မန်ချက်စတာယူနိုက်တက်ဟာ အက်စတွန်ဗီလာမှာ အငှားစာချုပ်နဲ့သွားရောက်ကစားနေတဲ့ အသင်းရဲ့တောင်ပံကစားသမား မားကပ်စ်ရက်ရှ်ဖို့ဒ်ကို အိုးလ်ထရက်ဖို့ဒ်သို့ ပြန်လည်ခေါ်ယူတော့မှာမဟုတ်ဘဲ အပြီးသတ်ရောင်းချဖို့ ဆုံးဖြတ်ထားပြီး အက်စတွန်ဗီလာထံမှ ပြောင်းရွှေ့ကြေး ပေါင်သန်း ၆၀ တောင်းဆိုထားတယ်လို့ သတင်းတွေကဖော်ပြလာခဲ့ပါတယ်။ 

ပြီးခဲ့တဲ့ဇန်နဝါရီအပြောင်းအရွှေ့ကာလမှ ငယ်ဘဝကလပ် ယူနိုက်တက်ကိုစွန့်ခွာဖို့ဆုံးဖြတ်ပြီး အူနိုင်းအမ်မရီရဲ့အသင်းသို့ပြောင်းရွှေ့သွားခဲ့တဲ့ ရက်ရှ်ဖို့ဒ်ဟာ အက်စတွန်ဗီလာအတွက် ပြိုင်ပွဲစုံ ၉ ပွဲကစားထားရာမှာ ဂိုးဖန်တီးမှု ၄ ကြိမ်အထိပြုလုပ်ထားပြီး ခြေစွမ်းပြသကစားပေးထားနိုင်ပါတယ်။  ရက်ရှ်ဖို့ဒ်အနေနဲ့ ယူနိုက်တက်မှမထွက်ခွာခင်မှာ အသင်းရဲ့နည်းပြ ရူဘင်အာမိုရင်နဲ့ သဘောထားကွဲလွဲမှုတွေရှိခဲ့ပြီး အသက်-၂၇ နှစ်အရွယ်ကစားသမားရဲ့ လေ့ကျင့်ရေးကွင်းစွမ်းဆောင်ရည်ကို အာမိုရင်က သဘောမကျကြောင်း ထုတ်ဖော်ပြောကြားကာ လူစာရင်းမှ ကာလရှည်ချန်လှပ်ခဲ့ပါတယ်။ ယခုအခါမှာလည်း အာမိုရင်အနေနဲ့ အင်္ဂလန်လက်ရွေးစင်ကို အသင်းသို့ပြန်လည်ခေါ်ယူဖို့စိတ်ကူးမရှိဘဲ အပြီးသတ်ရောင်းချဖို့သာ စိတ်အားထက်သန်နေတယ်လို့သိရပါတယ်။ 

ယူနိုက်တက်ဘက်က ရက်ရှ်ဖို့ဒ်အတွက် ပေါင်သန်း ၆၀ အလိုရှိနေပေမယ့် ဇန်နဝါရီမှာချုပ်ဆိုထားတဲ့ အငှားစာချုပ်ထဲမှာတော့ အပြီးသတ်ဝယ်ယူခွင့်ကို ပေါင်သန်း ၄၀ သာသတ်မှတ်ထားတာဖြစ်ပါတယ်။ ရက်ရှ်ဖို့ဒ်ရဲ့ထွက်ခွာခြင်းနဲ့ပတ်သက်ပြီး မေးမြန်းမှုပြုလုပ်ခဲ့ရာမှာ အာမိုရင်က တိုက်စစ်ကစားသမားဟာ သူ့ရဲ့စိတ်ကြိုက်ခြေစွမ်းမျိုး ပြသနိုင်ခြင်းမရှိကြောင်း ပြောကြားခဲ့ပါတယ်။  ပေါ်တူဂီသားနည်းပြက “ကျွန်တော့်အမြင်မှာတော့ သူက ကျွန်တော်လိုချင်တဲ့ပုံစံမှာမရှိပါဘူး။ သူ့ရဲ့လေ့ကျင့်ရေးအစီအစဉ်တွေက ကျွန်တော့်လိုချင်တဲ့အနေအထားမဟုတ်ပါဘူး။ ကစားသမားတစ်ယောက်က နည်းပြတစ်ယောက်ရဲ့စိတ်ကြိုက်ဖြစ်နိုင်ပေမယ့် အဲဒီကစားသမားက အခြားနည်းပြရဲ့မျက်လုံးထဲမှာတော့ စိတ်ကြိုက်ဖြစ်ချင်မှဖြစ်မှာပါ။ ရက်ရှ်ဖို့ဒ်နဲ့ အူနိုင်းအမ်မရီတို့ အချိတ်အဆက်ကောင်းကောင်းလုပ်နိုင်ကြပါစေလို့ ဆုတောင်းပါတယ်။ သူကအရမ်းကောင်းတဲ့ ကစားသမားတစ်ယောက်ပါ။ လောလောဆယ်မှာတော့ ကျွန်တော့်အနေနဲ့ အသင်းရဲ့ကစားသမားတွေအပေါ်မှာပဲ အာရုံစိုက်သွားရပါမယ်” လို့ပြောကြားခဲ့ပါတယ်။