အင်တာမိုင်ယာမီအသင်းက တိုက်စစ်ကစားသမား မက်ဆီရဲ့အခြေအနေကို သေချာလေးဂရုစိုက်နေရပြီး ၂ ပွဲဆက်ပါဝင်ကစားနိုင်ချေရှိနေတယ်လို့ ထုတ်ဖော်ပြောကြားခဲ့ပါတယ်။ မက်ဆီဟာ Philadelphia Union အသင်းကို ၂-၁ နဲ့အနိုင်ရခဲ့တဲ့ပွဲမှာ အရန်ခုံကနေ လူစားဝင်ကစားခဲ့ပါတယ်။ အဲ့နောက် ၂ မိနစ်အတွင်းမှာတင် ဂိုးပေါက်တွေ့ခဲ့တာဖြစ်ပြီး အင်တာမိုင်ယာမီကို ၃ မှတ်ပြည့်ယူပေးနိုင်ခဲ့ပါတယ်။

အဆိုပါမိနစ်တွေဟာ မက်ဆီအတွက် မတ်လ ၁၆ ရက်နေ့နောက်ပိုင်း ပထမဆုံးအကြိမ်ဖြစ်လာခဲ့ပြီး ပြီးခဲ့တဲ့အာဂျင်တီးနားအသင်းနဲ့နိုင်ငံပွဲစဉ်တွေကိုလည်း ကြွက်သားဒဏ်ရာကြောင့် နုတ်ထွက်ခဲ့ပါတယ်။ အင်တာမိုင်ယာမီဘက်က မက်ဆီကို ဒဏ်ရာအခြေအနေကြောင့် ပိုအနားပေးဖို့ ပြင်ဆင်ခဲ့တာဖြစ်ပါတယ်။ မာရှေးယာနိုကတော့ မက်ဆီအနေနဲ့ လာမယ့်ဗုဒ္ဓဟူးနေ့မှာကန်မယ့် LAFC နဲ့ပွဲမှာ ပါဝင်ကစားနိုင်ချေရှိတယ်လို့ ပြောကြားခဲ့ပါတယ်။

“အစီအစဉ်ကတော့ သူ့ကိုလော့စ်အိန်ဂျလိစ်သွားတော့မှ အသုံးပြုဖို့ပါ။ ဒီနေ့တော့ သူကူညီပေးနိုင်ခဲ့ပါတယ်။ ပြီးတော့ ကစားပြခဲ့တာလည်း အရမ်းကောင်းခဲ့ပါတယ်။ ကျွန်တော်တို့ အရဲမစွန့်ချင်တာကြောင့် မိနစ် ၉၀ ပြည့်မထည့်ခဲ့တာပါ။ ဒါပေမယ့် သူအချိန်ပိုအပါအဝင် ၄၅ မိနစ်တော့ ကောင်းကောင်းကစားနိုင်ခဲ့ပါတယ်။ တကယ်လို့ပြဿနာကြီးကြီးမားမားမရှိခဲ့ဘူးဆိုရင် သူခရီးသွားနိုင်မှာပါ။

ကျွန်တော်တို့ လီယိုကို မိနစ်အနည်းငယ်ပေးချင်ခဲ့တာပါ။ ကနဦးတုန်းက သူ့ကိုမိနစ် ၃၀ နဲ့ ၃၅ မိနစ်လောက်ပဲ ကစားခွင့်ပေးမလို့ပါ။ အချိန်ပိုနဲ့ဆိုတော့ မိနစ်ပိုများခဲ့ပြီး သူအဆင်ပြေပါတယ်။ ကျွန်တော်တို့ အရဲမစွန့်ချင်တာကြောင့် ပွဲအစကတည်းက မထည့်ခဲ့တာပါ။ ကံကောင်းစွာနဲ့ အဆင်ပြေပြေနဲ့ပွဲပြီးခဲ့ပါတယ်”လို့ မာရှေးယာနိုက ပြောကြားခဲ့ပါတယ်။

မက်ဆီဟာ ပြီးခဲ့တဲ့ရာသီတုန်းက အင်တာမိုင်ယာမီကို Supporter’s Shield triumph ဆုဖလားရယူပေးနိုင်ခဲ့ပြီး အခုရာသီမှာတော့ မေဂျာလိဂ်ဖလားရယူနိုင်ဖို့ ပစ်မှတ်ထားနေပါတယ်။