အန်းစလော့က ပွဲစဉ်တွေကစားပြီးချိန်တိုင်း ယာဂန်ကလော့ပ်နဲ့ မကြာခဏဆိုသလို ဖုန်းမှတဆင့် စကားပြောဖြစ်တယ်လို့ ဝန်ခံခဲ့ပေမယ့် သူတို့နှစ်ဦးအကြား ခက်ခဲကြမ်းတမ်းလာတဲ့ ပရီးမီးယားလိဂ်ချန်ပီယံပြေးလမ်းအကြောင်း မဆွေးနွေးဖြစ်ပါဘူးလို့ ရှင်းပြခဲ့ပါတယ်။လီဗာပူးနည်းပြဘဝသက်တမ်းတလျှောက် အသင်းအတွက် ပရီးမီးယားလိဂ်ချန်ပီယံဆုတစ်ကြိမ် ရယူပေးခဲ့ဖူးတဲ့ ယာဂန်ကလော့ပ်က အချိန်အများစုမှာတော့ မန်စီးတီးကို ပွတ်ကာသီကာရှုံးနိမ့်ကာ အင်္ဂလန်ထိပ်တန်းလိဂ်ချန်ပီယံဆုကို ဒုတိယအကြိမ်မြောက် ရယူနိုင်ရေး လက်မတင်လေးလွဲချော်ခဲ့ရပါတယ်။

အခုဘောလုံးရာသီအတွက် ပရီးမီးယားလိဂ်ချန်ပီယံပြေးလမ်းကို မန်စီးတီးတို့ စွန့်ခွာသွားမှုနဲ့အတူ အန်းစလော့ရဲ့အသင်းက အနီးဆုံးပြိုင်ဘက်အာဆင်နယ်ထက် တစ်ပွဲပိုကစား၊ ရှစ်မှတ်အသာဖြင့် အမှတ်ပေးဇယားထိပ်ဆုံးနေရာမှာ ရပ်တည်နေပါတယ်။ ဒတ်ချ်လူမျိုးနည်းပြကတော့ အတိတ်ကာလ ပရီးမီးယားလိဂ်ဘောလုံးပြိုင်ပွဲမှ သင်ခန်းစာယူစရာတွေ အများကြီးရှိပါတယ်လို့ ပြောပါတယ်။

အန်းစလော့က “သမိုင်းကြောင်းတွေ (သို့မဟုတ်) လတ်တလောနှစ်ကာလတွေဆီမှ သင်ယူစရာအချို့ အမြဲတမ်းရှိပါတယ်။ ဒါပေမယ့် ဒီတစ်ကြိမ်မှာတော့ မတူညီတဲ့ပြိုင်ဘက်နဲ့ရင်ဆိုင်ရပြီး ကျွန်တော်တို့မှာလည်း မတူညီတဲ့အသင်းတစ်ခု ရှိပါတယ်။ ကျွန်တော်တို့ရဲ့လက်ရှိအသင်းမှာ မန်စီးတီးနဲ့အတူ ပရီးမီးယားလိဂ်ချန်ပီယံပြေးလမ်းထက် ယှဉ်ပြိုင်ခဲ့ဖူးတဲ့ ကစားသမားအချို့လည်း ပါဝင်နေပါတယ်။

အသင်းကစားသမားအများစုကတော့ ဒီချန်ပီယံပြေးလမ်းအတွက် အတွေ့အကြုံမရှိသေးဘူးလို့ ထင်ပါတယ်။ ဒါကြောင့် သင်ယူစရာ တစ်ခု(သို့မဟုတ်) နှစ်ခုလောက်တော့ ရှိနိုင်ပါတယ်။ ဒါပေမယ့် ယေဘုယျအားဖြင့် ကစားသမားသစ်တွေနဲ့အတူ ဘောလုံးရာသီသစ်တစ်ခုဖြစ်တယ်လို့ ထင်ပါတယ်။ ဒီအပိုင်းတွေကို နှိုင်းယှဉ်ကြည့်လို့ မရပါဘူး။ ရာသီကုန်မှာ ဘယ်အသင်းက ဘာတွေဖြစ်သွားမလဲဆိုတာ ကျွန်တော်မသိပါဘူး။ ဒီအပိုင်းမှတဆင့် တစ်ခုခုရယူသွားဖို့ဆိုတာ ခက်ခဲပါတယ်။ ဒါပေမယ့် အတွေ့အကြုံရှိတဲ့ကစားသမားတွေဆီမှ သင်ယူသွားနိုင်စရာတခုခုတော့ ရှိပါလိမ့်မယ်။ ကျွန်တော်တို့တွေ ဒီအကြောင်းအရာကို မကြာခဏပြောဖြစ်ပေမယ့် အများကြီးတော့ မပြောဖြစ်ပါဘူး”လို့ ဆိုပါတယ်။

ယာဂန်ကလော့ပ်နဲ့ ဘာတွေပြောဖြစ်တယ်ဆိုတာကို ရှင်းပြရာမှာ အန်းစလော့က “ မဟုတ်ပါဘူး၊ ကျွန်တော်တို့တွေ အမှတ်ပေးချန်ပီယံဆုပြေးလမ်းအကြောင်း မဆွေးနွေးဖြစ်ပါဘူး။ သူက ပွဲစဉ်တစ်ခုအပြီးမှာ ချီးကျူးစကားတွေပဲ အမြဲတမ်းပို့ဆောင်ပေးလေ့ ရှိပါတယ်။ ယာဂန်ကလော့ပ်ဆီ ကျွန်တော်ပြောနိုင်တဲ့အရာတစ်ခုက ကျွန်တော့်မှာလည်း ချန်ပီယံပြေးလမ်းနဲ့ပတ်သက်လို့ အတွေ့အကြုံရှိတယ် ဆိုတာပါပဲ။

လီဗာပူးအသင်း ပရီးမီးယားလိဂ်ချန်ပီယံဖြစ်လာတဲ့အချိန်တုန်းက ရမှတ်ကွာဟမှု ၂၅ မှတ်အထိ ရှိခဲ့ပါတယ်။ ဒါက ဘောလုံးရာသီတစ်ခုမှာ ပုံမှန်လိုလို ကြုံတွေ့ရတဲ့ အရာမျိုး မဟုတ်ပါဘူး။ ပြင်သစ်မှလွဲလို့ပေါ့။ ပြင်သစ်မှာတော့ ပီအက်စ်ဂျီက အခုလိုရမှတ်ကွာဟမှုမျိုးကို အမြဲတမ်းလုပ်ဆောင်နိုင်လေ့ ရှိပါတယ်။ ဒါပေမယ့် အခြားလိဂ်ပြိုင်ပွဲတိုင်းလိုလိုမှာတော့ ရမှတ်ကွာဟမှုက အဆုံးသတ်ချိန်မတိုင်ခင် ကျဉ်းမြောင်းလေ့ရှိပါတယ်”လို့ ဆိုပါတယ်။

အန်းစလော့နဲ့လီဗာပူးအသင်းက ပြီးခဲ့တဲ့အပြောင်းအရွှေ့ဈေးကွက်နှစ်ခုအတွင်း အကျိုးသက်ရောက်မှုနည်းပါးတဲ့ ချီယေဆာတစ်ဦးတည်းကိုသာ ခေါ်ယူအားဖြည့်ခဲ့လို့ ဝေဖန်မှုတွေနဲ့ ရင်ဆိုင်ခဲ့ရပါတယ်။ အခုဘောလုံးရာသီအလွန် လှုပ်ရှားမှုများပြားမယ့် နွေရာသီဈေးကွက်လိုမျိုး ဖြစ်လာမလားဆိုပြီး မေးမြန်းလာချိန် လီဗာပူးနည်းပြက တိုက်စစ်ပိုင်းပြုပြင်ပြောင်းလဲဖို့ ဆွေးနွေးမှုတွေမှာ ပါဝင်သွားဖို့ ငြင်းဆန်ခဲ့ပါတယ်။

ဒါပေမယ့် သူက “ကျွန်တော်တို့တွေ နေရာတိုင်းအတွက် ကြည့်ရှုနေသလို အသင်းအတွက်လည်း ကြည့်ရှုပေးနေပါတယ်။ ပြီးခဲ့တဲ့နွေရာသီကာလတုန်းကလည်း ဒီအကြောင်းအရာကို အကြိမ်များစွာ ပြောဖြစ်ခဲ့ပါတယ်။ ကျွန်တော်တို့တွေ အများကြီးမလုပ်ဆောင်ခဲ့ပါဘူး။ ဘာကြောင့်လဲဆိုတော့ အားကစားဒါရိုက်တာရစ်ချတ်ဟုဂျ်အပါအဝင် ကျွန်တော်တို့အားလုံးက နည်းပြသစ်ဖြစ်တဲ့ ကျွန်တော်နဲ့ ဘယ်ကစားသမားတွေ အလုပ်တွဲလုပ်နိုင်မလဲဆိုတာကိုပဲ သိချင်ခဲ့လို့ ဖြစ်ပါတယ်။

အခုအချိန်မှာတော့ ဒီအပိုင်းနဲ့ပတ်သက်လို့ အရမ်းကောင်းတဲ့အကြံအစည်တစ်ခု ရှိနေပါပြီ။ ကျွန်တော်က ခင်ဗျားတို့ဆီ ဘယ်အပိုင်းကို ပြင်ဆင်သွားလိမ့်မယ်ဆိုတာ မပြောပြနိုင်ပါဘူး။ ဒါ ရှင်းပါတယ်။ ဒါပေမယ့် ကျွန်တော်တို့တွေ အသင်းလူစာရင်းပိုင်းနဲ့ တိုးတက်ဖို့လိုအပ်နေသေးတဲ့အရာတွေကို လေ့လာအကဲဖြတ်ခဲ့ပါတယ်။ ဒါကသာ လာမယ့်နွေရာသီမှာ ကျွန်တော်တို့ ကြိုးစားသွားရမယ့်အရာ ဖြစ်ပါတယ်။

ဒါပေမယ့် တကယ့်ကိုအရေးကြီးလှတဲ့ နှစ်လ၊ သုံးလတာကာလကို ကျော်ဖြတ်သွားရဦးမှာပါ။ ပြီးတော့ ကျွန်တော်တို့အတွက် အထူးဂရုပြုရမယ့် စာချုပ်သက်တမ်းကိစ္စအချို့လည်း ရှိပါတယ်။ ဒါတွေက ကန့်လန်ကာနောက်ကွယ်မှာ များစွာသောအလုပ်ကို လုပ်သွားရမယ့်ကိစ္စတွေ ဖြစ်ပါတယ်။ ဒါပေမယ့် ကျွန်တော်က လက်ရှိအသင်းလူစာရင်းအပေါ်မှာပဲ အဓိကအာရုံစိုက်ထားပါတယ်”လို့ ပြောပါတယ်။