ချဲလ်ဆီးဟာ မန်ချက်စတာယူနိုက်တက်မှ အသင်းသို့အငှားစာချုပ်နဲ့ လာရောက်ကစားနေတဲ့ တောင်ပံကစားသမား ဂျေဒန်ဆန်ချိုကို ရာသီကုန်မှာ အိုးလ်ထရက်ဖို့ဒ်သို့ပြန်မပို့ဘဲ အပြီးသတ်ဝယ်ယူဖို့ စိတ်ဝင်စားနေတယ်လို့ သတင်းတွေက ဖော်ပြလာခဲ့ပါတယ်။ 

ယခုနှစ်ရာသီအစ ဩဂုတ်လမှာ အိုးလ်ထရက်ဖို့ဒ်မှထွက်ခွာပြီး စတန်းဖို့ဒ်ဘရစ်ချ်သို့ အငှားစာချုပ်နဲ့ရောက်ရှိလာခဲ့တဲ့ ဆန်ချိုကို ချဲလ်ဆီးအနေနဲ့ အပြီးသတ်ဝယ်ယူမယ်ဆိုပါက စာချုပ်ပါသဘောတူညီချက်တွေအရ ပေါင် ၂၅ သန်းအထိကုန်ကျသွားမှာဖြစ်ပြီး အပြီးသတ်ဝယ်ယူခွင့်ကို ပယ်ဖျက်ကာ ယူနိုက်တက်သို့ပြန်လည်စေလွှတ်မယ်ဆိုရင်တော့ ပေါင် ၅ သန်းကုန်ကျသွားမှာဖြစ်ပါတယ်။ 

ဆန်ချိုဟာ ချဲလ်ဆီးအတွက် ပြိုင်ပွဲစုံ ၂ ဂိုးသာသွင်းယူထားပြီး ပြီးခဲ့တဲ့နှစ်ဒီဇင်ဘာလကတည်းက ဂိုးပေါက်ပျောက်ခဲ့သလို၊ နည်းပြအန်ဇိုမာရက်စ်ကာရဲ့လက်အောက်မှာလည်း ပွဲထွက်ခွင့်ရဖို့ ရုန်းကန်နေရဆဲဖြစ်ပေမယ့် ချဲလ်ဆီးကတော့ အပြီးသတ်ခေါ်ယူဖို့ ပြင်ဆင်နေတာဖြစ်ပါတယ်။ ပြီးခဲ့တဲ့ရာသီက ဒေါ့မွန်ကို ချန်ပီယံလိဂ်ဗိုလ်လုပွဲသို့ပို့ဆောင်ပေးနိုင်ခဲ့တဲ့ အင်္ဂလန်သားကို ချဲလ်ဆီးဟာ အသင်းမှာ အကူအညီပေးပြီး ပုံမှန်ခြေစွမ်းပြန်လည်ရရှိစေဖို့ မျှော်လင့်နေတယ်လို့သိရပါတယ်။ 

တစ်ချိန်တည်းမှာပဲ မာရက်စ်ကာကလည်း ဆန်ချိုရဲ့စွမ်းဆောင်ရည်အပေါ် သဘောကျကျေနပ်ကြောင်းနဲ့ သူ့ရဲ့လက်အောက်မှာ တိုးတက်လာနိုင်ကြောင်း ပြောကြားထားခဲ့တာဖြစ်ပါတယ်။ ပြီးခဲ့တဲ့ရာသီက ဆန်ချိုဟာ ယူနိုက်တက်နည်းပြဟောင်း အဲရစ်တန်ဟက်နဲ့ လူသိရှင်ကြားပြဿနာတက်ခဲ့ပြီး အဆိုပါပြဿနာပြီးကတည်းက ယူနိုက်တက်အတွက် ပြန်လည်ကစားခွင့်မရခဲ့ပါဘူး။ 

ဇန်နဝါရီအပြောင်းအရွှေ့ဈေးကွက်မှာ ချဲလ်ဆီးဟာ ယူနိုက်တက်တောင်ပံကစားသမား အလီဂျန်ဒရိုဂါနာချိုကို ပစ်မှတ်ထားပြီး အသင်းရဲ့တောင်ပံကို အင်အားဖြည့်တင်းဖို့ပြင်ဆင်ခဲ့ပေမယ့် ယခုအခါမှာတော့ ဆန်ချိုကိုသာ အပြီးသတ်ဝယ်ယူနိုင်ရေး ဆောင်ရွက်သွားဖွယ်ရှိနေပါတယ်။