသာသာမြင့်တက်လာခဲ့ပြီး ပြန်လာနိုင်ဖို့ခက်ခဲတဲ့လမ်းတစ်ခု ဖြစ်သွားပါတယ်။ ဒါပေမယ့် ကျွန်တော်တို့အသင်းကလည်း အကောင်းဆုံးပုံစံနဲ့ ပြန်လာအောင် လုပ်ဆောင်နိုင်ခဲ့တယ်လို့ တွေးမိခဲ့ပါတယ်။

လူစားလဲလှယ်မှုတွေက မတူကွဲပြားမှုတစ်ခုကို ဖန်တီးပေးပြီး အရမ်းကောင်းတဲ့သွင်းဂိုးကို သွင်းယူနိုင်ခဲ့တယ်လို့ ထင်ပါတယ်။  အဆုံးမှာတော့ ဖော်စတာရဲ့ကောင်းမွန်တဲ့ဂိုးပေါက်ကာကွယ်မှုတစ်ခုနဲ့အတူ အခြားအခိုက်အတန့်ကောင်းတွေလည်း ရှိခဲ့ပါတယ်”လို့ ပြောပါတယ်။