မန်စီးတီးဂန္ထဝင်ကွင်းလယ်လူ ဒီဘရိုင်းတစ်ယောက် ရာသီအကုန်မှာ အသင်းကနေထွက်ခွာမယ်လို့ အတည်ပြုလိုက်ပါတယ်။ ဘယ်လ်ဂျီယံသားဟာ ချဲလ်ဆီးအသင်းမှာ ရုန်းကန်ခဲ့ရပြီးနောက် မန်စီးတီးနဲ့တစ်ကျော့ပြန်လာချိန်မှာ ပရီးမီးယားလိဂ်ဂန္ထဝင်တစ်ဦးဖြစ်လာခဲ့တာဖြစ်ပါတယ်။

ဒီဘရိုင်းဟာ စီးတီးနဲ့ ဆုဖလား ၆ လုံးရယူနိုင်ခဲ့ပြီး အက်ဖ်အေဖလား ၊ ချန်ပီယံလိဂ်အပြင် ပရီးမီးယားလိဂ်ဖလားတွေပါရယူနိုင်ခဲ့သလို စီးတီးအတွက် ပွဲပေါင်း ၄၀၀ ကျော်ပါဝင်ကစားခဲ့ပါတယ်။ အသက် ၃၃ နှစ်သား နဲ့ စီးတီးတို့ကြား စာချုပ်သက်တမ်းက နွေရာသီမှာ ကုန်ဆုံးမှာဖြစ်ပြီး စာချုပ်သစ်မချုပ်ဆိုတာကြောင့် စိန်ခေါ်မှုအသစ်တွေအတွက် စီးတီးကနေထွက်ခွာတော့မှာဖြစ်ပါတယ်။

အဲ့နောက် လူမှုမီဒီယာကနေ ဒီဘရိုင်းက စီးတီးပရိသတ်တွေထံ “မန်ချက်စတာသားတို့ရေ ဒီစာကိုမြင်မယ်ဆိုရင် ခင်ဗျားတို့ ဘယ်လိုခေါင်းစဉ်လဲဆိုတာကို သိမှာပါ။ ဒါကြောင့် ကျွန်တော် တိုက်ရိုက်ပဲပြောပါတယ်။ စီးတီး နဲ့ ကျွန်တော့်ကြားက နောက်ဆုံးလတွေရောက်လာခဲ့ပါပြီ။ အခုလိုမျိုးရေးရတာ မလွယ်ပါဘူး။ ဒါပေမယ့် ဘောလုံးသမားတစ်ဦးအနေနဲ့ အခုလိုနေ့ရက်တွေလာမယ်ဆိုတာ ကျွန်တော်တို့အားလုံးသိပါတယ်။ ဒီနေ့ ဒီနေရာမှာ ပထမဆုံးကြားရဖို့ ခင်ဗျားတို့က ထိုက်တန်ပါတယ်။

ဘောလုံးက ကျွန်တော့်ကို ဦးဆောင်စေခဲ့ပါတယ်။ အိပ်မက်တွေဆီကို ချဉ်းကပ်ရင်း ဒီအခိုက်အတန့် ကျွန်တော့်ဘဝကိုပြောင်းလဲမယ်ဆိုတာ မသိခဲ့ပါဘူး။ ဒီမြို့ ဒီအသင်း ၊ ဒီပရိသတ်တွေက ကျွန်တော့်နောက်မှာရှိခဲ့ပါတယ်။ ကျွန်တော်တို့အရာအားလုံးရယူနိုင်ခဲ့ပါတယ်။ ကြိုက်သည်ဖြစ်စေ မကြိုက်သည်ဖြစ်စေ အခုတော့ နှုတ်ဆက်ရမယ့်အချိန်ပါ။ အသင်းမှာရှိတဲ့သူတွေကိုလည်း ကျေးဇူးတင်ပါတယ်။

မန်ချက်စတာက ကျွန်တော့်ကလေးတွေပတ်စ်ပို့တ်ဖြစ်သလို ကျွန်တော့်နှလုံးသားထဲမှာလည်း အမြဲတမ်းရှိနေမှာပါ။ ဒီအသင်းက ကျွန်တော်တို့အိမ်အမြဲတမ်းဖြစ်နေမှာပါ။ ၁၀ နှစ်တာကာလအတွင်း ဒီကလူတွေအားလုံးကို ကျေးဇူးတင်တာနဲ့ မလုံလောက်ပါဘူး။ ပုံပြင်တိုင်းမှာ အဆုံးသတ်ရှိပါတယ်။ ဒါပေမယ့် ဒါကလည်း နောက်ထပ်အသစ်တစ်ခုအတွက် အကောင်းဆုံးဖြစ်စေမှာပါ။ နောက်ဆုံးအခိုက်အတန့်တွေကို အတူတူဖြတ်သန်းချင်ပါတယ်။ အများကြီးချစ်ပါတယ် ကီဗင်”လို့ ရေးသားတင်ခဲ့ပါတယ်။

ဒီဘရိုင်းဟာ လက်ရှိပရီးမီးယားလိဂ်သမိုင်းတစ်လျှောက်ဂိုးဖန်တီးမှုအများဆုံးကစားသမားဖြစ် ယူနိုက်တက်ဂန္ထဝင်ဟောင်း ရိုင်ယန်ဂစ်(၁၆၂) ဂိုးရဲ့နောက် ၁၁၈ ဂိုးနဲ့ ဒုတိယနေရာမှာ ရပ်တည်နေပါတယ်။ ဘယ်လ်ဂျီယံသားခေါ်ယူဖို့ ဆော်ဒီလိဂ်အပြင် မေဂျာလိဂ်ကလပ်တွေကလည်း စိတ်ဝင်စားနေကြပါတယ်။