ရီးရဲလ်မက်ဒရစ်တိုက်စစ်မှူး ခီလီယန်အမ်ဘာပေဟာ ယနေ့နံနက်က အတ္တလန္တာကို ၂-၃ နဲ့အနိုင်ရခဲ့တဲ့ ချန်ပီယံလိဂ်ပွဲစဉ်မှာ အသင်းအတွက် ဦးဆောင်ဂိုးယူပေးပြီးနောက် ပွဲကစားချိန် ၃၆ မိနစ်မှာ ကြွက်သားဒဏ်ရာရရှိခဲ့လို့ စောစောစီးစီးပဲ လူစားလဲခံခဲ့ရပါတယ်။ 

ယခုပွဲစဉ်မှာ ပြင်သစ်လက်ရွေးစင်ဟာ ရီးရဲလ်မက်ဒရစ်အတွက် ဦးဆောင်ဂိုးကို ပွဲအစ ၁၀ မိနစ်မှာပဲသွင်းယူပေးခဲ့ပြီး ခြေစွမ်းပြသကစားနိုင်ခဲ့ပေမယ့် ဒဏ်ရာကြောင့် အသင်းဖော် ရိုဒရီဂိုနဲ့လူစားလဲခံခဲ့ရပါတယ်။ ပြီးခဲ့တဲ့လက ဒဏ်ရာရရှိခဲ့တဲ့ တောင်ပံကစားသမား ဗင်နီစီးယက်စ်ဂျူနီယာကတော့ ယခုပွဲစဉ်မှာ ပွဲထွက်ကစားသမားအဖြစ် ပါဝင်နိုင်ခဲ့ပြီး အသင်းအတွက် ဂိုးသွင်းယူပေးနိုင်ခဲ့ပါတယ်။ 

ဘရာဇီးသား ပြန်လည်ပါဝင်ကစားနိုင်ခဲ့တာကြောင့် အမ်ဘာပေဟာ ယခုပွဲစဉ်မှာ အသင်းရဲ့ ဗဟိုတိုက်စစ်မှူးနေရာကို ပြန်လည်တာဝန်ယူခဲ့ရပေမယ့် တာဝန်ကျေအောင်ကစားနိုင်ခဲ့ပါတယ်။ ဒါ့အပြင် ယခုသွင်းဂိုးဟာ အသက်-၂၅ နှစ်အရွယ်ကစားသမားရဲ့ ဂိုး ၅၀ မြောက် ချန်ပီယံလိဂ်သွင်းဂိုးလည်းဖြစ်ခဲ့ပါတယ်။ 

ဒါကြောင့် အမ်ဘာပေဟာ လီယွန်နယ်မက်ဆီနောက် ချန်ပီယံလိဂ်သွင်းဂိုး ၅၀ အမြန်ဆုံးသွင်းယူနိုင်တဲ့ ဒုတိယမြောက်အသက်ငယ်ဆုံးကစားသမားအဖြစ် မှတ်တမ်းဝင်ခဲ့ပါတယ်။ မက်ဆီကတော့ ချန်ပီယံလိဂ်သွင်းဂိုး ၅၀ ကို ၂၀၁၂ ခုနှစ်၊ အသက်-၂၄ နှစ် အရွယ်မှာသွင်းယူနိုင်ခဲ့တာဖြစ်ပါတယ်။ 

သို့သော်လည်း အခုလို အမ်ဘာပေဒဏ်ရာရရှိသွားတာက ဒဏ်ရာပြဿနာတွေတောက်လျှောက်ကြုံတွေ့နေရတဲ့ ရီးရဲလ်မက်ဒရစ်အတွက် နောက်ထပ် ကြီးမားတဲ့ထိုးနှက်ချက်တစ်ခုဖြစ်လာခဲ့ပါတယ်။ လာမယ့် စနေနေ့မှာတော့ ကားလို့စ်အန်ဆယ်လော့တီရဲ့အသင်းဟာ လာလီဂါပွဲစဉ်အဖြစ် ဗယ်လက်ကာနိုကို အဝေးကွင်းမှာ သွားရောက်ရင်ဆိုင်ရပါမယ်။