ခရိုအေးရှားနဲ့ရင်ဆိုင်ရမယ့် နေးရှင်းလိဂ်ကွာတားဖိုင်နယ်ပွဲစဉ်အတွက် ပြင်ဆင်မှုတွေလုပ်ဆောင်နေတဲ့ အမ်ဘာပေက နောက်ဆုံးခြောက်လအတွင်း ပထမဆုံးအကြိမ်အဖြစ် ပြင်သစ်လက်ရွေးစင်အသင်းနဲ့ ပြန်လည်ပူးပေါင်းနိုင်ခဲ့လို့ ဝမ်းမြောက်ဝမ်းသာဖြစ်မိပုံကို ထုတ်ဖော်ပြောကြားခဲ့ပါတယ်။

ယမန်နေ့(ဗုဒ္ဓဟူးနေ့)၊ Split မှာပြုလုပ်တဲ့ သတင်းစာရှင်းလင်းပွဲအတွင်း အသက်-၂၆ နှစ်အရွယ် ပြင်သစ်ကပ္ပတိန်က “ ကျွန်တော်ရဲ့ခံစားချက်တွေ ကောင်းမွန်နေပါတယ်။ ဘောလုံးကစားရတာကို ပျော်ရွှင်မိသလို ဒီအသင်းမှာ ရှိနေရလို့လည်း ပျော်ရွှင်မိပါတယ်”လို့ ပြောပါတယ်။

အမ်ဘာပေက အောက်တိုဘာလအတွင်း လက်ရွေးစင်အဆင့်ပွဲစဉ်နှစ်ခုကို ဒဏ်ရာပြဿနာနဲ့အတူ လွဲချော်ခဲ့ပြီး နိုဝင်ဘာလနိုင်ငံတကာသီတင်းပတ်မှာလည်း နည်းပြဒီဒီယာဒက်စ်ချမ့်စ်က ရီးရဲလ်မက်ဒရစ်ကစားသမားဘ၀ စိန်ခေါ်မှုတွေနဲ့ရင်ဆိုင်နေရတဲ့ ဘောလုံးကြယ်ပွင့်ကို လက်ရွေးစင်တာဝန်မှ ခေတ္တအနားပေးရန် ဆုံးဖြတ်ခဲ့ပါတယ်။ ဒါပေမယ့် ဒီည၊ နေးရှင်းလိဂ်ကွာတားဖိုင်နယ်ပထမအကျော့ပွဲစဉ်မတိုင်ခင် လက်ရွေးစင်အသင်းဆီ ပြန်လာနိုင်မှုကြောင့် အမ်ဘာပေမှာ အတော်လေးစိတ်ဓါတ်တက်ကြွနေပါတယ်။

သူက “ အသင်းဆီပြန်ပူးပေါင်းခွင့်ရရှိလို့ ကျွန်တော် ဝမ်းသာမိပါတယ်။ ဒီမှာရှိနေတဲ့အသင်းဖော်အများစုနဲ့လည်း စကားတွေ အများကြီးပြောဖြစ်ပါတယ်။အချို့လူတွေဆီကို ကျွန်တော့်ရဲ့အားလပ်ရက်တွေမှာ သွားခဲ့ပါတယ်။ အခုတော့ အသင်းမှာရှိနေရလို့ ဝမ်းသာမိပါတယ်။ ပြင်ပပုဂ္ဂိုလ်တွေအတွက် အခြေအနေတွေကို ရှင်းရှင်းလင်းလင်းမရှုမြင်မိတာမျိုး ဖြစ်ကောင်းဖြစ်နိုင်ပေမယ့် အသင်းအတွင်းမှာတော့ အရာအားလုံး အမြဲတမ်းရှင်းရှင်းလင်းလင်းရှိနေပါတယ်”လို့ ပြောပါတယ်။

ပြီးခဲ့တဲ့နွေရာသီကာလအတွင်း ရီးရဲလ်မက်ဒရစ်ဆီ ရောက်ရှိသွားတဲ့ အမ်ဘာပေက လက်ရှိစပိန်နဲ့ ဥရောပချန်ပီယံတွေအတွက် သူ့ရဲ့အကောင်းဆုံးပုံစံကိုရှာဖွေပေးနိုင်ဖို့ ရုန်းကန်ခဲ့ရပါတယ်။ ဒါ့အပြင် ပြီးခဲ့တဲ့ဆောင်းဦးကာလအတွင်း ဆွီဒင်မီဒီယာတစ်ခုက အဓမ္မပြုကျင့်မှုစုံစမ်းစစ်ဆေးရေးကိစ္စတစ်ခုနဲ့ ပြင်သစ်တိုက်စစ်မှူးကို ချိတ်ဆက်ဖော်ပြလာချိန် အမ်ဘာပေမှာ အငြင်းပွားစရာကိစ္စတွေနဲ့ ခေတ္တမျှ ပါဝင်ပတ်သက်ခဲ့ပါတယ်။ ဒါပေမယ့် ဒီဇင်ဘာလမှာ အမှုကိစ္စကို သက်ဆိုင်ရာက စွဲချက်မတင်ဘဲ  ရုပ်သိမ်းခဲ့ပါတယ်။

အခုလိုကွင်းပြင်ပစိန်ခေါ်မှုတွေနဲ့ ရင်ဆိုင်ခဲ့ရပေမယ့် အမ်ဘာပေက အခုညပိုင်း၊ Split မှာ ခရိုအေးရှားနဲ့ရင်ဆိုင်ရမယ့် ပြင်သစ်အသင်းကို ဦးဆောင်ပေးသွားဖို့အတွက် အာရုံစိုက်နေပါတယ်။ ဒီနှစ်သင်းထိပ်တိုက်တွေ့ဆုံမှုဒုတိယအကျော့ပွဲစဉ်ကို နောက်သုံးရက်အကြာ၊ ပါရီမြို့ရှိ Stade de France ကွင်းကြီးမှာ ဆက်လက်ကျင်းပသွားပါမယ်။ ကမ္ဘာ့ဖလားဆုရှင်ကတော့ ပြင်သစ်အသင်း နေးရှင်းလိဂ်အောင်ပွဲရယူနိုင်ရေးခရီးလမ်းမှာ အကျိုးသက်ရောက်မှုတစ်ခုပြသနိုင်ဖို့အတွက် စိတ်အားထက်သန်နေပါလိမ့်မယ်။