စိတ်ပျက်ဖွယ်ဘောလုံးရာသီတစ်ခုအတွင်း နှစ်ပွဲဆက်အရှုံးကြီးရှုံးခဲ့ပြီးနောက် ဂျူဗင်တပ်စ်အသင်းက နည်းပြသီယာဂိုမော့တာကို ရာထူးမှထုတ်ပယ်ကာ နည်းပြသစ်အဖြစ် အီဂေါတူဒေါကို ခန့်အပ်လိုက်တယ်လို့ ယမန်နေ့(တနင်္ဂနွေနေ့)မှာ ထုတ်ပြန်ကြေညာခဲ့ပါတယ်။

ဂျူဗင်တပ်စ်အသင်းက မတ် ၉ ရက်၊ အတ္တလန္တာကို အိမ်ကွင်းမှာ ၄-၀ ဂိုးဖြင့် ရှုံးနိမ့်ခဲ့ပြီးနောက် သီတင်းတစ်ပတ်အကြာမှာပဲ ဖိအိုရင်တီးနားကို ၃-၀ ဂိုးဖြင့် ထပ်မံရှုံးနိမ့်ခဲ့ပါတယ်။ ဒါကြောင့် မော့တာရဲ့အသင်းက ဘိုလော့ဂ်နာရဲ့နောက်၊ စီးရီးအေအမှတ်ပေးဇယားပဉ္စမနေရာအထိ ကျဆင်းသွားပြီး အမှတ်ပေးဇယားဦးဆောင်သူအင်တာမီလန်နဲ့ ၁၂ မှတ်အထိ ကွာဟသွားခဲ့ပါတယ်။

ဂျူဗင်တပ်စ်အသင်းရဲ့ထုတ်ပြန်ချက်တစ်ခုမှာ “ မော့တာကို အသင်းနည်းပြရာထူးမှ တရားဝင်ထုတ်ပယ်လိုက်ပါပြီ။ ဒါ့အပြင် နည်းပြသစ်အဖြစ် အီဂေါတူဒေါကို တာဝန်ပေးအပ်မယ်လို့ အတည်ပြုလိုပါတယ်။ အီဂေါတူဒေါက မနက်ဖြန်၊ လေ့ကျင့်ရေးအစီအစဉ်မှာပဲ အသင်းကို စတင်ကိုင်တွယ်ပါလိမ့်မယ်”လို့ ဖော်ပြပါရှိပါတယ်။

အသက်-၄၆ နှစ်အရွယ်တူဒေါက ၁၉၉၈ ခုနှစ်မှာ တူရင်မြေဆီ ရောက်ရှိလာပြီး ကစားသမားဘဝအချိန်ကာလအများစုကို ဂျူဗင်တပ်စ်မှာပဲ ကုန်ဆုံးခဲ့ပါတယ်။ ခရိုအေးရှားသားနည်းပြက ပီယာလိုရဲ့လက်ထောက်အဖြစ် ဂျူဗင်တပ်စ်မှာ တစ်ရာသီကြာ ရှိခဲ့ဖူးပါတယ်။ အီတာလျံဘောလုံးလောကအတွင်းမှာတော့ တူဒေါက အူဒီးနီးစ်၊ ဗီရိုနာနဲ့ လာဇီယိုတို့ကို တာဝန်ယူခဲ့ဖူးပါတယ်။

ဂျူဗင်တပ်စ်က အခုဘောလုံးရာသီ၊ အသွင်သစ်ချန်ပီယံလိဂ်ပြိုင်ပွဲရဲ့အမှတ်ပေးဇယားအဆင့်-၂၀ မှာ ရပ်တည်ခဲ့ပြီး ရှုံးထွက်ပလေးအော့ဖ်အဆင့်မှာ ပီအက်စ်ဗွီကို ရှုံးနိမ့်ကာ ပြိုင်ပွဲမှထွက်ခွာခဲ့ရပါတယ်။ သိပ်မကြာခင်မှာပဲ သူတို့တွေက ကိုပါအီတာလီယာဖလားပြိုင်ပွဲမှာ အမ်ပိုလီကို ပယ်နယ်တီအဆုံးအဖြတ်ဖြင့် အရေးနိမ့်ပြီး ဆုဖလားလမ်းကြောင်းတစ်ခုကို စွန့်ခွာခဲ့ရပါတယ်။

ဂျူဗင်တပ်စ်က အခုဘောလုံးရာသီအစောပိုင်းမှာ လိဂ် ၂၁ ပွဲဆက် ရှုံးပွဲမရှိကစားနိုင်ခဲ့ပေမယ့် အဲ့ဒီကာလအတွင်း ၁၃ ပွဲ သရေရလဒ်ထွက်ပေါ်ခဲ့ပါတယ်။ ဒါကြောင့်ပဲ မော့တာရဲ့အသင်းက စီးရီးအေချန်ပီယံပြေးလမ်းမှ စောစောစီးစီးပဲထွက်ခွာခဲ့ရပါတယ်။ ဇန်နဝါရီလအတွင်း နာပိုလီကိုရှုံးနိမ့်ပြီးနောက် ဂျူဗင်တပ်စ်အတွက် အလှည့်အပြောင်းတစ်ခုပေါ်ထွက်လာကာ လိဂ်ငါးပွဲဆက် အနိုင်ရရှိခဲ့ပေမယ့် နောက်ဆုံးဂိုးပြတ်ရှုံးနိမ့်မှုနှစ်ခုက နည်းပြမော့တာအတွက် ပေးဆပ်မှုကြီးမားသွားစေခဲ့ပါတယ်။

ဂျူဗင်တပ်စ်ဆီ ရောက်ရှိလာချိန်ကတည်းက မော့တာက ကစားသမားရှင်းထုတ်မှုတွေကို ပြတ်ပြတ်သားသားဆောင်ရွက်ခဲ့ပြီး ချီယေဆာကိုယ်တိုင်လည်း နည်းပြသစ်ရဲ့အစီအစဉ်ထဲမှာ ပါဝင်ခွင့် မရရှိတော့ဘူးလို့ပြောဆိုကာ လီဗာပူးဆီ ပြောင်းရွှေ့သွားခဲ့ပါတယ်။ ဂျူဗင်တပ်စ်က လာမယ့်စနေနေ့၊ အိမ်ကွင်းမှာ ဂျီနိုအာကို ဧည့်ခံကစားရပါမယ်။