လီဗာပူးနည်းပြအန်းစလော့က အခုလိုအခြေအနေမျိုးမှာ ပရီးမီးယားလိဂ်ချန်ပီယံဆုကို အရမယူနိုင်ဘူးဆိုရင် လာမယ့်ဆယ်စုနှစ်များစွာအထိ အသင်းကစားသမားအတွက် ခြောက်အိပ်မက်ဖြစ်သွားလိမ့်မယ်လို့ သတိပေးစကားဆိုလာခဲ့ပါတယ်။ ကြိုးကြာနီတွေက အခုနိုင်ငံတကာသီတင်းပတ်အပြီး လိဂ်ကိုးပွဲကစားဖို့ကျန်ရှိချိန် ဒုတိယနေရာမှာရှိနေတဲ့ အာဆင်နယ်ထက် ၁၂ မှတ် အသာစီးရရှိထားပါတယ်။

အခုလိုကာလမျိုးမှာ အခုလိုအခြေအနေမျိုးအထိ ပြိုင်ဘက်ကို အမှတ်ဖြတ်တောက်ထားနိုင်တဲ့ ဘယ်အသင်းမဆို လိဂ်အမှတ်ပေးချန်ပီယံဆုနဲ့ မလွဲချော်ခဲ့ဖူးပေမယ့် လွန်ခဲ့တဲ့သီတင်းပတ်အနည်းငယ်အတွင်း ပေါ်ပေါက်ခဲ့တဲ့အရာတွေက အန်ဖီးလ်ရပ်ဝန်းအတွက်တော့ စိတ်မသက်မသာဖြစ်စေခဲ့ပါတယ်။ အန်းစလော့ရဲ့အသင်းက ပီအက်စ်ဂျီကို ပယ်နယ်တီအဆုံးအဖြတ်ဖြင့် အရေးနိမ့်ကာ ချန်ပီယံလိဂ်ပြိုင်ပွဲမှ ထွက်ခွာခဲ့ရသလို ရက်ပိုင်းအကြာမှာပဲ ကာရာဘောင်းဖလားလက်ရှိချန်ပီယံဘွဲ့ကို စွန့်လွှတ်ခဲ့ရပါတယ်။

မာဆေးဆိုဒ်ဒေသခရီးစဉ်အကြောင်း အသေးစိတ်ဖော်ပြထားတဲ့ စာအုပ်သစ်မှာ ဒတ်ချ်လူမျိုးနည်းပြက “ဆုဖလားတွေ ဘယ်လိုရယူရမလဲဆိုတာ ကျွန်တော်သိပါတယ်။ နည်းပြပဲဖြစ်ဖြစ်၊ ကစားသမားပဲဖြစ်ဖြစ် ဆုဖလားမကိုင်မြှောက်နိုင်ခဲ့ဘူးဆိုရင် ဆယ်စုနှစ်များစွာ နာကျင်သွားနိုင်ပါလိမ့်မယ်။

အဲ့ဒီအတွက် အမှတ်ရစရာနည်းလမ်းတွေ အများကြီးရှိပါတယ်။ ၁၉၇၄ ကမ္ဘာ့ဖလားပြိုင်ပွဲဝင် ဟော်လန်းအသင်းကို ကြည့်လိုက်ပါ။ လူတိုင်းက ဒီပြိုင်ပွဲမှာ ဟော်လန်အသင်းဗိုလ်စွဲမယ်လို့ ယူဆခဲ့ကြပါတယ်။ ဒါပေမယ့် ဟော်လန်အသင်းက ဆုဖလားကို အိမ်အထိ မသယ်ဆောင်သွားနိုင်ခဲ့ပါဘူး။ ဒီလိုဖြစ်လာရတာ သူတို့ရဲ့ကစားဟန်နဲ့လည်း သက်ဆိုင်ပါတယ်။

အမှန်ပါပဲ၊ ကျွန်တော်လည်း တက်နိုင်သလောက် နိုင်ပွဲတွေ အများကြီးရရှိချင်ပါတယ်။ ဒါပေမယ့် ကျွန်တော့်ကို လူတွေရဲ့အသိစိတ်ထဲမှာ စွဲစွဲမြဲမြဲကျန်ရှိနေဖို့ဆိုတာ ဆုဖလားကသာ လုပ်ဆောင်ပေးနိုင်လိမ့်မယ်လို့ မြင်ပါတယ်။ လူတွေက ကျွန်တော့်ကို တိုက်စစ်အားသန်နည်းပြတစ်ဦးလို့ ပြောဆိုလာမှုတွေအပေါ် သဘောကျမိပါတယ်။ တိုက်စစ်ဆင်နေသမျှကာလပတ်လုံး အနိုင်ရရှိသူတစ်ဦးအဖြစ် ပေါ်ထွက်လာနိုင်မယ့်အခွင့်အလမ်းတွေ တိုးမြှင့်သွားစေပါတယ်။

ကြောက်ရွံ့မှုတွေနဲ့အတူ ရွေးချယ်နေရတာထက် ဆုလာဒ်တွေ သယ်ဆောင်ပေးလာနိုင်တယ်ဆိုတဲ့ စိတ်ကူးမျိုးနဲ့အတူ အသင်းအဖွဲ့အလိုက် စွန့်စားမှုတွေ ပိုပြီးလုပ်ဆောင်ကြပါ။အနာဂတ်မှာလည်း ကျွန်တော့်အတွက် ရှုံးပွဲတွေ အများကြီးရှိလာလိမ့်မယ်ဆိုတာ သေချာပါတယ်။ ဒါပေမယ့် ကျွန်တော်ကတော့ ခံစစ်ကစားရင်းနဲ့ အဲ့ဒီလိုရှုံးပွဲမျိုးတွေကို မရင်ဆိုင်သွားချင်ဘူး။

ဒီလိုရက်တွေမှာ Team-talk တွေလုပ်ဆောင်ချိန် ကျွန်တော့်အတွက် ကြောက်လန့်စရာမရှိပါဘူး။ ကျွန်တော့်ရဲ့တိုက်စစ်အားသန်အစီအစဉ်တွေက အလုပ်ဖြစ်လာလိမ့်မယ်လို့ အပြည့်အဝယုံကြည်ထားပါတယ်။ ကျွန်တော့်မှာ ကြောက်ရွံ့ဖို့အတွက် နေရာပေးထားတဲ့အခန်းကဏ္ဍ မရှိပါဘူး။ ကိုယ်မြင်တွေ့နေရတဲ့အရာနဲ့ ယုတ္တိဗေဒအခြေခံသဘောတရားတွေအပေါ် မူတည်ပြီး ဆုံးဖြတ်ချက်တွေ ချမှတ်ပါတယ်။

ပက်ဂွါဒီယိုလာနဲ့ တစ်ခန်းတည်းရှိနေချိန် Team-talk ပြောရမယ်ဆိုရင်တော့ ကျွန်တော် ထိတ်လန့်ကောင်းထိတ်လန့်သွားနိုင်ပါတယ်။ ကျွန်တော်ရဲ့အသင်းက ပြိုင်ဘက်တွေအတွက် ခန့်မှန်းဖို့ အရမ်းခက်ခဲစေမယ့် စနစ်တစ်ခုနဲ့ ကစားနေခြင်းကိုပဲ လိုလားပါတယ်”လို့ ပြောပါတယ်။