ဒေါ့မွန်အသင်းကွင်းလယ်လူ မာကိုရူးစ်က ချန်ပီယံလိဂ်ဖိုင်နယ်မှာ ရီးရဲလ်အသင်းကို ၂-၀ နဲ့ အရေးနိမ့်ခဲ့ပြီးနောက် ပရိသတ်တွေကို ကျေးဇူးတင်ကြောင်း ပြောကြားလိုက်ပါတယ်။

ဒေါ့မွန်ဟာ အဆိုပါပွဲရဲ့ပထမပိုင်းမှာ အခွင့်အရေးကောင်းတွေ ရရှိခဲ့ပေမယ့် လွဲချော်ခဲ့တာဖြစ်ပါတယ်။ ဒါ့အပြင် ပရိသတ်တွေကလည်း မိနစ် ၉၀ အထိ အသင်းကိုတောက်လျှောက်အားပေးခဲ့တာဖြစ်ပြီး အသင်းအတွက် ခွန်အားပေးခဲ့ကြပါတယ်။

တွစ်တာမှာ မာကိုရူးစ်က “ဘောလုံးက နတ်သမီးပုံပြင်တစ်ပုဒ်မဟုတ်ပါဘူး။ အမြဲတမ်းပျော်ရွှင်စရာတွေနဲ့ အဆုံးသတ်လေ့မရှိပါဘူး။ ကျွန်တော်တို့ သမိုင်းကဆက်သွားနေမှာပါ။ ခင်ဗျားတို့ရဲ့အားပေးမှုမပါပဲ ကျွန်တော်တို့ မလုပ်နိုင်ပါဘူး။ ပွဲစဉ်တစ်လျှောက်လုံးအားပေးခဲ့ကြတဲ့ ပရိသတ်တွေကို ကျေးဇူးအများကြီးတင်ပါတယ်”လို့ အသင်းခေါင်းဆောင် မာကိုရူးစ်က တင်ခဲ့ပါတယ်။

ဒေါ့မွန်အတွက်တင်မဟုတ်ပဲ မာကိုရူးစ်အတွက်လည်း အဆုံးသတ်ကောင်း မဟုတ်ခဲ့တာဖြစ်ပါတယ်။ အခုပွဲက မာကိုရူးစ်အတွက် နောက်ဆုံးပွဲဖြစ်သလို ကစားသမားဘ၀ ချန်ပီယံလိဂ်ဒုတိယမြောက်ဖိုင်နယ်လည်း ဖြစ်ပါတယ်။ ဂျာမန်သားဟာ ဒဏ်ရာပြဿနာတွေနဲ့ ရုန်းကန်ခဲ့ရပေမယ့် အသင်းအတွက် အကောင်းဆုံး စွမ်းဆောင်ပေးခဲ့တာဖြစ်ပါတယ်။ အဆင့် ၅ နေရာမှာ ပြီးဆုံးခဲ့ပေမယ့်လည်း ဒေါ့မွန်ဟာ ချန်ပီယံလိဂ်ဝင်ခွင့်ရမှာဖြစ်ပြီး တာဒစ်ဇ်ကတော့ အသင်းကို လာမယ့်ရာသီ လိဂ်အဆင့်ရပ်တည်မှုပိုကောင်းအောင် လုပ်ဆောင်ချင်နေပါတယ်။ လေဗာကူဆင်အသင်း ဒီရာသီချန်ပီယံဖြစ်ခဲ့သလို ဒေါ့မွန်ကလည်း ချန်ပီယံဖြစ်နိုင်ဖို့ ပစ်မှတ်ထားနေပါတယ်။