လတ်ဗီးယားနဲ့ရင်ဆိုင်ရမယ့် အင်္ဂလန်အသင်းရဲ့ပွဲစဉ်မတိုင်ခင် သောမတ်စ်တူချယ်က ဘယ်ကစားသမားကိုမှ ချန်လှပ်သွားမှာမဟုတ်ဘူးလို့ပြောဆိုကာ ရက်ရှ်ဖို့ဒ်နဲ့ ဖိုဒန်တို့အတွက် အာမခံချက်ပေးအပ်ခဲ့ပါတယ်။

စွမ်းဆောင်ရည်ပိုင်းနိမ့်ကျနေတဲ့ကစားသမားတွေကို အလဲအလှယ်ပြုလုပ်သွားဖို့ တောင်းဆိုနေချိန်မှာပဲ လတ်ဗီးယားနဲ့ပွဲစဉ်မှာ သူ့အသင်းကို အပြောင်းအလဲပြုလုပ်သွားဖို့မရှိဘူးလို့ အင်္ဂလန်နည်းပြသစ်က အလျှင်အမြန်အတည်ပြုပေးခဲ့ပါတယ်။ တူချယ်က အခုသီတင်းပတ်အတွင်း အသင်းရှေ့မှောက် ရက်ရှ်ဖို့ဒ်၊ ဖိုဒန်တို့နဲ့အတူ စကားပြောဆိုခဲ့ပြီး အင်္ဂလန်လက်ရွေးစင်ကစားသမားတွေဆီမှ သူမျှော်လင့်ထားတဲ့ စံချိန်စံနှုန်းတွေအကြောင်း ဒီကစားသမားနှစ်ဦးလုံး နားလည်သွားကြပြီလို့ သတင်းထောက်တွေဆီ ရှင်းလင်းပြောဆိုခဲ့ပါတယ်။ 

ကစားသမားနှစ်ဦးလုံးက အခုဘောလုံးရာသီကို အတက်အကျများစွာနဲ့အတူ ဖြတ်သန်းခဲ့ပြီး မကြာမီမှာပဲ သူတို့အတွက် ဖိအားတွေ ရောက်ရှိလာလိမ့်မယ်ဆိုတာ နားလည်ထားကြပါတယ်။ လတ်ဗီးယားနဲ့ပွဲစဉ်မတိုင်ခင် သတင်းစာရှင်းလင်းပွဲအတွင်း တူချယ်က “ အသင်းရှေ့မှောက်မှာပဲ သူတို့နှစ်ဦးလုံးနဲ့ ကျွန်တော် စကားပြောခဲ့ပြီးပါပြီ။ ဘောလုံးပိုင်ဆိုင်မှုမရှိထားလည်း ကြိုးစားအားထုတ်မှုပြုနေခြင်းကို ကျွန်တော် သဘောကျတယ်ဆိုတာ သူတို့ သိကြပါတယ်။

လက်ရှိအခိုက်အတန့်မှာ စွမ်းဆောင်ရည်ပိုင်းအမြင်ရှုထောင့်တစ်ခုတည်းကို သုံးသပ်ပြီး ဘယ်သူ့ကိုမှ ချန်လှပ်သွားမှာ မဟုတ်ပါဘူး။ လိုအပ်နေတဲ့အရာကိုသာ ကျွန်တော်တို့ လုပ်ဆောင်ခဲ့ပါတယ်။ ကျွန်တော်တို့ ပိုကောင်းလာနိုင်သလို တိုးတက်အောင်လုပ်ရမယ့်အဆင့်တွေလည်း ရှိနေပါသေးတယ်။ ဒါတွေကိုပဲ အာရုံစိုက်သွားရမယ်။ အကယ်၍ လန်းဆန်းတက်ကြွနေတဲ့ကစားသမားတစ်ဦးက ကျွန်တော်တို့အတွက် အကူအညီဖြစ်စေမယ်ဆိုရင်လည်း ဒီအကူအညီကိုယူလိုက်ဖို့ ရှက်နေစရာ ဘာအကြောင်းမှမရှိပါဘူး။ လုံလောက်တဲ့ကောင်းမွန်မှုမျိုးလည်း မရှိကြသေးလို့ ဘယ်သူ့ကိုမှ ဖယ်ထုတ်သွားမှာမဟုတ်ဘူး”လို့ ပြောပါတယ်။

ဖိုဒန်ရော၊ ရက်ရှ်ဖို့ဒ်ပါ အင်္ဂလန်လက်ရွေးစင်အသင်းလူစာရင်းမှာ ပါဝင်ခွင့်ရရှိဖို့အတွက် ခက်ခက်ခဲခဲကြိုးစားရမယ်ဆိုတာ သိထားကြပါတယ်။ ဖိုဒန်ရဲ့ညာတောင်ပံနေရာမှာဆိုရင် ဘိုဝင်အပြင် ဒဏ်ရာမှပြန်သက်သာလာတဲ့ ဆာကာတို့ ရှိနေပြီး ရက်ရှ်ဖို့ဒ်ကိုယ်တိုင်လည်း အန်တိုနီဂေါ်ဒွန်ရဲ့ဒဏ်ရာအခြေအနေကြောင့် လက်ရွေးစင်အဆင့်မှာ ပွဲကစားချိန်တွေ ပိုမိုရရှိနေပါတယ်။ နှစ်ဦးလုံးအတွက် ဒီည၊ လတ်ဗီးယားနဲ့ပွဲစဉ်မှာ အခွင့်အရေးကိုယ်စီရရှိသွားနိုင်ပေမယ့် တူချယ်ရဲ့ယုံကြည်မှုအတွက် ကြိုးစားရာမှာ အချိန်အများကြီးတော့ မရရှိနိုင်ပါဘူး။

တူချယ်က အခုနိုင်ငံတကာသီတင်းပတ်မကုန်ခင် သက်ဆိုင်ရာကလပ်အသင်းတွေဆီ ပြန်သွားမယ့် သူ့ရဲ့ကစားသမားတွေကို လတ်ဗီးယားနဲ့ပွဲစဉ်မှာ ဒုတိယအကြိမ်မြောက်အဖြစ် တာဝန်ယူဦးဆောင်သွားပါလိမ့်မယ်။ တူချယ်အတွက် အခုလိုအခွင့်အရေးမျိုးကို လာမယ့်ဇွန်လအတွင်း အန်ဒိုရာနဲ့ရင်ဆိုင်ရမယ့်အဝေးကွင်းပွဲစဉ်၊ ဆီနီဂေါကို အိမ်ရှင်အဖြစ်ဧည့်ခံကစားမယ့် ခြေစမ်းပွဲစဉ်တွေမှာ ထပ်မံရရှိသွားပါမယ်။