အသင်းဟောင်းကို အနိုင်ဂိုးသွင်းယူနိုင်ခဲ့ပြီးနောက် နော်တင်ဟမ်ဖောရက်စ်တောင်ပံကစားသမား အီလန်ဂါက ယူနိုက်တက် နဲ့ နော်တင်ဟမ်တို့ကြား ခြားနားချက်ကို ထုတ်ဖော်ပြောကြားလိုက်ပါတယ်။ အင်္ဂါနေ့ကပွဲမှာ ယူနိုက်တက်စတားဟောင်း အီလန်ဂါက နော်တင်ဟမ်အတွက် တစ်လုံးတည်းသောအနိုင်ဂိုးကိုသွင်းယူပေးနိုင်ခဲ့ပါတယ်။

အဆိုပါနိုင်ပွဲကြောင့် လာမယ့်ရာသီချန်ပီယံလိဂ်ဝင်ခွင့်ရဖို့ မျှော်လင့်ချက်က ဆက်လက်ရှင်သန်နိုင်ခဲ့ပြီဖြစ်ပါတယ်။ နော်တင်ဟမ်ကိုမပြောင်းခင် အီလန်ဂါဟာ ယူနိုက်တက်မှာ ၂ နှစ်ကြာကစားခဲ့ပြီး အခုရာသီမှာတော့ ခြေစွမ်းကောင်းတွေပြသနေကာ ၆ ဂိုးသွင်း ၊ ၈ ဂိုးဖန်တီးထားနိုင်ခဲ့ပါတယ်။ အဲ့နောက် အီလန်ဂါက ယူနိုက်တက် နဲ့ နော်တင်ဟမ်တို့ကြား ခြားနားချက်ကို ထုတ်ဖော်ပြောကြားခဲ့ပါတယ်။ “ယူနိုက်တက်မှာတုန်းက ကျွန်တော်တို့ဘောလုံးအများကြီးကိုင်ထားနိုင်ပါတယ်။ ကျွန်တော်ပြောသလို ဘောလုံးအများကြီးကိုင်ထားနိုင်သလို တန်ပြန်တိုက်စစ်လည်းလုပ်နိုင်ခဲ့ပါတယ်။

နော်တင်ဟမ်မှာတော့ အဲ့လိုမဟုတ်ပေမယ့် ကျွန်တော်တို့ ရတဲ့အခွင့်အရေးကို အကောင်းဆုံးအသုံးချနိုင်ခဲ့ပါတယ်။ အဲ့တာကိုလည်း ရာသီကြိုကတည်းက အလုပ်လုပ်ခဲ့တာပါ။ ကျွန်တော်တို့ တိုက်စစ်မှာနေရာလွတ်ရတာနဲ့ အလျင်အမြန်တိုက်စစ်ဆင်ပါတယ်။ နေရလွတ်မြင်တာနဲ့ ကျွန်တော်အလျင်အမြန်ပြေးပါတယ်။ ပြီးတော့ ကျွန်တော်ကိုယ်တိုင်ကလည်း လိဂ်ရဲ့အမြန်ဆုံးကစားသမားတွေထဲကတစ်ယောက်ဆိုတာကို ယုံကြည်ပါတယ်။

အဆုံးသတ်ပိုင်းကိုလည်း သေချာလေး လေ့ကျင့်ထားပါတယ်။ ဘယ်ခြေ ဒါမှမဟုတ် ညာခြေအကုန်အဆင်ပြေအောင် လုပ်ဆောင်ထားပါတယ်။ ကျွန်တော် ဆက်လက်တိုးတက်အောင် လုပ်ဆောင်နေပါတယ်။ ဒီမှာက ကျွန်တော် တိုးတက်လာနေပါတယ်။ ယူနိုက်တက်မှာ ကျွန်တော်အများကြီးသင်ယူခွင့်ရခဲ့တဲ့အတွက် ကျေးဇူးတင်ပါတယ်။ ကျွန်တော် အခုအခြေအနေကို နှစ်သက်နေပြီး ဆက်လက်လုပ်ဆောင်ချင်ပါတယ်”လို့ အီလန်ဂါက ပြောကြားခဲ့ပါတယ်။ ယူနိုက်တက်ဟာ လာမယ့်တနင်္ဂနွေနေ့မှာ မန်ချက်စတာဒါဘီပွဲကန်ရမှာဖြစ်ပြီး ဖောရက်စ်ကတော့ စနေနေ့မှာ ဗီလာနဲ့ရင်ဆိုင်ရမှာဖြစ်ပါတယ်။