မန်ချက်စတာယူနိုက်တက်ရဲ့ သမိုင်းတစ်လျှောက် ပင်နယ်တီသွင်းဂိုးအများဆုံးသွင်းယူနိုင်တဲ့ စံချိန်ကိုရရှိထားတဲ့ အသင်းခေါင်းဆောင်ဘရူနိုဖာနန်ဒက်စ်က သူ့ရဲ့ ပင်နယ်တီကန်သွင်းတဲ့ လျှို့ဝှက်နည်းစနစ်ကို ထုတ်ဖော်ပြောကြားလာခဲ့ပါတယ်။ 

ဖာနန်ဒက်စ်က "ဘောလုံးသမားတစ်ယောက် ပင်နယ်တီတွေအများကြီးကန်သွင်းရမယ်ဆိုရင် သူ့အနေနဲ့ ပြောင်းလဲမှုတွေပြုလုပ်ဖို့လိုအပ်ပါတယ်။ ဘာကြောင့်လဲဆိုတော့ ဂိုးသမားက ပင်နယ်တီကန်သွင်းသူကို လေ့လာပြီး စောင့်ကြည့်နေမှာဖြစ်သလို၊ သူကိုယ်တိုင်ကလည်း ဂိုးသမားကို ပြန်ပြီးတော့ စောင့်ကြည့်လေ့လာနေရမှာပါ"

"ကျွန်တော်ကိုယ်တိုင်လည်း ဂိုးသမားတွေကို ကြိုတင်လေ့လာထားလေ့ရှိပြီး သူတို့ဘာလုပ်မယ်ဆိုတာကို ခန့်မှန်းလို့ရနေပါတယ်။ ဘယ်လိုကစားသမားတွေနဲ့တွေ့ရင် ဘယ်လိုဖမ်းကြတယ်ဆိုတာ ကျွန်တော် လေ့လာထားရပါတယ်။ ဒါပေမယ့် ဒီလိုအချက်အလက်တွေက ပွဲရဲ့အခြေအနေပေါ်မှာလည်း အများကြီးမူတည်ပါတယ်"

"ကျွန်တော့်အတွက်ကတော့ တစ်ချက်ခုန်ပြီး ဂိုးသမားရဲ့ဆုံးဖြတ်ချက်ကို စောင့်ပြီးမှကန်ရတာ သက်တောင့်သက်သာရှိစေပါတယ်။ အဲဒီလိုပုံစံနဲ့ကန်ရင် ကျွန်တော့်အတွက် အမှားနည်းပါတယ်။ ဒါပေမယ့် ကျွန်တော်အဲဒီနည်းစနစ်ကို ပြောင်းလဲခဲ့ရပါတယ်။ ဘာကြောင့်လဲဆိုတော့ အချို့ဂိုးသမားတွေမှာ ဒီနည်းလမ်းက အလုပ်မဖြစ်လို့ပါ"

"ဘယ်လိုအခြေအနေမှာဖြစ်ဖြစ် ပင်နယ်တီကန်သွင်းယူတစ်ယောက်က လွဲချော်နိုင်ပါတယ်။ ဒါပေမယ့် တစ်ရာသီလုံးစာအတွက် ပင်နယ်တီကန်သွင်းရမယ်ဆိုရင်တော့ ပြောင်းလဲမှုပြုလုပ်ဖို့လိုပါတယ်။ ကျွန်တော် ပင်နယ်တီကန်သွင်းတဲ့နည်းစနစ်ကို ဆမ်ဒိုးရီးယားမှာကစားတုန်းက ဖာဘီယိုကွာဂလီယာရယ်လာဆီမှာ သင်ယူခဲ့ရပါတယ်။ သူကအမြဲတမ်းဂိုးသမားတွေကို လေ့လာနေတဲ့သူဖြစ်ပြီး သူဘာလုပ်သင့်တယ်ဆိုတာကို အချိန်တိုင်းစဉ်းစားနေသူပါ။ သူ့ရဲ့ကန်နေကျပုံစံကတော့ ဘောလုံးဆီကိုမြန်မြန်ပြေးပြီး ကစ်ချက်ပြင်းပြင်းနဲ့ကန်တာပါပဲ။ ဒါပေမယ့် အဲဒီလိုမကန်ခင်မှာ သူက ဂိုးသမားကိုလေ့လာပြီးမှ ဆုံးဖြတ်ချက်ကိုချတာပါ။ သူ့ရဲ့နည်းစနစ်က ပင်နယ်တီကန်သွင်းသူတွေအတွက် အကောင်းဆုံးနည်းလမ်းတွေထဲက တစ်ခုပါ" လို့ပြောကြားခဲ့ပါတယ်။ 

ဆက်လက်ပြီး ဖာနန်ဒက်စ်က ပေါ်တူဂီအသင်းဖော် ခရစ္စတီယာနိုရော်နယ်ဒိုရဲ့ ပင်နယ်တီကန်သွင်းတဲ့နည်းစနစ်ကိုလည်း ဝေမျှခဲ့ပါတယ်။ စွယ်စုံရကွင်းလယ်လူက "ကျွန်တော်လက်ရွေးစင်အသင်းကိုရောက်ချိန်မှာ ရော်နယ်ဒိုနဲ့အမြဲတမ်း စကားပြောနေလေ့ရှိပါတယ်။ တစ်ခါတလေမှာ ကျွန်တော်က ဂိုးသမားတစ်ယောက်အေပါ်ဘယ်လိုမြင်သလဲလို့ သူကမေးလေ့ရှိပါတယ်။ ရော်နယ်ဒိုတောင်မှ ပင်နယ်တီကန်သွင်းတဲ့ပုံစံကို ပြောင်းလဲမှုပြုလုပ်ခဲ့ရပါတယ်။ ချဲလ်ဆီးကိုအနိုင်ရခဲ့တဲ့ ချန်ပီယံလိဂ်ပြိုင်ပွဲမှာ သူပင်နယ်တီလွဲချော်ခဲ့ပါတယ်။ အဲဒီအချိန်ကနေစတင်ပြီး သူ့ရဲ့ပင်နယ်တီကန်သွင်းတဲ့နည်းစနစ် ပြောင်းလဲခဲ့ပါတယ်"

"အခုချိန်မှာလည်းသူက ပြောင်းလဲမှုတွေပြုလုပ်ထားပါတယ်။ ပြီးတော့ ပင်နယ်တီကန်သွင်းသူတစ်ယောက်က ပွဲနဲ့ လိုက်လျောညီထွေဖြစ်ဖို့လည်းလိုပါတယ်။ ဘာကြောင့်လဲဆိုတော့ အရာရာတိုင်းက လျင်လျင်မြန်မြန်ပြောင်းလဲနေပြီး လူတွေကလည်း ပိုကောင်းသထက်ကောင်းလာကြလို့ပါ။ တကယ်လို့ မိနစ် ၉၀ နောက်ပိုင်းမှာ အသင်းနိုင်ပွဲရဖို့ ပင်နယ်တီရပြီး အဲဒီပင်နယ်တီကို ဘယ်သူ့ကိုကန်ခိုင်းမလဲလို့ မေးရင် လူတိုင်းက ရော်နယ်ဒိုလို့ပဲဖြေကြမှာပါ။ ရော်နယ်ဒိုက ကမ္ဘာ့ပင်နယ်တီကန်သွင်းသူအကောင်းဆုံးစာရင်းမှာပါဝင်ပြီး သူကိုယ်တိုင်တောင်ပြောင်းလဲမှုတွေပြုလုပ်နေရတယ်ဆို ကျွန်တော်တို့ကလည်း ဘာကြောင့်မပြောင်းလဲရမှာပါလဲ။ ကျွန်တော်တို့လည်း မတူညီတဲ့ပုံစံတွေနဲ့ တိုးတက်ပြောင်းလဲဖို့လိုပါတယ်" လို့ထပ်လောင်းပြောကြားခဲ့ပါတယ်။