ချဲလ်ဆီးဂန္ထဝင်ကစားသမားဟောင်း အက်ရှ်လေကိုးလ်က သူဟာ အာဆင်နယ်နဲ့လမ်းခွဲပြီးနောက် စတန်းဖို့ဒ်ဘရစ်ချ်သို့မရောက်ခင်မှာ လာလီဂါထိပ်သီးကလပ် ရီးရဲလ်မက်ဒရစ်သို့ပြောင်းရွှေ့ဖို့ အလွန်နီးစပ်ခဲ့သေးကြောင်း ထုတ်ဖော်ပြောကြားလာခဲ့ပါတယ်။ အက်ရှ်လေကိုးလ်ဟာ ပရီးမီးယားလိဂ်မှာ စုစုပေါင်း ၃၈၄ ပွဲကစား၊ ၁၅ ဂိုးသွင်းပြီး ဂိုးဖန်တီးမှု ၃၅ ကြိမ်အထိ ပြုလုပ်နိုင်ခဲ့တဲ့ ဂန္ထဝင်ကစားသမားဟောင်းဖြစ်တာကြောင့် ယခုနှစ် ပရီးမီးယားလိဂ်ရဲ့ဂုဏ်ပြုအထူးဆုကို လက်ခံရရှိခဲ့ပါတယ်။ 

သို့သော်လည်း ကိုးလ်ရဲ့ကစားသမားဘဝဟာ အစစအရာရာချောမွေ့အဆင်ပြေခဲ့ခြင်းမရှိဘဲ အာဆင်နယ်နဲ့ စာချုပ်သစ်ဆွေးနွေးမှု မအောင်မြင်ခဲ့ပြီးနောက် ကလပ်အသစ်ကိုရှာဖွေခဲ့ရပါတယ်။ အင်္ဂလန်သားကို လာလီဂါထိပ်သီးကလပ်တွေဖြစ်တဲ့ ဘာစီလိုနာနဲ့ ရီးရဲလ်မက်ဒရစ်တို့က စိတ်ဝင်စားခဲ့ကြပေမယ့် နောက်ဆုံးမှာတော့ ချဲလ်ဆီးသို့သာ ရောက်ရှိသွားခဲ့တာဖြစ်ပါတယ်။ 

ယခုအခါမှာတော့ အက်ရှ်လေကိုးလ်က သူဟာ ရီးရဲလ်မက်ဒရစ်သို့ပြောင်းရွှေ့ဖို့ စိတ်အားထက်သန်ခဲ့ပေမယ့် မင်္ဂလာပွဲကြောင့် အတားအဆီးဖြစ်ခဲ့ကြောင်း ဖွင့်ဟပြောကြားလာခဲ့ပါတယ်။ ချဲလ်ဆီးနောက်ခံလူဟောင်းက "ကျွန်တော် အာဆင်နယ်မှာ နည်းနည်းအထင်သေးခံခဲ့ရပြီး ကျွန်တော့်ကိုတန်ဖိုးမထားဘူးလို့လည်း ခံစားခဲ့ရပါတယ်။ ဒါကြောင့်ကျွန်တော်ထွက်ခွာဖို့ ဆုံးဖြတ်ခဲ့ပြီး ရီးရဲလ်မက်ဒရစ်ကိုရွေးချယ်ခဲ့ပါတယ်။ အာဆင်နယ်မှာတော့ ကျွန်တော်ဆက်ရှိနေတုန်းပါ"

"ပြီးတော့ကျွန်တော် နိုင်ငံခြားကအသင်းတစ်သင်းနဲ့ ကြိုတင်စာချုပ်ချုပ်ဆိုနိုင်တဲ့ ကိုယ်စားလှယ်တွေနဲ့ စကားပြောနေခဲ့တာပါ။ ရီးရဲလ်မက်ဒရစ်ကိုယ်စားလှယ်တွေနဲ့ဆွေးနွေးခဲ့သလို၊ ဘာစီလိုနာလည်းပါပါတယ်။ ကျွန်တော်တို့ရဲ့ဆွေးနွေးမှုတွေက ဘယ်လောက်အထိ လေးနက်ခဲ့သလဲဆိုတာတော့ ကျွန်တော်မသိပါဘူး"

"နောက်ပိုင်းမှာတော့ အခြေအနေတွေပြောင်းလဲသွားတယ်။ ကျွန်တော် လက်ထပ်လိုက်ရတယ်။ ဒီတော့ ကျွန်တော်အင်္ဂလန်ကနေ မခွာချင်တော့ပါဘူး။ တစ်နှစ်ခွဲလောက်ကြာတော့ ကျွန်တော့်ရဲ့အေးဂျင့်နဲ့အတူတူထိုင်နေတုန်း သူကကျွန်တော့်ကိုအပြင်ခေါ်ပြီး ချဲလ်ဆီးဆီကနေ ကမ်းလှမ်းမှုရထားကြောင်း ပြောခဲ့ပါတယ်။ ကျွန်တော်ကလည်း သဘောတူခဲ့ပါတယ်" လို့ပြောကြားခဲ့ပါတယ်။ 

ကိုးလ်ဟာ ၂၀၀၆ ခုနှစ် စက်တင်ဘာလမှာ စတန်းဖို့ဒ်ဘရစ်ချ်သို့စတင်ပြောင်းရွှေ့ခဲ့ပြီး ထိုစဉ်က ချဲလ်ဆီးကိုကိုင်တွယ်နေတဲ့ ‌ဟိုဆေးမော်ရင်ဟိုရဲ့လက်အောက်မှာထွန်းတောက်လာခဲ့ကာ ကလပ်ဂန္ထဝင်တစ်ဦးဖြစ်လာခဲ့ပါတယ်။ ချဲလ်ဆီးအတွက်စုစုပေါင်း ၃၃၇ ပွဲအထိကစားခဲ့တဲ့ ကိုးလ်ဟာ အသင်းနဲ့အတူ ပရီးမီးယားလိဂ်၊ အက်ဖ်အေဖလား ၄ ကြိမ်၊ ချန်ပီယံလိဂ်နဲ့ ယူရိုပါလိဂ်ဖလားတွေကို ဆွတ်ခူးနိုင်ခဲ့ပါတယ်။