အခုသီတင်းပတ်ကုန်၊ နော်တင်ဟမ်ဖောရက်စ်နဲ့ရင်ဆိုင်ရမယ့် ပရီးမီးယားလိဂ်ပွဲစဉ်မတိုင်ခင် ပက်ဂွါဒီယိုလာက မန်စီးတီးအနေဖြင့် ရာသီကုန်၊ ချန်ပီယံလိဂ်ဝင်ခွင့်ရရှိရေးအတွက် ဆက်လက်တိုက်ပွဲဝင်သွားရလိမ့်မယ်လို့ ပြောကြားခဲ့ပါတယ်။ စီးတီးဂရောင်းကွင်းမှာကစားမယ့် အခုသီတင်းပတ်အတွက် အစောဆုံးပရီးမီးယားလိဂ်ပွဲစဉ်က အမှတ်ပေးဇယားစတုတ္ထနေရာရှိအသင်းကို အမှတ်ပေးဇယားတတိယနေရာရှိအသင်းက ဧည့်ခံကစားမယ့် ပွဲစဉ်တစ်ခုဖြစ်ပါတယ်။

ဒီပွဲစဉ်မှာသာ အနိုင်ရလဒ်ဖော်ဆောင်နိုင်မယ်ဆိုရင် မန်စီးတီးအသင်းက လိဂ်ထိပ်ဆုံးသုံးသင်းစာရင်းဆီ ပြန်လည်ဝင်ရောက်လာပြီး ချန်ပီယံလိဂ်ဝင်ခွင့် ၁၅ ရာသီဆက်ရရှိနိုင်ရေးအတွက် အခွင့်အလမ်းကောင်းတွေ ပိုင်ဆိုင်သွားပါလိမ့်မယ်။ မန်စီးတီးနည်းပြကိုယ်တိုင်လည်း ဒီပစ်မှတ်အပေါ် လုံးဝအာရုံစိုက်နေပြီး ၂၀၂၄-၂၀၂၅ ဘောလုံးရာသီမှာ အစွမ်းကုန်တောက်ပနေတဲ့ နူနိုဆန်းတို့စ်ရဲ့အသင်းကို အကောင်းဆုံးယှဉ်ပြိုင်နိုင်ဖို့ ကြိုးစားနေပါတယ်။

သောကြာနေ့သတင်းစာရှင်းလင်းပွဲအတွင်း ပက်ဂွါဒီယိုလာက “အရှိတရားကို ကျွန်တော်တို့ လက်ခံသွားရပါမယ်။ ကျွန်တော်တို့အတွက် အရှိတရားက ရာသီကုန်မှာ အမှတ်ပေးဇယားထိပ်ဆုံးလေးသင်းစာရင်းဝင်ဖြစ်အောင် ကြိုးစားသွားဖို့ပဲ ဖြစ်ပါတယ်။ မနက်ဖြန်ပွဲစဉ်မှာဆိုရင် အမှတ်ပေးဇယားတတိယနေရာဆီ တက်လှမ်းနိုင်မယ့် အခွင့်အလမ်းတစ်ရပ် ကျွန်တော်တို့အတွက် ရှိနေပါတယ်။ ဒီအခွင့်အလမ်းကို အမိအရဆုပ်ကိုင်နိုင်ဖို့လည်း အခွင့်အရေးရှိနေပါတယ်။

ဒီပစ်မှတ်အတွက် တိုက်ပွဲဝင်နေတဲ့ ကလပ်အသင်းများစွာ ရှိပါတယ်။ လူတိုင်းကလည်း လာမယ့်ရာသီ၊ ချန်ပီယံလိဂ်ပြိုင်ပွဲဝင်ခွင့်ရရှိဖို့ လိုလားကြပါတယ်။ ဒါက ဂုဏ်သိက္ခာပိုင်းနဲ့လည်း သက်ဆိုင်သလို နှစ်ပေါင်းများစွာ စီးပွားရေးအရ ရေရှည်တည်တံ့နိုင်ဖို့အတွက်လည်း ဖြစ်ပါတယ်။ ကျွန်တော်တို့လည်း ချန်ပီယံလိဂ်ဝင်ခွင့် ရရှိချင်ပါတယ်။ ဒီအတိုင်းမဖြစ်လာဘူးဆိုရင် ကျွန်တော်တို့အသင်း ညံ့ဖျင်းလို့သာဖြစ်ပြီး အခြားပြိုင်ဘက်တွေက ချန်ပီယံလိဂ်ဝင်ခွင့်နဲ့ ထိုက်တန်လို့ပါပဲ။

အခုလိုတစ်ပွဲချင်းသွားရမယ့်ပွဲစဉ်မှာ မသေချာမရောမှုတွေက အဆုံးအဖြတ်ပေးသွားနိုင်ပါတယ်။ ပရီးမီးယားလိဂ်မှာ အသင်းတိုင်းက ၃၈ ပွဲထက်မနည်းကစားရပြီး လုံလောက်မျှတမှုရှိပါတယ်။ ရလဒ်တွေကသာ ကိုယ်ရောက်ရှိမယ့်နေရာကို ညွှန်ပြပေးပါတယ်။ ကျွန်တော်တို့ စိတ်ကူးမထားတဲ့နေရာတစ်ခုမှာရောက်ရှိနေတယ်ဆိုပေမယ့် သိပ်တော့လည်း မဆိုးလှပါဘူး။ အခွင့်အရေးက ကျွန်တော်တို့လက်ထဲမှာရှိနေပြီး ဒီအတွက် ဆက်လက်တိုက်ပွဲဝင်သွားရပါလိမ့်မယ်”လို့ ပြောပါတယ်။