ဖိအားတွေတိုးလာပေမဲ့ အသင်းအတွက်ဆက်လက်တိုက်ပွဲဝင်မယ်လို့ အန်းစလော့ ကတိပြု
အန်းစလော့က လီဗာပူးအသင်းရဲ့ ဆိုးရွားတဲ့ရလဒ်တွေအပေါ် ဆက်လက်တိုက်ပွဲဝင်သွားမှာဖြစ်ပြီး ကလပ်ပိုင်ရှင်တွေနဲ့ ဆွေးနွေးမှုတွေက အပြောင်းအလဲမရှိဘူးလို့ ပြောခဲ့ပါတယ်။
ပရီးမီးယားလိဂ်လက်ရှိချန်ပီယံတွေဟာ ဗုဒ္ဓဟူးနေ့ညက ချန်ပီယံလိဂ်ပွဲစဉ်မှာ ပီအက်စ်ဗွီကို အိမ်ကွင်းမှာ ၄-၁ ဂိုးနဲ့ အရေးနိမ့်ခဲ့ခြင်းအပါအဝင် ပြိုင်ပွဲစုံ နောက်ဆုံး ၁၂ ပွဲမှာ ၉ ပွဲရှုံးထားပါတယ်။
ပီအက်စ်ဗွီနဲ့ပွဲအပြီး ကလပ်ပိုင်ရှင်တွေနဲ့ စကားပြောဖြစ်ခဲ့လားလို့ မေးတဲ့အခါ ဒတ်ခ်ျလူမျိုးနည်းပြက "ဒီကိုရောက်ကတည်းက အတူတူပဲ ဆွေးနွေးခဲ့ကြပါတယ်။ ကျွန်တော်တို့ ဆက်တိုက်ပွဲဝင်သွားမှာပါ။ ပြီးတော့ တိုးတက်အောင် ကြိုးစားမှာပါ၊ ဒါက ကျွန်တော်တို့အားလုံး ကြိုးစားနေတဲ့အရာပါ။ ဒါပေမဲ့ ဒီစကားပြောဆိုမှုတွေက ပြီးခဲ့တဲ့ တစ်နှစ်ခွဲလောက်ကအတိုင်းပါပဲ"လို့ ပြောခဲ့ပါတယ်။
အန်းစလော့က လီဗာပူးရဲ့ စံနှုန်းတွေ ကျဆင်းသွားတာကို ဝန်ခံခဲ့ပေမဲ့ ကစားသမားတွေက သူ့ကို စိတ်ပျက်အောင်မလုပ်ခဲ့ဘူးလို့ အခိုင်အမာပြောကြားခဲ့ပါတယ်။ အန်းစလော့က"ကျွန်တော်တို့ အခုကစားနေတာထက် ပိုကောင်းအောင် ကစားနိုင်မယ်လို့ ထင်ပါတယ်။ ဒါပေမဲ့ ပြီးခဲ့တဲ့ရာသီက ကျွန်တော်တို့ တကယ်ကောင်းကောင်းလုပ်နိုင်ခဲ့တဲ့အခါ တချို့သောကစားသမားတွေအပေါ် အာရုံစိုက်မှုတွေ အများကြီးရှိခဲ့ပါတယ်။ ကျွန်တော်ကတော့ အမြဲတမ်း အသင်းအကြောင်းဖြစ်သင့်တယ်လို့ ပြောခဲ့ပြီး အသင်းကသာ ကစားသမားတစ်ဦးချင်းစီကို ကောင်းမွန်အောင် လုပ်ပေးတာပါ။
ဆန့်ကျင်ဘက်ဖြစ်နေရင်လည်း တစ်ဦးချင်းစီကို မဟုတ်ဘဲ အသင်းကိုပဲ ကြည့်ရမှာပါ"လို့ ပြောခဲ့ပါတယ်။ လီဗာပူးအသင်းဟာ တနင်္ဂနွေညမှာ ဝက်စ်ဟမ်းအသင်းနဲ့ အဝေးကွင်းပွဲစဉ် ရင်ဆိုင်ကစားရမှာ ဖြစ်ပါတယ်။
