မန်စီးတီးနည်းပြပက်ဂွါဒီယိုလာက အဓိက ကစားသမားနှစ်ဦးရဲ့အနာဂတ်နဲ့ပတ်သက်ပြီး ထုတ်ဖော်ပြောဆိုလိုက်ပါတယ်။ လတ်တလောမှာ ပက်ဂွါဒီယိုလာဆီ ဒီဘရိုင်း၊ အယ်လ်ဗာရက်ဇ်တို့ရဲ့အနာဂတ် ဝေးဝါးနေပြီလားဆိုတဲ့ မေးခွန်းတစ်ခု ရောက်ရှိလာခဲ့ပါတယ်။

စပိန်သားနည်းပြက ဒီကစားသမားနှစ်ဦးလုံး အသင်းမှာ ရေရှည်ဆက်ရှိနေလိမ့်မယ်လို့ အာမ,မခံခဲ့ပေမယ့် သူတို့နှစ်ဦးအတွက် ကမ်းလှမ်းမှုတစုံတရာ မရရှိသေးပါဘူးလို့ ပြောလာပါတယ်။

ဘယ်လ်ဂျီယံသားဒီဘရိုင်းနဲ့ပတ်သက်လို့ ပက်က “အသင်းဘက်ကတော့ ကျွန်တော့်ဆီ ဒီဘရိုင်းနဲ့ပတ်သက်ပြီး ကမ်းလှမ်းမှုမရှိသေးဘူးလို့ သတင်းပေးလာပါတယ်။ ဘာတွေဖြစ်လာမလဲဆိုတာ ကျွန်တော်လည်း မသိပါဘူး။ ဒါပေမယ့် ကျွန်တော်ကတော့ ဒီဘရိုင်းကို အသင်းမှာ ဆက်ရှိစေချင်ပါတယ်။ အသင်းဆီ ကျွန်တော် မရောက်လာခင်ကတည်းက ဒီဘရိုင်းက အသင်းမှာ ရှိနေခဲ့တာပါ။ သူက အသင်းရဲ့ဝါရင့်ကစားသမား ဖြစ်ပါတယ်။ ဥပမာအားဖြင့် ဒေးဗစ်ဆေးလ်ဗားနဲ့ အခြားကစားသမားတွေလည်း ဒီလိုပဲဖြစ်ဖူးပါတယ်။ သူ့မှာ အနာဂတ်နဲ့ပတ်သက်လို့ ကိုယ်တိုင်ဆုံးဖြတ်ပိုင်ခွင့်ရှိပါတယ်။ ကျွန်တော်တို့အတွက် ဒီဘရိုင်းလုပ်ပေးခဲ့တဲ့ အရာတွေက တန်ဖိုးကြီးမားပါတယ်။ ဒါကြောင့် သူကိုယ်တိုင်ပဲ ဆုံးဖြတ်ပါစေ။ လက်ရှိအချိန်အထိ ကျွန်တော့်မှာရှိနေတဲ့သတင်းအချက်အလက်ကတော့ သူ ဆက်ရှိနေလိမ့်မယ်ဆိုတာပါပဲ”လို့ ပြောပါတယ်။

ဆက်လက်ပြီး အယ်လ်ဗာရက်ဇ်ရဲ့အနာဂတ်နဲ့ပတ်သက်လို့ ပက်က “သူ့နေရာမှာ အစားထိုးမယ့် ကစားသမား အကြောင်း ကျွန်တော် မစဉ်းစားထားပါဘူး။ အနာဂတ်နဲ့ပတ်သက်လို့ သူတွေးရလိမ့်မယ်လို့ ပြောခဲ့တာကို ကျွန်တော်သိပါတယ်။ အယ်လ်ဗာရက်ဇ်စဉ်းစားပြီးရင်တော့ သူ့ရဲ့အေးဂျင့်က အသင်းဆီ ပြန်ဆက်သွယ်လာပါလိမ့်မယ်။ ဘာတွေဖြစ်လာမလဲဆိုတာ စောင့်ကြည့်သွားကြတာပေါ့။ ပွဲကြီးပွဲကောင်းတွေမှာ သူကစားချင်တယ်ဆိုတာ ကျွန်တော်သိပါတယ်။ ဒါပေမယ့် အခြားကစားသမားတွေလည်း ကစားချင်ကြတာပါပဲ။ ကျွန်တော်တို့မှာ ပွဲကြီးပွဲကောင်းတွေကစားချင်ကြတဲ့ ကစားသမား ၁၈ ဦး၊ ၁၉ ဦးလောက် ရှိပါတယ်။ အယ်လ်ဗာရက်ဇ်အနေနဲ့ စဉ်းစားရဦးမယ်ဆိုတဲ့အကြောင်း ကျွန်တော် ဖတ်ဖြစ်ခဲ့ပါတယ်။ ဒါကြောင့် အနာဂတ်အကြောင်း ဆက်စဉ်းစားပါစေဦး၊ အိုကေပါပဲ။ ဒီနောက်မှာတော့ သူဘာလုပ်ချင်တယ်ဆိုတဲ့အကြောင်း ကျွန်တော်တို့ဆီ သတင်းပို့လာပါလိမ့်မယ်”လို့ ပြောပါတယ်။