လာမယ့်နှစ် ဖီဖာဥက္ကဋ္ဌရွေးကောက်ပွဲမှာ အင်ဖန်တီနိုနဲ့အပြိုင် အရွေးချယ်ခံဖို့ အာဆင်နယ်နည်းပြဟောင်း အာဆင်ဝင်းဂါး စဉ်းစားနေတယ်လို့ BBC သတင်းဌာနမှာ ဖော်ပြထားပါတယ်။

အသက် ၇၇ နှစ်အရွယ် ပြင်သစ်လူမျိုးက ဥရောပဘောလုံးလောကထိပ်သီးပုဂ္ဂိုလ်တွေရဲ့ထောက်ခံမှုတွေကို အလျှင်အမြန်ပဲ ရရှိလာပါတယ်။ ဒီပုဂ္ဂိုလ်တွေကတော့ ဝင်းဂါးကို အင်ဖန်တီနိုရဲ့နေရာမှာ အစားထိုးနိုင်မယ့် ရွေးချယ်စရာတစ်ခုအဖြစ် ယုံကြည်ထားကြပါတယ်။

ဝင်းဂါးကတော့ ဒီအခွင့်အလမ်းအတွက် အလေးအနက်စဉ်းစားနေတယ်လို့ သတင်းထွက်နေပေမဲ့ အပြီးသတ်ဆုံးဖြတ်ချက်တော့ မချမှတ်ရသေးပါဘူး။

အသက်အရွယ်နဲ့ ဒီရာထူးမှာ ဘယ်လောက်ကြာကြာ ဆက်ရှိနေနိုင်မလဲဆိုတဲ့ စိုးရိမ်မှုတွေကြောင့် သူ့ကို ထောက်ခံသူတချို့ကတော့ လေးနှစ်သက်တမ်းအပြည့် မတာဝန်ယူနိုင်ဘူးဆိုရင်တောင် ဦးဆောင်သူတော့ ဖြစ်လာစေချင်ကြပါတယ်။

တစ်ဖက်မှာလည်း ကမ္ဘာ့ဖလားရဲ့စီးပွားရေးဆိုင်ရာအစုရှယ်ယာတွေကို ပုဂ္ဂလိကရင်းနှီးမြှုပ်နှံသူတွေဆီ ရောင်းချမယ့် အငြင်းပွားဖွယ်အစီအစဉ် ပျက်ပြားသွားပြီးနောက် အင်ဖန်တီနိုအတွက် ဖိအားတွေ ပိုမိုများပြားလာနေပါတယ်။

FIFA Forward Enterprise (FFE) လို့ လူသိများတဲ့ ဒီအဆိုပြုချက်က ဥရောပဘောလုံးလောကတာဝန်ရှိသူတွေဆီမှ ဝေဖန်သံတွေကို အများအပြား ထွက်ပေါ်စေခဲ့ပါတယ်။

ဒီအစီအစဉ်ကို အပြင်းထန်ဆုံးဝေဖန်ခဲ့သူစာရင်းမှာ ဥရောပဘောလုံးအဖွဲ့ချုပ်(UEFA) လည်း ပါဝင်ခဲ့ပြီး ဝင်းဂါးသာ အင်ဖန်တီနိုကို ယှဉ်ပြိုင်ဖို့ ဆုံးဖြတ်ရင် သူ့ကို ထောက်ခံပေးသွားဖွယ် ရှိနေပါတယ်။

ဒါပေမဲ့ တဖက်မှာလည်း အင်ဖန်တီနိုက သူ့ရဲ့ရာထူးကို ဆက်လက်ထိန်းသိမ်းနိုင်မယ်လို့ ယုံကြည်နေပြီး အာဖရိက၊ အာရှနဲ့ တောင်အမေရိကတိုက်ကိုယ်စားပြု ဘောလုံးအဖွဲ့ချုပ်တွေရဲ့ထောက်ခံမှုကိုလည်း ရရှိထားပါတယ်။

မကြာသေးမီကပဲ အင်ဖန်တီနိုက ကမ္ဘာ့ဘောလုံးလောကအဖွဲ့ဝင်တွေရဲ့ထောက်ခံမှုအများစုကို ရရှိထားတယ်လို့ ပြောဆိုခဲ့ပါတယ်။

အာဖရိကဘောလုံးအဖွဲ့ချုပ်အဖွဲ့ဝင်အားလုံးက သူ့ကို လူသိရှင်ကြား ထောက်ခံတယ်လို့ ကြေညာခဲ့မှုကြောင့်လည်း သူပြန်လည်ရွေးချယ်ခံရရေးလှုပ်ရှားမှုအတွက် ကြီးမားတဲ့ အားသာချက်တစ်ခု ဖြစ်ခဲ့ပါတယ်။

ဒါပေမဲ့ ဝင်းဂါးသာ အမှန်တကယ်ပါဝင်ယှဉ်ပြိုင်လာမယ်ဆိုရင်တော့ အခြေအနေတွေ ပြောင်းလဲသွားနိုင်ပါတယ်။

ဖီဖာရဲ့ ကမ္ဘာလုံးဆိုင်ရာဘောလုံးဖွံ့ဖြိုးတိုးတက်ရေး အကြီးအကဲတစ်ဦးအဖြစ် အားကစားလောကတစ်ခုလုံးမှာ သူ့အတွက် လေးစားမှု အများအပြား ရှိနေပါတယ်။ အထူးသဖြင့် အာဆင်နယ်ကို ကိုင်တွယ်ခဲ့ချိန် ပါရမီရှိတဲ့ လူငယ်ကစားသမားတွေကို အခွင့်အရေးပေးခဲ့မှုကြောင့် အာဖရိကတိုက်ရဲ့လေးစားခံရမှုကို ပိုမို ရရှိထားပါတယ်။

ကမ္ဘာ့ဖလားပြိုင်ပွဲဝင်အသင်း ၄၈ ခုအထိ တိုးချဲ့မယ့် အစီအစဉ်ကိုလည်း ဝင်းဂါးက ထောက်ခံပေးခဲ့ပြီး ကမ္ဘာ့အကြီးကျယ်ဆုံးစင်မြင့်ထက်မှာ နိုင်ငံတွေ ပိုမိုယှဉ်ပြိုင်ခွင့် ရရှိစေခဲ့လို့ အာဖရိကတိုက်တစ်ခုလုံးရဲ့ကြိုဆိုမှုကိုလည်း ရရှိခဲ့ပါတယ်။

အင်ဖန်တီနိုရဲ့ ဖျက်သိမ်းလိုက်တဲ့ စီးပွားရေးအစီအစဉ်နဲ့ပတ်သက်လို့ ဝင်းဂါးက ခပ်ခွာခွာ နေခဲ့သလို ဒီအစီအစဉ်ရေးဆွဲမှုမှာ သူ ဘာတစ်ခုမှ မပါဝင်ခဲ့ဘဲ သတင်းမီဒီယာတွေမှတဆင့်သာ ကြားသိခဲ့ရပါတယ်လို့ အခိုင်အမာပြောကြားခဲ့ပါတယ်။

ဒါ့အပြင် ဒီအဆိုပြုချက်ကို ပြန်လည်ရုပ်သိမ်းလိုက်တဲ့ ဆုံးဖြတ်ချက်ကိုလည်း သူက ကြိုဆိုခဲ့ပြီး ဖီဖာအဖွဲ့အစည်းအတွင်း ပွင့်လင်းမြင်သာမှုနဲ့ ရိုးသားဖြောင့်မတ်မှုတို့ရဲ့ အရေးပါပုံကို အလေးပေး ပြောဆိုခဲ့ပါတယ်။

မတ်လမှာ ကျင်းပမယ့် ရွေးကောက်ပွဲ မတိုင်မီ ဥက္ကဋ္ဌလောင်းအဖြစ် ဝင်ရောက်ယှဉ်ပြိုင်လိုသူတွေက သူတို့ရဲ့ဆန္ဒသဘောထားကို နိုဝင်ဘာ ၁၈ ရက်နောက်ဆုံးထားပြီး အတည်ပြုပေးသွားရပါမယ်။

တော့တင်ဟမ်နောက်ခံလူဟောင်း ရာမွန်ဗီဂါနဲ့ ဂျပန်ဘောလုံးအဖွဲ့ချုပ်ဂုဏ်ထူးဆောင်ဥက္ကဋ္ဌ ကိုဇိုတာရှီးမားတို့လည်း ဖီဖာဥက္ကဋ္ဌရွေးကောက်ပွဲ ဝင်ရောက်ယှဉ်ပြိုင်ဖို့ စိတ်ဝင်စားတယ်လို့ ကြေညာထားပါတယ်။