ဘရိုက်တန်အသင်းရဲ့ တန်ဖိုးနည်းတဲ့ ငယ်ရွယ်တဲ့ ကစားသမားတွေကို ခေါ်ယူပြီး ကြီးမားတဲ့ အမြတ်အစွန်းနဲ့ ပြန်လည်ရောင်းချတဲ့ လုပ်ငန်းပုံစံဟာ အဲလက်ဆစ် မက်အယ်လစ္စတာ၊ မိုဆက်စ် ကိုင်စီဒို၊ မာ့ခ်ကူကူရယ်လာ၊ ယဗ် ဘစ်ဆူးမားနဲ့ လီယန်ဒရို ထရော့ဆတ်တို့လို ကစားသမားတွေကို မကြာသေးမီနှစ်တွေအတွင်း ကြီးမားတဲ့ ပြောင်းရွှေ့ကြေးတွေနဲ့ ထွက်ခွာစေခဲ့ပါတယ်။

ပြီးခဲ့တဲ့လက ပေါင်သန်း ၆၀ အထိ တန်ကြေးရှိတဲ့ သဘောတူညီမှုနဲ့ ချဲလ်ဆီးအသင်းကို ရောက်ရှိသွားခဲ့တဲ့ ဂျာအို ပက်ဒရိုဟာ ဘရိုက်တန်အသင်းကနေ ထွက်ခွာသွားတဲ့ နောက်ဆုံးပေါ် ကစားသမားတစ်ဦး ဖြစ်လာခဲ့ပါတယ်။

ဘရိုက်တန်အသင်းဟာ နွေရာသီ အပြောင်းအရွှေ့ကာလအတွင်း နည်းပြ ဖေဘီယန် ဟာဇလာရဲ့ လူစာရင်းကို ကစားသမားသစ် ၆ ဦးနဲ့ အားဖြည့်ပေးခဲ့ပေမယ့် အသင်းရဲ့ ထိပ်တန်းကြယ်ပွင့် နောက်တစ်ဦးဖြစ်တဲ့ ကားလို့စ် ဘာလေဘာ ထွက်ခွာဖို့ ရှိနေတယ်ဆိုတဲ့ ခန့်မှန်းချက်တွေ တိုးလာနေပါတယ်။

ယူနိုက်တက်အသင်းကွင်းလယ်ကို အင်အားဖြည့်တင်းဖို့အတွက် အဓိက ပစ်မှတ်ထားနေပြီးသား မာသီးယက်စ် ကွန်ညာ၊ ဘရိုင်ယန် အမ်ဘိုမိုနဲ့ ဘင်ဂျမင် ဆက်စ်ကိုတို့ကို ခေါ်ယူပြီး တိုက်စစ်ပိုင်းကို အားဖြည့်ခဲ့ပြီးနောက်မှာ ဘာလေဘာဟာ အဓိက ပစ်မှတ်တစ်ခု ဖြစ်လာခဲ့ပါတယ်။

ယူနိုက်တက်အသင်းဟာ ကစားသမားနဲ့ ငွေသားအလဲအလှယ် ကမ်းလှမ်းမှုကို ဘရိုက်တန်အသင်းက ချက်ချင်း ပယ်ချခဲ့ပေမယ့်လည်း အသက် ၂၁ နှစ်အရွယ် ကင်မရွန်းလက်ရွေးစင် ကစားသမားကို နောက်တစ်ကြိမ် ကမ်းလှမ်းဖို့ ပြင်ဆင်နေတယ်လို့ သိရပါတယ်။

ဘရိုက်တန်အသင်းကတော့ ယူနိုက်တက်အလိုရှိနေတဲ့ ဒီလူငယ် ကစားသမားအတွက် ပေါင်သန်း ၁၀၀ ကျော်အထိ တောင်းဆိုထားတယ်လို့ သိရပါတယ်။

နည်းပြ ဟာဇလာကတော့ အဓိက ကစားသမားတွေ ရောင်းထုတ်လိုက်ရမှာကို စိုးရိမ်ပါသလားဆိုတဲ့ ဘီဘီစီရဲ့ မေးခွန်းကို "မစိုးရိမ်ပါဘူး။ ကျွန်တော် ဘာကိုမှ မကြောက်ပါဘူး။ ဘာလို့လဲဆိုတော့ ကျွန်တော်တို့ လုပ်နိုင်တဲ့ တစ်ခုတည်းသော အရာကတော့ နေ့တိုင်း အတတ်နိုင်ဆုံး အကောင်းဆုံးဖြစ်အောင် အလုပ်လုပ်ဖို့ပါပဲ။ ကျန်တာကိုတော့ ကျွန်တော်တို့ မထိန်းချုပ်နိုင်တဲ့အတွက် ကျွန်တော်တို့ အပေါ်ပဲ အာရုံစိုက်ရမှာ ဖြစ်ပါတယ်။ ကြီးမားတဲ့ အသင်းတွေလိုတော့ ငွေကြေး သုံးစွဲနိုင်မှာ မဟုတ်ပါဘူး။ ဒါပေမယ့် ကျွန်တော်တို့ရဲ့ အကြီးမားဆုံး တန်ဖိုးတွေထဲက တစ်ခုကတော့ စည်းလုံးညီညွတ်မှုပါ။ အတူတကွ ရှိနေမယ်ဆိုရင် ကျွန်တော်တို့ဟာ အသင်းကြီးတွေနဲ့ ယှဉ်ပြိုင်နိုင်မယ်လို့ ယုံကြည်ပါတယ်" လို့ ပြန်လည်ဖြေကြားခဲ့ပါတယ်။

ဂျာအို ပက်ဒရိုလို "မယုံကြည်နိုင်စရာ ကစားသမား" ကို လက်လွှတ်လိုက်ရတယ်လို့ ဟာဇလာက ဝန်ခံခဲ့ပေမယ့် ပြီးခဲ့တဲ့ရာသီက အဆင့် ၈ နေရာမှာ ရပ်တည်ခဲ့ပြီးနောက်မှာ အသင်းဟာ "အပြိုင်အဆိုင် အလွန်ကောင်းမွန်တဲ့" အသင်းအဖြစ် ဆက်လက်တည်ရှိနိုင်မယ်လို့ ယုံကြည်နေပါတယ်။

"ဒါကတော့ မလွယ်ပါဘူး။ ဒါပေမယ့် ကျွန်တော်တို့ဟာ ပြီးခဲ့တဲ့ရာသီက အရမ်းကို အပြိုင်အဆိုင်ကောင်းတဲ့ အသင်းတစ်သင်းဆိုတာ သက်သေပြခဲ့ပါတယ်။ ဂျာအို ပက်ဒရို မရှိတော့တာကတော့ သူဟာ မယုံကြည်နိုင်စရာ ကစားသမားတစ်ဦး ဖြစ်တဲ့အတွက် သေချာပေါက် ခက်ခဲပါတယ်။ ဒါပေမယ့် ကျွန်တော်တို့ဟာ သူ့ကို ကစားသမား တစ်ယောက်တည်းနဲ့ အစားထိုးလို့ မရပေမယ့် အသင်းတစ်ခုအနေနဲ့တော့ အစားထိုးနိုင်ပါတယ်။ ဒါကတော့ ကျွန်တော်တို့ရဲ့ အာရုံစိုက်မှုပါပဲ" လို့ ဂျာမန်လူမျိုး နည်းပြက ဖြည့်စွက်ပြောကြားခဲ့ပါတယ်။

နည်းပြ ဟာဇလာကတော့ လေ့ကျင့်ရေးကွင်းမှာ ကစားသမားတွေရဲ့ "အသင်းစိတ်ဓာတ်" နဲ့ "စည်းလုံးညီညွတ်မှု" တွေကို တွေ့မြင်ရတာကြောင့် လာမယ့်ရာသီသစ်အတွက် စိတ်ဓာတ်တက်ကြွနေခဲ့ပါတယ်။

"ကလပ်အသင်းအနေနဲ့ အမြဲတမ်း ဖြေရှင်းချက်တွေ ရှာဖွေနိုင်ပြီး အနာဂတ်မှာလည်း ဖြေရှင်းချက်တွေ ရှာဖွေနိုင်မယ်လို့ ယုံကြည်ပါတယ်။ ဒါဟာ ကျွန်တော်တို့ရဲ့ ပုံစံဖြစ်ပြီး လက်ခံရပါမယ်။ ကလပ်အသင်းအနေနဲ့ ကစားသမားကောင်းတွေကို ရောင်းချရုံတင်မဟုတ်ဘဲ တခြားကစားသမားတွေဖြစ်တဲ့ မီတိုမာနဲ့ တခြား ကစားသမားတွေအတွက်လည်း ကမ်းလှမ်းမှုတွေ၊ ကမ်းလှမ်းမှုကြီးတွေ ရှိခဲ့ဖူးပါတယ်။ ကျွန်တော်တို့ဟာ ကစားသမားတိုင်းကို ရောင်းချနေတာမဟုတ်ဘူးဆိုတာ သက်သေပြခဲ့ပါတယ်"

"ဟုတ်ပါတယ်၊ ကလပ်အသင်းကနေ ထွက်ခွာသွားတဲ့ ကစားသမားကောင်းတွေ ရှိခဲ့ပါတယ်။ ဒါပေမယ့် အသစ်ဝင်ရောက်လာတဲ့ ကစားသမားတွေလည်း ရှိပါတယ်။ ကျွန်တော်တို့ရဲ့ စည်းလုံးညီညွတ်မှုနဲ့ အသင်းစိတ်ဓာတ်တွေနဲ့ဆိုရင် ကျွန်တော်တို့ဟာ အသင်းကြီးတွေနဲ့ ယှဉ်ပြိုင်နိုင်ပြီး တစ်ဦးချင်း ပိုကောင်းနိုင်တဲ့ အသင်းတွေနဲ့လည်း ယှဉ်ပြိုင်နိုင်ပါတယ်" လို့ ဘရိုက်တန်နည်းပြက ဆက်လက်ပြောကြားခဲ့ပါတယ်။

ပြီးခဲ့တဲ့ရက်သတ္တပတ်က ပရိသတ်တွေ့ဆုံပွဲမှာ ဘရိုက်တန်အသင်း CEO ပေါလ် ဘာဘာက ယူနိုက်တက်အသင်းနဲ့ ဘာလေဘာအကြောင်း ပြောဆိုမှု မရှိသေးဘူးလို့ အခိုင်အမာ ပြောကြားခဲ့ပေမယ့် ကွင်းလယ်လူရဲ့ အနာဂတ်ကိုတော့ အာမခံနိုင်ခြင်း မရှိခဲ့ပါဘူး။

"ကျွန်တော်တို့ရဲ့ ကစားသမားတွေအပေါ် စိတ်ဝင်စားမှုကတော့ အမြဲတမ်း ရှိနေမှာပါပဲ။ ယူနိုက်တက်အသင်းကတော့ ကျွန်တော့်ကို ဆက်သွယ်ခြင်း မရှိသေးပါဘူး။ ခန့်မှန်းချက်တွေကတော့ ခန့်မှန်းချက်တွေပါပဲ။ ကားလို့စ် ဘာလေဘာကတော့ အရမ်းကောင်းတဲ့ ကစားသမားပါပဲ။ သူဟာ နောင်နှစ်ပေါင်းများစွာ ကျွန်တော်တို့ဆီမှာ ရှိနေလိမ့်မယ်လို့ မျှော်လင့်ပါတယ်။ ဒါပေမယ့် ဘောလုံးကမ္ဘာရဲ့ ကြိုတင်မှန်းဆလို့မရနိုင်တဲ့ အခြေအနေတွေအပေါ်မှာ မူတည်ပါတယ်" လို့ သူက ပြောကြားခဲ့ပါတယ်။