မန်စီးတီးကြယ်ပွင့်ဖိုဒန်က သူ့ရဲ့အသင်းအနေဖြင့် အခုသီတင်းပတ်ကုန်၊ အန်ဖီးလ်ကွင်းပွဲစဉ်မှာ အကောင်းဆုံးစွမ်းဆောင်သွားဖို့ လိုအပ်နေပြီလို့ သိရှိထားပါတယ်။

ပြီးခဲ့တဲ့ဘောလုံးရာသီ၊ သမိုင်းဝင်ဆုဖလားသုံးလုံးအောင်ပွဲ ရရှိခဲ့တဲ့ မန်ချက်စတာမိုးပြာရောင်အသင်းက ပရီးမီးယားလိဂ်အမှတ်ပေးဇယားဦးဆောင်သူ လီဗာပူးနဲ့ ရင်ဆိုင်ကစားရဖို့ ရှိနေပါတယ်။ လက်ရှိမှာ မန်စီးတီးက လီဗာပူးရဲ့နောက်၊ တစ်မှတ်အကွာမှာရပ်တည်နေပြီး လာမယ့်ပွဲစဉ်မှာ သူတို့ရဲ့ပြိုင်ဘက်ကို အနိုင်ယူကျော်ဖြတ်နိုင်မယ်ဆိုရင် ရာသီကုန်အမှတ်ပေးချန်ပီယံဆုအတွက် ရေပန်းအစားဆုံးဖြစ်လာမယ်ဆိုတာကို ဖိုဒန်ကိုယ်တိုင် သိရှိထားပါတယ်။

မန်ချက်စတာဒါဘီမှာ သက်သောင့်သက်သာအနိုင်ယူခဲ့ပြီးနောက် လာမယ့်တနင်္ဂနွေနေ့၊ အမှတ်ပေးဇယားထိပ်ဆုံးနေရာရှိ အသင်းနှစ်ခု ထိပ်တိုက်တွေ့ဆုံမှုနဲ့ပတ်သက်လို့ ပရီးမီးယားလိဂ်အဖွဲ့ချုပ်၊ ရုပ်သံထုတ်လွှင့်မှုအစီအစဉ်နဲ့တွေ့ဆုံချိန် ဖိုဒန်က ရင်ဖွင့်လာပါတယ်။

သူက “အရေးအကြီးဆုံးပွဲစဉ်ပါ။ ဒီကွင်းမှာ ကျွန်တော်တို့အသင်း အနိုင်ရလေ့မရှိတာကြောင့် အခုပွဲစဉ်က ကြီးမားတဲ့စိန်ခေါ်မှုတစ်ခု ဖြစ်လာပါလိမ့်မယ်။ ဒီလိုပွဲစဉ်မျိုးက ကစားသမားတစ်ဦးအဖြစ် ပါဝင်ကစားချင်တဲ့ ပွဲစဉ်မျိုးဖြစ်ပါတယ်။ ပွဲကြီးပွဲကောင်းပါ။ ဒီပွဲစဉ်အတွက် ကျွန်တော်တို့ အဆင်သင့်ဖြစ်နေမယ်လို့ မျှော်လင့်မိပါတယ်”လို့ ပြောပါတယ်။