စနေနေ့ည တနင်္ဂနွေနေ့မနက်မှာတော့ ၂၀၂၃-၂၄ ရာသီရဲ့ ချန်ပီယံလိဂ်ဗိုလ်လုပွဲကို ဝင်ဘလေကွင်းမှာကျင်းပသွားမှာဖြစ်ပြီး ရီးရဲလ်မက်ဒရစ်နဲ့ ဒေါ့မွန်တို့ယှဉ်ပြိုင်သွားရမှာဖြစ်ကာ ယခုအခါမှာတော့ ယူနိုက်တက်နောက်ခံလူဟောင်း ရီယိုဖာဒီနန်က ဒေါ့မွန်ကို ဘာကြောင့် အနိုင်ရစေချင်တာလဲဆိုတာ ရှင်းပြလာခဲ့တယ်။ 

စပိန်လာလီဂါရီးရဲလ်မက်ဒရစ်အနေနဲ့ ယခုပွဲစဉ်မှာ အနိုင်ရခဲ့မယ်ဆိုရင် ချန်ပီယံလိဂ်ဆုဖလားကို ၁၅ ကြိမ်မြောက် စံချိန်တင်ဆွတ်ခူးနိုင်မှာဖြစ်လို့ ကားလို့စ်အန်ဆယ်လော့တီရဲ့အသင်းဟာ ဒေါ့မွန်ကိုအနိုင်ယူဖို့ ပြင်းပြင်းထန်ထန်စိတ်အားထက်သန်နေပါတယ်။ 

ရီးရဲလ်မက်ဒရစ်အနေနဲ့ အင်္ဂလန်ကွင်းလယ်ကြယ်ပွင့် ဂျုဒ်ဘယ်လင်ဟမ်ကို ပိုင်ဆိုင်ထားတဲ့အပြင် အခြား ကမ္ဘာ့အကောင်းဆုံးကစားသမားတွေနဲ့ဖွဲ့စည်းထားသော်လည်း ဆီမီးဖိုင်နယ်အဆင့်မှာ ပီအက်စ်ဂျီကို ၂ ကျော့စလုံး ဂိုးမပေးခဲ့ရတဲ့ ဒေါ့မွန်ကိုတော့ လွယ်လွယ်ကူကူအနိုင်ရဖို့ မဖြစ်နိုင်တဲ့အခြေအနေမှာရှိနေပါတယ်။ 

ဒါ့အပြင် ဒေါ့မွန်ကလည်း ကစားသမားတွေကို အင်အားဖြည့်တင်းထားပြီး ယူနိုက်တက်တောင်ပံကစားသမား ဂျေဒန်ဆန်ချိုကိုလည်း ပြီးခဲ့တဲ့ ဇန်နဝါရီမှာ အငှားစာချုပ်နဲ့ခေါ်ယူထားခဲ့တာဖြစ်ပါတယ်။ အင်္ဂလန်သားဟာ မန်နေဂျာ အဲရစ်တန်ဟက်နဲ့ပြဿနာဖြစ်ကာ အိုးလ်ထရက်ဖို့ဒ်ကနေထွက်ခွာလာခဲ့တာဖြစ်ပေမယ့် အဆိုပါပြဿနာမတိုင်မှာလည်း သူ့ရဲ့တန်ကြေးဖြစ်တဲ့ ပေါင် ၇၃ သန်းနဲ့ထိုက်တန်တဲ့ခြေစွမ်းမျိုး ပြသနိုင်ခဲ့ခြင်းမရှိပါဘူး။ 

သို့သော်လည်း အသင်းဟောင်းဒေါ့မွန်နဲ့ ပြန်လည်ချိတ်ဆက်ပြီးနောက်မှာတော့ ဆန်ချိုအနေနဲ့ အသစ်တဖန်ပြန်လည်မွေးဖွားလာသလို ဖြစ်နေပြီး ခြေစွမ်းကောင်းကို တောက်လျှောက်ပြသထားနိုင်တာဖြစ်ပါတယ်။ 

ယခုအခါမှာ ဖာဒီနန်ကလည်း ဆန်ချိုကြောင့်သာ ဒေါ့မွန်ကို ချန်ပီယံလိဂ်ဖလားဆွတ်ခူးစေလိုတာဖြစ်တယ်လို့ ရှင်းပြပြောဆိုလာခဲ့ပါတယ်။ အင်္ဂလန်နောက်ခံလူဟောင်းက “ကျွန်တော်ကတော့ ဒီဖလားကို ဆန်ချိုအတွက်ရစေချင်လို့ ဒေါ့မွန်ကို အနိုင်ရစေချင်တာပါ။ တကယ်တော့ ကျွန်တော်က ဒေါ့မွန်ကို ဂရုမစိုက်ပါဘူး။ ဒီဖလားကို ဘယ်သူရရ စိတ်ကိုမဝင်စားတာပါ။ ဒါပေမယ့် ဂျေဒန်ဆန်ချိုလို လူငယ်ကစားသမားလေးအတွက်ကတော့ ဒီဖလားကိုဆွတ်ခူးနိုင်မယ်ဆိုရင် ယုံကြည်မှုတွေအများကြီး ပိုရလာနိုင်ပါတယ်”

“ကစားသမားတွေက ဝေဖန်မှုတွေနဲ့ ကြုံတွေ့ရပေမယ့် ခံနိုင်ရည်ရှိမှုကို ပြသနိုင်ဖို့လိုအပ်ပြီး ဆန်ချိုအနေနဲ့လည်း သူ့ပတ်ဝန်းကျင်ကို ပြောင်းလဲနိုင်ဖို့ အခွင့်အရေးရှိနေပါတယ်။ ပြီးတော့ ဘယ်နေရာပဲရောက်ရောက် ကြိုးစားရင် ဘာမဆိုဖြစ်နိုင်တယ်ဆိုတာလည်း သက်သေပြနိုင်မှာပါ။ ဒါပေမယ့် တစ်ခုတော့ရှိပါတယ်။ ပြိုင်ဘက်က ရီးရဲလ်မက်ဒရစ်ပါ။ အရမ်းခက်ပါလိမ့်မယ်” လို့ပြောကြားခဲ့ပါတယ်။