အာဆင်နယ်အသင်းရဲ့ အမေရိကန် ရာသီကြိုအစီအစဉ်မှာ ပါဝင်လာတဲ့ ကိုင်ဟားဗက်ဇ်၊ မာတင်နယ်လီနဲ့ မာဂယ်ဟေးစ်
မာဂယ်ဟေးစ်၊ ကိုင်ဟားဗက်ဇ်နဲ့ မာတင်နယ်တို့ဟာ မနက်ဖြန်မနက် ယူနိုက်တက်နဲ့ပွဲမတိုင်ခင် အာဆင်နယ်အသင်းရဲ့ အမေရိကန် ရာသီကြိုအစီအစဉ်မှာ ပူးပေါင်းပါဝင်လာပြီဖြစ်ကြောင်း အသင်းက တရားဝင်ထုတ်ပြန်ခဲ့ပါတယ်။
အဆိုပါ ကစားသမားသုံးဦးဟာ နွေရာသီကာလအတွင်း ယူရို၂၀၂၄နဲ့ ကိုပါအမေရိကပြိုင်ပွဲတွေမှာ နိုင်ငံအသင်းအတွက် ကိုယ်စားပြု ပါဝင်ယှဉ်ပြိုင်ခဲ့တာကြောင့် နားရက်ပိုရထားကြတာ ဖြစ်ပါတယ်။ ယခုအချိန်မှာတော့ သူတို့သုံးဦးစလုံး ရာသီကြိုအစီအစဉ်မှာ ပါဝင်လာပြီဖြစ်တာကြောင့် ယူနိုက်တက်၊ လီဗာပူးတို့နဲ့ ခြေစမ်းပွဲစဉ်တွေမှာ ပါဝင်ကစားပေးဖို့ ရှိနေပါတယ်။
အာဆင်နယ်အသင်းဟာ ရာသီသစ်မတိုင်ခင် ပထမဆုံး ခြေစမ်းပွဲအဖြစ် ဘုန်းမောက်နဲ့ ရင်ဆိုင်ခဲ့ရာမှာ ပွဲချိန်မိနစ်၉၀အတွင်း တစ်ဖက်တစ်ဂိုးစီ သရေကျခဲ့ပြီး ပင်နယ်တီအဆုံးအဖြတ်မှာ အနိုင်ရခဲ့ပါတယ်။
