အင်္ဂါနေ့တွင် ချန်ပီယံလိဂ်အုပ်စုအဆင့် ပထမအကျော့ပွဲစဉ်အဖြစ် နယူးကာဆယ် နှင့် မီလန်တို့ ကစားရတဲ့အခါမှာ ကစားသမားဟောင်းဖြစ်တဲ့ တိုနာလီအား နွေးထွေးစွာ ကြိုဆိုသွားမှာဖြစ်ကြောင်း ပီအိုလီက ပြောကြားလိုက်ပါတယ်။

တနင်္လာနေ့ မနက်က မီလန်နယ်လိုမှာ လေ့ကျင့်ရေးအပြီး Sky Sport Italia သို့ ပီအိုလီက "ကျွန်တော် သူ့ကို ပွဲမစခင်ရော ပွဲအပြီးမှာပါ ပွေ့ဖက်နှုတ်ဆက်မှာပါ။ ကျွန်တော်တို့က အတူတူ လုပ်ဆောင်ခဲ့သူတွေဖြစ်ပြီး နောက်ပွဲစဉ်တွေမှာ သူ့အတွက် အကောင်းဆုံးဖြစ်ပါစေလို့ ဆုတောင်းပေးပါတယ်" လို့ ပြောပါတယ်။

တိုနာလီဟာ ၃ ရာသီကြာကစားခဲ့တဲ့ မီလန်မှ ထွက်ခွာခဲ့ပြီး နယူးကာဆယ်သို့ ရောက်ရှိသွားခဲ့ကာ ယခုနွေရာသီဈေးကွက်ရဲ့ နာမည်အကြီးဆုံးနှင့် ဈေးအကြီးဆုံး အပြောင်းအရွှေ့တွေထဲက တစ်ခုဖြစ်လာခဲ့ပါတယ်။ တစ်နေ့နေမှာ ဆန်စီရိုသို့ ပြန်လာချင်ကြောင်း အသင်းကနေ ထွက်ခွာချိန်မှာ အသက် ၂၃ နှစ်အရွယ် ကစားသမားက ပြောကြားခဲ့ပြီး မကြာမီမှာ အသင်းဟောင်းနှင့် ပြန်လည်ဆုံဆည်းမှု ဖြစ်လာနိုင်တယ်လို့ ခန့်မှန်းမှုတွေရှိခဲ့ပါတယ်။

တိုနာလီဟာ မီလန်နှင့်ပွဲမှာ ပါဝင်ကစားဖို့ လုံလောက်တဲ့ ကြံ့ခိုင်မှု မရှိသေးတာကြောင်း စိုးရိမ်မှုများ ရှိနေပြီး ပြီးခဲ့တဲ့ရက်သတ္တပတ်က ကစားသမားဟာ တံကောက်ကြော ဒဏ်ရာကြောင့် အီတလီလက်ရွေးစင်အသင်းမှ နုတ်ထွက်ခဲ့ပါတယ်။ သို့သော်လည်း စနေနေ့မှာကစားခဲ့တဲ့ နယူးကာဆယ်ရဲ့ ဘရန့်ဖို့ဒ်ကိုအနိုင်ရခဲ့တဲ့ပွဲမှာ တိုနာလီက အရန်ခုံမှာ ရှိနေခဲ့တာက အင်္ဂါနေ့မှာကစားမယ့် ဥရောပပွဲစဉ်အတွက် ဆက်လက်ပါဝင်နိုင်ဖို့ အားတက်စရာလက္ခဏာဖြစ်ပါတယ်။