လန်ဒန်ဒါဘီပွဲမတိုင်မီ အက်စ်တီဗာအိုကို သတင်းစကားပါးလိုက်တဲ့ မာတင်နယ်လီ
အာဆင်နယ်တောင်ပံကစားသမား ဂါဘရီယယ် မာတီနယ်လီက ဘရာဇီးလ်အသင်းဖော် အက်စ်တီဗာအို ချဲလ်ဆီးကိုရောက်ပြီး ခြေစွမ်းပြနေတာကို မအံ့သြပါဘူးလို့ ပြောပါတယ်။
အက်စ်တီဗာအိုဟာ ဘရာဇီးလ်ကလပ် ပါးမီးရတ်စ်ကနေ ချယ်လ်ဆီးကို ပေါင် ၂၉ သန်း ကနဦးကြေးနဲ့ နွေရာသီမှာ ပြောင်းရွှေ့လာခဲ့တာဖြစ်ပါတယ်။ အသက် ၁၈ နှစ်အရွယ်ကစားသမားဟာ ချက်ချင်းဆိုသလို ခြေစွမ်းပြခဲ့ပြီး အင်္ဂါနေ့က ဘာစီလိုနာကို သွင်းယူခဲ့တဲ့ဂိုးဟာ ဒီရာသီ ၅ ဂိုးမြောက်ဖြစ်ပါတယ်။
တနင်္ဂနွေနေ့ ချဲလ်ဆီးနဲ့ပွဲစဉ်မှာ အက်စ်တီဗာအိုနဲ့ ရင်ဆိုင်ရမယ့် မာတီနယ်လီက တိုက်စစ်မှူးရဲ့ စွမ်းဆောင်ရည်တွေအပေါ် အံ့အားသင့်ခြင်းမရှိပါဘူး။ မာတင်နယ်လီက"သူက ကောင်းတဲ့ကောင်လေးပါ၊ သူ့မိသားစုကလည်း ဒီအတိုင်းပါပဲ၊ လူတိုင်းက အရမ်းရိုကျိုးကြပါတယ်။ သူတို့ ဒီမှာလုပ်နေတာတွေအားလုံးနဲ့ ထိုက်တန်ပါတယ်။
ဒီကောင်လေးက အရမ်းတော်ပါတယ်။ နိုင်ငံအသင်းမှာရှိတဲ့ လူတိုင်းကလည်း သူ့ကိုချစ်ကြပါတယ်။ သူလုပ်နေတဲ့အရာတိုင်းနဲ့ ထိုက်တန်ပါတယ်။ ဒါပေမဲ့ တနင်္ဂနွေနေ့မှာ သူခြေစွမ်းမပြပါစေနဲ့လို့ပဲ ကျွန်တော် မျှော်လင့်ပါတယ်။ နိုင်ငံအသင်းမှာ ကျွန်တော်တို့ စကားပြောဖြစ်ခဲ့ကြတယ်။ ကျွန်တော်နဲ့ သူတင်မဟုတ်ပါဘူး၊ အားလုံးပါပဲ။
သူမလာခင်ကတည်းက သူဘယ်လောက်ကောင်းလဲဆိုတာ ကျွန်တော်တို့ သိခဲ့ကြပါတယ်။ ဘာလို့လဲဆိုတော့ သူ့ကို ဘရာဇီးလ်ကတည်းက သိခဲ့လို့ပါ။ သူ အရာအားလုံးနဲ့ ထိုက်တန်ပါတယ်၊ ဒါကြောင့် သူ့အတွက် ဂုဏ်ယူပါတယ်"လို့ ပြောခဲ့ပါတယ်။
