အမေရိကန်လက်ရွေးစင်နည်းပြ မောရီစီယို ပိုချက်တီနိုက သူ့အနေနဲ့ ကမ္ဘာ့ဖလားပြိုင်ပွဲမှာ ဖိအားတွေရှိနိုင်ပေမယ့် လာမယ့် ၅ နှစ်၊ ၁၀ နှစ်အတွင်းမှာတော့ အသင်းကို ကမ္ဘာ့ဘောလုံးလောကရဲ့ ထိပ်ဆုံးနေရာသို့ပို့ပေးနိုင်ကြောင်း ပြောကြားလာခဲ့ပါတယ်။ 

ကွန်ကာကက်ဖ်နေရှင်းလိဂ် ဆီမီးဖိုင်နယ်ပွဲစဉ်အဖြစ် လာမယ့်သောကြာနေ့မှာ အမေရိကန်ဟာ ပနားမားနဲ့ယှဉ်ပြိုင်သွားရမှာဖြစ်ပြီး ပိုချက်တီနိုအနေနဲ့ ကစားသမား ၂၃ ဦးစာရင်းကို ပြင်ဆင်မှုတွေစတင်ပြုလုပ်နေပြီဖြစ်ပါတယ်။သို့သော်လည်း အာဂျင်တီးနားလူမျိုးနည်းပြဟာ အမေရိကန်၊ ကနေဒါနဲ့ မက္ကဆီကိုတို့ပူးတွဲအိမ်ရှင်အဖြစ်ကျင်းပသွားမယ့် ၂၀၂၆ ကမ္ဘာ့ဖလားပြိုင်ပွဲကိုလည်း အာရုံအပြည့်အဝစိုက်ထားပြီး အသင်းအတွက် ကြီးမားတဲ့မျှော်လင့်ချက်တွေရှိနေတာဖြစ်ပါတယ်။ 

ပိုချက်တီနိုက "ကျွန်တော်တို့က ကမ္ဘာ့ဖလားကို အိမ်ရှင်အဖြစ်လက်ခံကျင်းပသွားရမှာဖြစ်လို့ ဖိအားတော့ရှိနေမှာပါပဲ။ ဒီနိုင်ငံက အနိုင်ရဖို့ပဲ စိတ်အားထက်သန်တဲ့ နိုင်ငံတစ်ခုပါ။ အားကစားမှာပဲမဟုတ်ဘဲ ဘယ်အရာမှာမဆို အနိုင်ရချင်ကြပါတယ်။ ဒါက ဒီနိုင်ငံရဲ့ ယဉ်ကျေးမှုပါပဲ။ ဒါကြောင့်ဖအားတွေရှိလာမှာဖြစ်ပေမယ့် ဖိအားတွေက ကျွန်တော်တို့ကို တိုးတက်စေပါလိမ့်မယ်" လို့ပြောကြားခဲ့ပါတယ်။ 

ဆက်လက်ပြီး ပိုချက်တီနိုက လာမယ့် ၅ နှစ်၊ ၁၀ နှစ်အတွင်း အမေရိကန်ဟာ ကမ္ဘာ့ဘောလုံးလောကရဲ့ နံပါတ် ၁ နေရာသို့ရောက်လာနိုင်ကြောင်းကို "လာမယ့် ၅ နှစ်၊ ၁၀ နှစ်အတွင်းမှာ ကျွန်တော်တို့ ကမ္ဘာ့နံပါတ် ၁ နေရာကို သေချာပေါက်ရောက်နိုင်ပါတယ်။ ဒါက ဖြစ်နိုင်တဲ့အရာပါ" လို့ပြောကြားခဲ့ပါတယ်။ 

အမေရိကန်လက်ရွေးစင်နည်းပြဟောင်း ဂရက်ဂ်ဘာဟယ်တာဟာ ၂၀၂၄ ကိုပါအမေရိကပြိုင်ပွဲမှာ အုပ်စုအဆင့်နဲ့ ထွက်ခွာခဲ့ရတာကြောင့် အသင်းကနေ ဖယ်ရှားခံခဲ့ရပေမယ့် ပိုချက်တီနိုကတော့ ဘာဟယ်တာကို ချီးကျူးပြောဆိုမှုတွေပြုလုပ်ခဲ့ပါတယ်။ ပိုချက်တီနိုက "သူက အသင်းရဲ့စိတ်ဓာတ်ပိုင်းကို တည်ဆောက်ပေးခဲ့ပါတယ်။ ကျွန်တော်တို့ကိုယ်ပိုင်ဟန်နဲ့ အသင်းတစ်သင်းကိုတည်ဆောက်နိုင်ဖို့ အရမ်းအရေးကြီးပါတယ်။ ကျွန်တော်တို့အသင်းမှာ ကစားသမား ၂၃ ယောက်ကနေ ၂၆ ယောက်အထိလိုအပ်ပါတယ်။ အသင်းကိုဘက်ပေါင်းစုံကနေ ကူညီပေးနိုင်ဖို့လိုပါတယ်။ ဒီလိုမှမဟုတ်ရင် အခက်အခဲတွေကြုံရနိုင်ပါတယ်" လို့ပြောကြားခဲ့ပါတယ်။ 

လာမယ့်သောကြာနေ့မှာ အမေရိကန်ဟာ ကွန်ကာကက်ဖ်နေရှင်းလိဂ်ဖလား ဆီမီးဖိုင်နယ်ပွဲစဉ်အဖြစ် ပနားမားကို လော့စ်အိန်ဂျလိစ်ရှိ ဆိုဖီအားကစားကွင်းမှာ ယှဉ်ပြိုင်သွားရမှာဖြစ်ပြီး အနိုင်ရခဲ့မယ်ဆိုရင်တော့ ဗိုလ်လုပွဲမှာ ကနေဒါ ဒါမှမဟုတ် မက္ကဆီကိုနဲ့ တွေ့ဆုံသွားမှာဖြစ်ပါတယ်။