ဖောရက်စ်ကိုအရေးနိမ့်ခဲ့ပြီးနောက် ယူနိုက်တက်နည်းပြ အာမိုရင်က ဂါနာချိုတစ်ယောက် အကောင်းဆုံးရွေးချယ်မှုမလုပ်ခဲ့ဘူးလို့ ပြောကြားလိုက်ပါတယ်။ယူနိုက်တက်ဟာ ဖောရက်စ်နဲ့ပွဲမှာ ကန်ချက် ၂၄ ကြိမ်အထိရခဲ့ပေမယ့် ဖောရက်စ်ဂိုးသမား ဆဲလ်ကိုဒုက္ခပေးနိုင်ခဲ့ခြင်းမရှိတာဖြစ်ပါတယ်။ အဆိုပါပွဲမှာ ဂါနာချိုဟာ ကန်ချက် ၆ ကြိမ်အထိရခဲ့ပြီး ယူနိုက်တက်ရဲ့ဘယ်ကစားသမားထက်မဆို ပိုများခဲ့တာဖြစ်ပါတယ်။

ဖောရက်စ်က ယူနိုက်တက်ကို စတားဟောင်း အီလန်ဂါရဲ့တစ်လုံးတည်းသောဂိုးနဲ့ အနိုင်ရခဲ့တာဖြစ်ပါတယ်။ ဂါနာချိုကို ချဲလ်ဆီး နဲ့ နာပိုလီတို့က ဇန်နဝါရီအပြောင်းအရွှေ့မှာ ခေါ်ယူဖို့ ချိတ်ဆက်ခဲ့သေးတာဖြစ်ပါတယ်။ ပွဲအပြီးသတင်းစာရှင်းပွဲမှာ အာမိုရင်က ဂါနာချိုနဲ့ပတ်သက်ပြီး ကာကွယ်ပြောကြားခဲ့သလို သူ့ရဲ့အားစိုက်ထုတ်မှုအတွက် ကျေနပ်မိတယ်လို့ ပြောကြားခဲ့ပါတယ်။

“သူကြိုးစားခဲ့ပါတယ်။ တစ်ချို့အချိန်တွေမှာ ဂိုးဧရိယာထဲ မှန်ကန်တဲ့ဆုံးဖြတ်ချက်ချမှတ်နိုင်ပေမယ့် တစ်ချို့အချိန်တွေမှာဆိုရင် မမှန်တာတွေရှိနိုင်ပါတယ်။ အဲ့တာက ပွဲအတွင်းမှာဖြစ်နိုင်ပါတယ်။ အရေးအကြီးဆုံးအရာက ပွဲအတွင်းမှာရှိနေဖို့ပါ။မှန်ပါတယ်။ ကျွန်တော်တို့ တစ်ဦးချင်းကျော်ဖြတ်နိုင်တဲ့ကစားသမားမျိုးလိုအပ်ပါတယ်။ တစ်ချို့အချိန်တွေမှာ သူအများကြီးကြိုးစားခဲ့ပါတယ်။ ဒိုဂူနဲ့ချိတ်ဆက်ပြီး တွဲလုပ်ခဲ့ပေမယ့် သူအသင်းကိုကူညီဖို့ အကောင်းဆုံးလုပ်ဆောင်ပေးနိုင်ခဲ့ပါတယ်။ ဒီနေ့ပွဲမှာ သူအကောင်းဆုံးရွေးချယ်မှုမလုပ်နိုင်ခဲ့ပါဘူး”လို့ အာမိုရင်က ပြောကြားခဲ့ပါတယ်။

ဂါနာချိုဟာ ဒီရာသီပြိုင်ပွဲစုံ ၈ ဂိုးသွင်း ၊ ၈ ဂိုးဖန်တီးထားနိုင်ခဲ့ပြီး လာမယ့်တနင်္ဂနွေနေ့မှာ ယူနိုက်တက်ဟာ မန်ချက်စတာဒါဘီပွဲဆင်နွှဲရမှာဖြစ်ပါတယ်။ အဲ့နောက် လာမယ့်အပတ်မှာ ယူရိုပါလိဂ်ပထမအကျော့ပွဲအဖြစ် လိုင်ယွန်အသင်းနဲ့ရင်ဆိုင်ရမှာဖြစ်ပါတယ်။